DOMINGO XVI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 23, 1-6

Tupã Ñandejára he’i: “Cháke, peẽ ovecha rerekua pehejáva che ovechakuéra okañy ha isarambipa!”

Tupã Ñandejára Israel Jára he’i ovecha rerekuakuérape che retãguare oñangarekóvape: “peẽ pemosarambi ha pemondýi che ovechakuéra ha napeñangarekói va’ekue hesekuéra.

Che katu tesápe poguerekóta poinupã haguã pene rembiapo vaikue rehe. Che, opa mba’e Jára, upéicha ha’e. Che voi arúta che ovechakuéra rembyre opa tetãgui amosarambi hague rupi, amboatýta ha aru jevýta iñunguérape imemby heta haguã.

Amoĩta ovecha rerekua oñangareko haguã hesekuéra, ani haguã okyhyje mba’evégui térã okañy peteĩ ha’ekuérava. Che, opa mba’e Jára, upéicha ha’e”.

Tupã Ñandejára he’i: “Oúta ára ha che rupi David oguerekóta peteĩ iñemoñare tee, peteĩ oisãmbyhýtava hekopete, teko joja ha teko hekopegua oiporútava ko tetãme. Ha’e oisãmbyhy aja, Judá ndokyhyje mo’ãi mba’evégui ha Jerusalén oikóta py’a guapýpe.

Oñembohérata kóicha: ‘Tupã Ñandejára ñane moakã rapu’ã’.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 22, 1-6

Opavave: Tupã Ñandejára che rerekua, mba’eve naikotevẽi.

Tupã Ñandejára che rerekua, mba’eve naikotevẽi.
Ñu rovyũ asýpe che mombytu’u,
y syry satĩ ypýpe che moguahẽ.
Che mombarete jevy. O.

Ha tape hekópe guáre che reraha héra rehehápe.
Ahasa ramo jepe ka’aguy ypytũ rupi, nda kyhyjéi chéne, nde, che Jára, reimégui che ndive.
Nde yvyra jekoha, nde rehe che mbojerovia. O.

Karu guasu chéve rejapo umi che rayhu’ỹva rovake.
Che akã rehe reñohẽ mba’e ryakuã asy,
ha upe hay’uha remoenyhẽ chovi. O.

Ne mborayhu ha ne mba’e recha kuaa,
rehechauka chéve aikove aja pukukue,
ha nde rópe Tupã Ñandejára, aikóne tapiaite. O.

LECTURA MOKÕIHA:

Ko’ágã ñahendúta Tupã Ñandejára ñe’ẽ Pablo ohai va’ekue Éfeso guápe 2, 13-18

Ko’ágã katu, pejoajúvo Cristo ndive, peẽ mombyry peime va’ekue Tupã Ñandejáragui ko’ágã peñe moaguĩ, pe huguy ha’e oñohẽ va’ekue rupi.

Cristo voi niko ogueru ñandéve py’a guapy. Judío ha judío’ỹvagui ojapo peteĩ tetã, ha omano rupi kurusu rehe, oity pe tápia omo mombyrýva ichupekuéra ojuehegui. Ha’e voi oheja rei umi judío rembiapoukapy.

Péicha, judíokuéra ha judío’ỹvagui ojapo peteĩ mba’e ipyahúva ojoaju rupi hendive, ha ogueru ichupekuéra py’a guapy. Omano rupi kurusu rehe, ha’e ohundi pe a’e’ỹ oguereko va’ekue judío ha judio’ỹva ojuehe ha omoingo porã ichupekuéra Tupã Ñandejára ndive. Mokõivégui ojapo peteĩ mba’e añónte.

Cristo niko ou va’ekue omoherakuãvo marandu porã, oguerúva py’a guapy opavavépe: peẽme judio’ỹvape mombyry peiméva Tupã Ñandejáragui, ha judíokuérape aguĩ oĩvape Tupã Ñandejáragui.

Cristo rupi niko opavave ikatu ñaguahẽ ñande Túva yvagapegua rendápe peteĩ Espíritu Santo rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 10, 27

Aleluia.
Che ovechakuéra niko oikuaa che ñe’ẽ ha ou che rapykuéri, ha che aikuaa ichupekuéra.

Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha

6, 30-34

Opavave: Romomba’e guasu ndéve, Ñandejára.

Upe ramo Jesús remimbo’ekuéra oñemboaty hendive ha omombe’u ichupe opa mba’e ojapo ha ombo’e va’ekue. Jesús he’i ichupekuéra: Jaha japytu’umi ñane año peteĩ ojeiko’ỹháme.

Heta etereígui umi ou ha ohóva niko ndaijái ichupekuéra okarúvonte jepe. Upéicha Jesús ha ijapóstolkuéra oho kanóape peteĩ ha’eñoháme. Heta oĩ ohecháva ha oikuaa ha’ekuéraha.

Upéma ramo opa táva guio ojeho upe gotyo ha oguahẽ hikuái ha’ekuéra mboyve. Oguejývo Jesús pe kanóagui, ha ohechávo hetaha umi ijatýva, oiporiahuvereko ichupekuéra, oĩgui ovecha herekua’ỹvaicha. Ha oñepyrũ ombo’e ichupekuéra heta mba’e rehe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.