LUNES XV DEL TIEMPO ORDINARIO

LUNES XV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 1, 7-14. 22

Israelgua heta ita’ýra, imbarete ha omoenyhẽma upe tetãpy. Egipto ruvicha guasu upe ramogua ipyahu, ha ndoikuaái mba’eve Joségui. Ha he’i upéicha umi hetã guápe: Umi Israelgua imbareteve ha heta itevéma ñande hegui. Jajejokóke ichugui kuéra ani oñembohetave!

Oiko ramo sapy’a ñorairõ guasu, oñemoĩne ñane mbohováiva ndive ha upéicha osẽne ñane retãgui.

Upérõ omoĩ uru Israelgua ári, ojopy haguã hendive opa iteichagua tembiapo pohýipe ha omopu’ãuka ichupe kuéra táva kuéra Pitón ha Ramsés. Ombohéra upéicha táva ojapóva oñeñongatu haguã Egipto pegua trígo.

Ha’e kuéra ojejopyve ramo ko’yteve oñemboheta, omoenyhẽmba upe tetãpy ha Egíptope ojekyhyjéma ichuguikuéra. Ha oñepyrũ ojopy eteve, ha Israel guápe omomba’apo tembiguái ramo, mescla tuju, adóve apópe, tembiapo kokue ha opaichagua tembiapo pohýipe.

Upérõ Faraón omondo iñe’ẽ he’íva upéicha opa tetã guápe: “Peity y Nílope opa kuimba’e hebréo oikove ypy ramóva, kuña katu peheja toikove”.

Tupã Ñandejára Ñe’ẽ.

SALMO ÑEMBOHOVÁI 123, 1-8

Opavave: Upe ñane pytyvõva niko Tupä Ñandejára.

Tupã Ñandejára noñemoĩri rire ñande ykére,
yvypórakuéra opu’ã ramo guare
ondyry ñande rehe, ipochy hendy
haguére ñane ndive hikuái,
ñande pýra ite ñane mokõ va’erã mo’ã. O.

Y ñande aho’ipa va’erã mo’ã, ysyry ñande reraha va’erã mo’ã,
y pochy ñane moñapymi va’erã mo’ã.
To ñemomba’e guasu Tupä Ñandejára ndohejáigui ja’a hãinguápe. O.

Ku guyráicha ojehekýiva ñuhãgui, upéicha avei niko ñande.
Upe ñuhã opẽ ha ñande ñasũ javeve jaha.
Upe ñane pytyvõva niko Tupã Ñandejára,
yvága ha yvy apohare.” O.

ALELUIA Mt 5, 10

Aleluia.
Ovy’a va’erã umi oñembohovakéva oikóre teko jojápe ichupekuéra guarä Sambyhy oïva Yvágape.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 10, 34; 11, 1

Upe ramo Jesús he’i hemimbo’ekuérape: Ani peimo’ã che aju hague py’aguapy agueru haguã ko yvy ári. Ndajúi agueru haguã py’a guapy, ñorairõ uvei katu.

Che aju amoingo vaívo ta’ýra itúva ndive, mitãkuña isy ndive ha tembireko iména sy ndive. Ha péicha, pende rogagua voi pende rerekóta ija’e’ỹha ramo.

Pe itúva térã isýpe ohayhuvéva che hegui, ndaikatúi oiko che remimbo’e ramo. Ha upe ohayhuvéva ta’ýra térã tajýrape che hegui, ndaikatúi oiko che remimbo’e ramo. Ha pe ohupi’ỹva ikurusu ijapére che moirũ haguã, upéva ndaha’éi che mba’e.

Pe hekovére hakate’ỹva, omanóta. Pe che rehe ojeroviáva ha hekovére nahakate’ýiva katu, ojuhúta tekovete. Oimeraẽ peẽme pene moguahẽ porãva, che moguahẽ chéve.

Ha upe chéve che moguahẽva, omoguahẽ avei che mbouharépe. Omoguahẽva maranduhárape, maranduhára haguére ha’e, upéva ohupity va’erã jopói Tupã Ñandejáragui oúva maranduhárakuérape. Ha pe omoguahẽva peteĩ imarangatúvape, imarangatúgui ha’e, upéva ohupity va’erã jopói Tupã Ñandejáragui oúva imarangatúvape.

Oimeraẽ ome’ẽva hi’ymínte jepe ko’ã che remimbo’épe, añetehápe ha’e peẽme ndopyta mo’ãiha hekovia’ỹre ichupe.

Ha Jesús oheko mbo’epa rire umi 12 hemimbo’épe, osẽ oho upégui, oporombo’e ha oñemoñe’ẽ haguã umi táva upe rupigua rupi.

Ñandejára Jesucristo Ñe’ẽ