MIÉRCOLES XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 41, 53-57; 42, 5-7a. 17-24a.

Opávo jehasa porã Egíptope, oñepyrũ 7 ára jehasa asy, José he’i haguéicha. Opa tetãme oĩ ñembyahýi, ha katu Egíptope oĩ tembi’u.

Egiptogua oñepyrũvo iñembyahýi, oho Faraón rendápe tembi’u rekávo. Faraón he’i ichupekuéra: Tapeho José rendápe ha pejapo ha’e he’íva.

Ñembyahýi ojaho’ipaitéma ramo upe tetã, José oipe’a trígo ñongatuha rokẽ ha ome’ẽ hi’upyrã Egipto guápe.

Ñembyahýi niko ipohyive ohóvo arako’ẽre. Opa tetãgui ojeju Egíptope ojejoguávo trígo Joségui, mamove ndaipórigui hi’upyrã.

Jacob ra’ykuéra oho hapichakuéra upepegua ndive. Heta ohose, oĩgui ñembyahýi tetã Canaán tuichakue. José oisãmbyhy Egipto, ha ome’ẽ trígo umi opaguio ohóvape. Oguahẽ avei José ryke’y kuéra ha oñesü henondépe omboja peve isyva yvýre. José ohecha vove umi ityke’ýrape oikuaa ichupekuéra ha oñembotavy. Oñe’ë  pochy ha he’i: Mamoguápa peẽ?

He’i ichupe hikuái: Canaangua. Roju rojoguávo trígo.

Upéi, omoingeka ichupe kuéra koty ypytũme, ha oheja upépe mbohapy ára. Mbohapy ára haguépe he’i ichupekuéra: Che arovia oĩha Tupã ha upévare ndajaposéi pende rehe mba’eve ivaíva. Tekotevẽ pehechauka chéve peẽ tapicha johéi pyreha, ha upévare opytáta oñemoakãsã peteĩ pende apytégui. Ha hembyre katu tapeho peraha pe trígo pejogua va’ekue  pende róga guápe. Upéi peru chéve pende ryvy imitãvéva. Upéicha pehechaukáta pejeha añetegua ha nda pejejuka mo’ãi.

Ha’ekuéra he’i iporãha upéicha, ha he’i joa ojupekuéra: Ko’ágã hekovia hína ñandéve ivaíva jajapo va’ekue  ñande ryvýre. Ako ha’e ojerure asy ramo guare ñandéve, nda jaikuaaséi va’ekue  mba’eve.

Rubén katu he’i ichupe kuéra: Ha’e voi va’ekue  peẽme ani haguã pejapo ivaíva upe mitã rusúre ha na pehenduséi va’ekue  che ñe’ẽ. Ko’ágã ojejerure ñandéve huguykue.

Ha’e kuéra noimo’ãi José oikuaaha opa mba’e he’íva hikuái, oiporúgui ñe’ẽ kuaahára oñe’ẽ hague hendive kuéra. José oheja ichupekuéra ha ojahe’o ha’eñoháme. Ou jeývo hendápekuéra ha ikatu vove oñe’ẽ, omboyke Simeónpe ha oipokuauka ichupe hovakekuéra.

Tupã Ñandejára Ñe’ẽ.

SALMO ÑEMBOHOVÁI 32, 2-3. 10-11. 18-19

Opavave: Ñandejára eme’ẽ kena oréve ára ha ára ne mborayhu.

Pemomba’e guasu Tupã Ñandejárape mbaraka púpe,

árpa púpe, pepurahéi ichupe.

Purahéi pyahu pehenduka ichupe.

Pembopu porãke ha peguerosapukái ichupe. O.

Ñandejára oitypa yvýre opa mba’e tetãnguéra ojaposéva.

Umi mba’e Tupã Ñandejára ojaposéva katu

ndopa reíri chéne araka’eve,

ha hembipota opa ára guarã. O.

Ñandejára katu oñangareko umi ichupe omomba’évape

ha imborayhu rehe ojeroviávape.

Umívape ha’e ndohejái omano.

Omoingove katu ichupekuéra ñembyahýi guasu ou jave. O.

ALELUIA Mc 1, 15

Aleluia.

Ñandejára Jesucristo he’i: Tupã Ñandejára Sambyhy hi’aguïma.

Pejevy pene rembiapo vaikuégui ha peguerovia Marandu porã.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha     10, 1-7

Upe ramo Jesús ohenói umi 12 hemimbo’épe ha ome’ẽ ichupekuéra pokatu omosẽ haguã mba’epochy, ha omonguera haguã opaichagua mba’asy.

Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra’y kuéra. Felipe ha Bartolomé, Tomás ha Mateo, viru ombyatýva Romape guarã. Avei Santiago, Alfeo ra’y ha Tadeo. Oĩ avei Simón, hetã rayhúva, ha Judas Iscariote, pe upéi omoñuhã va’ekue  Jesúspe.

Jesús omondo hembiaporãme ko’ã 12 kuimba’épe kóicha ombo’e rire ichupe kuéra: Aníke pehótei judio’ỹva oikoha rupi térã peguahẽ Samariagua táva kuéra rupi. Tapeho uvei Israelgua rendápe, ku ovecháicha okañymbáva. Tapeho pemyerakuã hi’aguĩmaha ñesãmbyhy yvágagui oúva.

Ñandejára Jesucristo Ñe’ẽ