LECTURAS VIERNES SEMANA XIV TO

LECTURAS VIERNES SEMANA XIV TO

Ko’ágã ñahendúta Tupã Ñandejára ñe’ẽ Génesis arandukápe oĩ háicha   46, 1-7. 28-30

Jacob ogueraha opa mba’e oguerekóva ha oho Bersébape. Upépe oikuave’ẽ mymbajuka Tupã itúva Isaac Járape. Upe pyharépe Tupã Ñandejára ojechauka ichupe iképe ha he’i ichupe: “Che hína Tupã nde ru Jára. Ani rekyhyje reho haguã Egíptope.

Upépe ajapóta ne ñemoñarégui peteĩ tetã guasu. Aháta ne ndive Egíptope ha hi’árape aru jevýta  ne ñemoñare ko tetãme. Remanóvo, José oĩta nde ykére.”

Upéi Jacob osẽ Bersébagui ha ita’ýra kuéra ohupi hembireko kuéra ha ichupe avei umi karréta Faraón ogueruka va’ekuépe. Jacob oho Egíptope ita’ýra itajýra, ha hemineno kuéra ha opa hogagua ndive. Ogueraha hymba kuéra ha opa mba’e oguerekóva.

Jacob omondo Judápe henonderã José rendápe ou haguã ohechávo ichupe Gosénpe. Ha’e kuéra oguahẽvo, José ojupi ikárrope ha ou Gosénpe itúva ruguãitĩvo. Jacob oñañuã ichupe ha heta hasẽ. Upéi he’i Josépe: Ko’ágã ikatúma amano. Ahecháma niko reikoveha gueteri.

Tupã Ñandejára Ñe’ẽ.

SALMO ÑEMBOHOVÁI   36, 3-4. 18-19. 27-28. 39-40

Opavave: Tupã Ñandejára oñangareko heko potĩvare.

Tupã Ñandejára rehe ejerovia ha ko yvy ári

reikóvo rehupitýne py’a guapy.

Tupã Ñandejára nde py’a to mbovy’a, ohupityukáne ndéve

opa mba’e nde py’a ite guive reipotáva. O.

Tupã Ñandejára oñangareko heko potĩvare,

 ichupe ome’ẽ yvy imba’e teerã.

Ndohasa asýi chéne ha’e, ha hyvatãne ñembyahýi guasu ou ramo. O.

Eheja ivaíva ha ejapo iporãva ha nde repyta mo’ãi yvy’ỹre.

Tupã Ñandejára ohechase teko joja, ha ndoheja reíri chéne

umi hese ojeroviávape. O.

Tupã Ñandejára oipytyvõ heko potĩvape,

Tupã Ñandejára oipe’a ichupekuéra

upe jejopy vaígui, ha’ekuéra ojerovia haguére hese. O.

ALELUIA Jn 16, 13a. 14, 26d

Aleluia.

Ou vove ágã pe Espíritu Añetegua, ha’e pene moingéta opa mba’e añeteguápe,

ha pene momandu’áta umi ha’e va’ekue peẽme rehe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha     10, 16-23

Upe ramo Jesús he’i hemimbo’ekuérape: Peikuaáke che pomondoha ku ovecháicha aguara guasu apytépe. Upévare pene arandu va’erã mbóicha ha pende reko  mirĩ va’erã pykasúicha.

Peñangarekóke pende jehe, cháke oĩta pene myakãsãva ha pene moĩva mburuvichakuéra pópe, ha pene mboepotíva itupao kuéra rupi. Ha che remimbo’e haguére peẽ, pejereraháta sãmbyhyhára ha mburuvicha guasukuéra renondépe.

Péicha, peẽ peñe’ẽta che rehe ichupe kuéra, ha umi judio’ỹvape avei. Ha pene moĩvo hikuái mburuvichakuéra pópe, ani pejepy’apy mba’épa térã mba’éichapa peñe’ẽta. Ijávo peẽme peñe’ẽ haguã, Tupã Ñandejára ome’ẽta peẽme mba’épa pejéta. Ha ndaha’e mo’ãi peẽ, peñe’ẽtava. Pende Túva Espíritu oñe’ẽta pende juru rupi.

Oĩta ome’ẽva tyvýra teépe jepe ojejuka haguã, ha oĩta túva ome’ẽva ta’ýrape. Mitãnguéra opu’ãta túvakuérare, ha ojukaukáne. Che remimbo’e haguére peẽ, avave nda ija’e mo’ãi pende rehe. Pe che rehe ojeroviáva ipaha peve katu, oikovéta.

Oĩ ramo pene muñáva peteĩ távagui, tapeho ambuépe. Añetehápe ha’e peẽme nda pe japopa mo’ãiha pene rembiapo távakuéra Israelgua rupi, che, yvypóraicha aju va’ekue , aju jevy mboyve.

Ñandejára Jesucristo Ñe’ẽ