Ñahendu Hesu. Martes 16ª Tiempo Durante el Año

Escucha el evangelio y la reflexión en: https://youtu.be/VQU346mNNJI

Martes 16° Durante el Año

Mateo 12, 46 – 50

Upérõ Jesús oñe’ẽ jave, oguãhẽ sapy’a pe ha’e oĩháme isy ha ityvýrakuéra. Oñe’ẽse hikuái
hendive. Ha opyta hikuái oha’arõ chupe pe óga rokápe.

Upéi katu osẽ peteĩ he’i Jesúspe:— Nde sy ha nde ryvy oime amo okápe hína. Oñe’ẽse hikuái nendive.

Ha osẽ he’i Jesús: — Mávaiko che sy ha máva umi che ryvy.

Ha omañávo idisípulokuérare he’i: — Na’ápe hína che sy. Ko’ãva hína che ryvy. Ha pe
ojapóva che ru yvagapegua rembipota, péva hína che ryvy, che reindy ha che sy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Tuichaite mba’e niko pe ñande sy, jahecha ramo ha ñamomba’e guasúva. “Hekoviáko ndaikatúiva mamovénte jajuhu”. He’i ningo upe purahéi. Upe hesaráiva isýgui niko naiporãi ha upe onegáva ichupe katu ivaivéntema.

Pe sy niko ndahesaráiri imembýgui. Okakuaapáma ramo jepe ndoje’ói ipy’águi upe imemby, ojepy’apy hese ha oiko heseve.

Jahecha Tupãsy María oúramo ohecha imembýpe ihéntekuéra ndive. Ha oje’évo Hesúpe ouha hendápe hikuái ha’e oma’ẽvo umi hemimbo’ekuéra ijerére oiméva rehe he’i isy ha ihénte kuéra ha’eha umi ojapóva Tupã ñe’ẽ, umi ojeroviáva hese ha oguatáva hendive. Kóva ñahendúvo niko ha’ete Hesu omboykéva isýpe ajépa, ha omoĩva hendaguépe umi apóstol ha disípulo kuéra omoirũva ichupe.

Ikatu voi Tupãsy Maríape ojopi imi mba’e imemby péicha he’i haguére. Opáichavo ñande jaikuaa Tupãsy oñeha’ã vaekue ojapo pe Ñandejára rembipota hekovépe. “Che ha’e Ñandejára rembiguái” he’i ningo María pe ánhel pe oúramo omombe’u ichupe ojeporavo hague Hesu syrã, ha oñemoĩ ipópe. Aipóramo niko María ojapo rupi Ñandejára rembipota, ha’e Hesu sy jo’a jo’a, isy hetépe ha isy avei ijeroviápe.

Amo ipahápe pe tuichave mba’éva hína pe jerovia, ha upe jerovia Hesúre ojapo ñandehegui oñopehengue. Ñande jerovia rupi ojepyso pe ñande róga. Jerovia rupi jaju jajuhu ñande ryke’y, ñande ryvy, ñane reindy, ñande ru ha ñande sy pyahu, Ñandejára ome’ẽva ñandéve.

Ipahápe ningo, che reindy ha nde che irũ, ñande jaikuaa Tupãsy María ou hague opyta umi Hesu disípulo ha apóstolkuéra ndive.

Oiko avei ichugui Hesu disípula. Ha ombyaty ha’e ijerere umi imemby ohenói va’ekue, omoañete haguã pe familia guasu, Ñandejára familia, Hesu omoñepyrũ vaekue. Tañanembo’e hikuái jajapo haguã Ñandejára oipotáva ha toiko ñande hegui Tupãsy memby, Hesu ryvy ha Hesu reindy.

Pa’i Alberto Luna.