JUEVES XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha

44, 18-21. 23b-29; 45, 1-5

Judá oñemboja José rendápe ha he’i ichupe: Karai, ta ñe’ẽmína ne ndive hekópe porã ha ndaipotái nde pochy upévare.

Nde niko poguasu apegua Faraóncha voi hína. Nde reporandu va’ekue oréve: “Oikovépa pende ru ha oimépa ambue pende ryvy?” Ha ore ro’e va’ekue ndéve: “Hẽe, roguereko ore ru tujami ha peteĩ ita’ýra pahague itujápe guare. Ko mitã ha ityke’ýra hína peteĩ sýgui guare. Ityke’ýra omanóma ha upévantema opyta. Upévare itúva ohayhu eterei ichupe.” Upérõ ere va’ekue oréve: “Peru chéve upe mitã tahecha”.

Nde katu ere va’ekue : “Ndoúi ramo pende ryvy na peguahëvéi chéne che rendápe.” Roho rire, romombe’u va’ekue ore rúpe ne ñe’ẽ. Ore ru he’i jevy ramo: “Tapeho Egíptope pejogua jevy ñandéve trígo”, ro’e ichupe: “Ndoroho mo’ãi, ore ryvy ndohói ramo ore ndive. Ndaikatúi roguahẽ upe karai rendápe hese’ỹ.”

Ore ru he’i oréve: “Peikuaa porã che rembireko Raquel ome’ẽ hague chéve mokõinte. Peteï oho va’ekue ha ndouvéi. Oiméne tymba ñarõ ojuka ha ho’u ra’e ichupe.

Upe guive ndahechavéiva. Ha ko’ágã peraha ramo avei kóva che hegui ha ojehu ichupe ivaíva, upéva che jukátama. Che tujáma ha nda ropu’aka mo’ãvéima py’a ñembyasy che aho’ítava.”
José ndaikatu véima ojejoko umi ipytyvõhára renondépe ha he’i opavavépe osẽ hague okápe.

Avave ndo pytái hendive ha’e ojekuaauka aja ityke’ýrakuérape. Oñepyrũ hasẽ soro, ohendu umi Egiptogua ha upéva oñemombe’u Faraónpe.

José he’i ityke’ýra kuérape: Che hína José! Oikove gueteri piko che ru?
Ityke’ýra kuéra ijurujái joa, ha hesasẽmba henondépe. José he’i ichupekuéra: Néike! Peñemboja che rendápe!

Oñemboja hikuái ha he’ive: Che hína pende ryvy José ku peẽ peme’ẽ va’ekue Egipto guápe. Ani pejepy’apy térã pejahéi pende jehe. Tupã Ñandejárante hína upe che mbou va’ekue pene renonderã ikatu haguã peikove.

Tupã Ñandejára Ñe’ẽ.

SALMO ÑEMBOHOVÁI 104, 16-21

Opavave: Pene mandu’akena mba’e porã ita ojapo va’ekue Tupä Ñandejára.

Upe tetãme nomongyvéi.
Ñembyahýi guasu ogueru upe tetãme ha ohundipa hi’upyrã.
Henonderãnguéra katu omondo peteĩme,
Josépe, tembiguái ramo oñeme’ẽ va’ekue . O.

Ojopy hikuái ipy yvyra kuápe
ha ijajúragui omosã ojopy,
ojehu peve umi mba’e he’i va’ekue ojehutaha.
Tupã Ñandejára omoañete upe ha’e he’i va’ekue . O.

Mburuvicha guasu opoiuka ichugui ,
ojejopyhágui oñenohẽ haguã he’i.
Hógape omoĩ ichupe mburuvichárõ.
Opa mba’e ipo guýpe omoĩ. O.

ALELUIA Mc 1, 15

Aleluia.
Tupã Ñandejára Sambyhy hi’aguïma. Pejevy pene rembiapo vaikuégui ha
peguerovia Marandu porã.
Aleluia.

EVANGELIO

Marandu porã Jesucristo rekove ha hemimbo’e San Mateo omombe’u háicha 10, 7-15

Upe ramo Jesús he’i hemimbo’ekuérape: Ta peho pemoerakuã hi’aguĩmaha ñesãmbyhy yvágagui oúva. Pemonguera hasýva, pemoingove jevy omanóvape, pemonguera umi hete aipávape ha pemosẽ mba’epochy opavavégui. Peẽme niko oñeme’ẽ rei ko pokatu, ani pejerure hese mba’eve.

Ani peraha viru pende jehe, térã vosa oimeháichagua tapére guarã, térã pende ao embojopyru haguã, térã pende py rehegua, térã yvyra pende po pegua. Opa omba’apóva niko oñemongaru va’erã voínte.

Peguahẽvo peteĩ távape térã oimeraẽ henda ojeikohápe, peheka ikatu va’erãvare pejerovia ha pepyta hógape, pesẽtaha ára peve. Ha hógape peguahẽvo, pemomaitei umi upépe oikóvape.

Ha umi upepegua pene moguahẽ porã ramo, pejerure Tupã Ñandejárape upépe oĩ haguã py’a guapy, péicha’ỹ ramo katu, anínte pejerure. Ha na pene moguahëséi ramo térã na pene renduséi ramo katu, pesë pe óga térã pe távagui, ha peityvyro pende pýgui pe yvytĩmbo.

Añetehápe ha’e peẽme, ágä ára pahápe ichupe kuéra oñenupã pohyivéta umi táva Sodoma ha Gomórrape oiko va’ekuégui.

Ñandejára Jesucristo Ñe’ẽ