LECTURAS SÁBADO XIV DEL TIEMPO ORDINARIO

LECTURAS SÁBADO XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha    49, 29-32; 50, 15-26a.

Jacob omombe’u hembipota ita’ýrakuérape: Che amanótama ha aipota pe che ñotỹ che rukuéra ykére, ku ita kua oĩva Efrón Hitíta ñúme, opytáva Macpélagui kuarahy resẽ gotyo, Mamré rovái, tetã Canaánpe. Abraham ojogua va’ekue  upépe upe ñu upéva Efrón hitítagui, oñeñotỹ haguã hogagua kuéra. Upépe oñeñotỹ va’ekue  Abraham ha hembireko Sara.

Upépe avei oñeñotỹ Isaac ha hembireko Rebeca ha upépe añotỹ va’ekue  che rembireko Léape. Upe ñu ha upe itakua upépe oĩva ojejogua va’ekue Hitítakuéragui.

He’ipa vove hembipota ita’ýra kuérape, Jacob omocha’ĩ hetyma hupápe ha ojehekýi.

Omano rire itúva, José ryke’y kuéra he’i ojupe: Oiméne José ndaija’éi hína ñande rehe ha omoengoviáta ñandéve upe jajapo va’ekue  hese.

Upérõ he’iuka hikuái ichupe: Omano mboyve ñande ru he’i va’ekue  oréve: “Upéichake peje Josépe: ‘Eheja reína nde ryke’y kuérape hembiapo vaikue ha iñangaipa.’” Ko’ágä  rojerure ndéve Tupã ñande ru Jára rérape reñemboesarái haguã ore jejavykuégui.

Ha José hasẽ ohendúvo ko’ã mba’e. Upéi ou ityke’ýra kuéra, oñesü henondépe ha he’i: Roju ropytávo ne rembiguái ramo.

José katu he’i ichupekuéra: Ani pekyhyje, che niko ndaha’éi Tupã Ñandejára. Peẽ niko añete pejapose va’ekue  che rehe ivaíva. Tupã Ñandejára katu oguenohẽ upévagui iporãva, ha che moĩ añangareko haguã heta tapicha rekovére. Ojehu rupi ko pejapo va’ekue  che rehe, ha’ekuéra oikove gueteri. Ani pejepy’apy! Che añangarekóta pende rehe ha pende ra’ykuérare.

Ha ombopy’aguapy ohechaukávo iñe’ẽme ohayhuha ichupe kuéra. José opyta Egíptope itúva rogaguakuéra ndive ha oikove 110 áño. Ohecha Efraín ra’ykuéra ra’y ra’yre peve. Upéicha avei, Manasés ra’y Maquir ra’y kuéra oikove ypy José rapypa’ũme.

Ipahápe José he’i ityke’ýrakuérape: Amanótama. Tupã Ñandejára katu oñangarekóta katu ete pende rehe ha pende reraháta ko tetãgui, upe tetãme ha’e ome’ẽ hague iñe’ẽ Abraham, Isaac ha Jacóbpe.

Tupã Ñandejára Ñe’ẽ.

SALMO ÑEMBOHOVÁI   104, 1-4. 6-7

Opavave: Tupã Ñandejárare ojerovíava, no mano mo’ái

Pemomba’e guasu Ñandejárape, héra pemomba’e.

Opa tetã rupi pemoherakuã, peropurahéi árpa ha cítarape

umi mba’e hechapyrãva ha’e ojapo va’ekue . O.

Ichupe peropurahéi ha pemoherakuã

imombe’upyrãva ha’e ojapo va’ekue.

Héra marangatu pembotuicha. Opa ára peñemboja hendápe. O.

Peẽ hembiguái kuéra Abraham ñemoñaréva,

peẽ hembiporavo Jacob ra’ykuérava,

Tupã niko Ñandejára hína,

ha’e oisãmbyhy ko yvy tuichakue. O.

ALELUIA 1Ped 4, 14

Aleluia.

Pevy’a va’erã pejehova api ramo Cristo réra rayhupápe.

Espíritu sambyhyha pegua, Tupã Ñandejára Espíritu, oguejy pende ári.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 10, 24-33

Upe ramo Jesús he’i hemimbo’ekuérape:

Ndaipóri niko temimbo’e mba’e guasuvéva imbo’eháragui, ha ndaipóri tembiguái mba’e guasuvéva ijáragui. Upévare, peteĩ temimbo’e ovy’a va’erã ohupitýrõ imbo’ehárape, ha peteĩ tembiguái ijárape. Óga járare oje’érõ Beelzebú, piko mba’e ndoje’e mo’ãi umi hóga guáre?

Ani pekyhyje avavégui. Ndaipóri okañýva ojehecha’ỹ va’erã ha oñemíva ojekuaa’ỹ va’erã. Ko che ha’éva peẽme pytũmbýpe, oñehendúne ára sakãme. Ha upe che ha’éva peẽme pende apysápe, peguerosapukái óga ári guive. Ani pekyhyje umi pende reténte ojukávagui, ha ikatu’ỹva ohundi pene ánga. Pekyhyje uvei Tupã Ñandejáragui, ikatúva ohundi pene ánga ha pende rete aña retãme.

Noñeme’ẽi nga’u piko mokõi guyra’imi viru pehẽngue míre. Opáichavo, peteĩnte jepe nomanói pende Túva ndoipotái ramo. Pene akãrague peteĩ teĩ jepe niko ha’e oikuaapa. Aníke aipo ramo pekyhyje, peẽ niko mba’e guasueteve hína heta guyra’ígui.

Oimeraẽ he’íva opavave renondépe che rehe ojeroviaha, che añe’ẽne hese che Ru, yvágape oĩvape. Ha oimeraẽ he’íva opavave renondépe nda che kuaaiha, che avei ha’éne che Rúpe, yvágape oĩva renondépe, ndaikuaaiha ichupe.

Ñandejára Jesucristo Ñe’ẽ