MARTES XVI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 14, 21 – 15, 1

Moisés oipyso ipo Mar Rojo ári ha Tupã Ñandejára oipeju pyhare pukukue kuarahy resẽguio yvytu ratã omboja’óva ykuéra ojuehegui.

Israelgua ohasa pe Mar Rojo yvy rupi, ha umi y aty oñembo’y ijykérekuéra mokõive hendáguio. Umi Egiptogua omuña ichupekuéra ha ojepoi hapykuéri umi y mbytépe opa ite Faraón kavaju ha ikárrokuéra reheve.

Oguahẽvo ko’ẽju, Tupä Ñandejára oma’ẽ arai ha tata ñembo’y guive Egiptogua gotyo ha ojapo tuicha sarambi ijapytépekuéra. Ohekyipa ikárrokuéra rruéda ha ndaikatuvéi oku’e. Upérõ Egiptogua osapukái: Jaguevíke Israel guágui, cháke opa mba’e Jára oñorairõ hesehápekuéra ha oñemoĩ ñande rehe!

Tupã Ñandejára he’i Moiséspe: Eipyso nde po umi y ári, ha to’a Egiptogua, ikárro ha ikavaju arigua ári.

Moisés oipyso ipo yguasu ári ha umi y ho’a jevy hendaguépe. Egiptogua katu ojerévo oguevi haguã ojetopa y renondépe. Upéicha Tupä Ñandejára ojaho’ipa ýpe ichupekuéra.

Umi y oguevívo hendaguépe ojaho’i Faraón ñorairõhárape oike va’ekue Israelgua rapykuéri ikárrokuéra reheve. Nahembýi peteĩnte jepe. Israelgua katu ohasa yvy rupi yguasu mbyte rupi, ha hi’y kuéra oñembo’y ijykére kuéra mokõive hendáguio.

Upe árape Tupã Ñandejára oipe’a Israel guápe Egiptogua poguýgui; ha Israelgua ohecha umi Egiptogua re’õngue y rembe’ýpe. Ohechávo Israelgua Ñandejára pyapy oinupã mbarete etereíva Egipto guápe, omomba’e ichupe ha oguerovia Tupã Ñandejára ha hembiguái Moiséspe.

Upérõ Moisés ha Israelgua opurahéi joa Tupã Ñandejárape he’ívo: Ta ropurahéi Tupã Ñandejárape, ojajaipáva imbaretetégui. Oity upe y guasúpe kavaju ha hi’ári guápe.

Tupã Ñandejára Ñe’ẽ.

SALMO ÑEMBOHOVÁI Ex 15, 8-10. 12. 17

Opavave: Tupã Ñandejárante ipuka´aka opa mab’ére

Reipeju pochy yeta apytépe ha iñapesãmba!
Opu’ã yvatévo y oñembo’ýva,
hypa yguasu upe hypyhápe,
hugua iñapekã! O.

He’i ore muñáva: Jaike hapykuéri, jaipe’a imba’éva,
ñañemohyguãtã, ñamoperõmba
ha oguerekóva jarahapa ite!
Ñande kyse pukúpe jajukapaite! O.

Reipeju upe ýre ha ichupekuéra ojaho’ipa!
Ku ita pohýicha ho’yguy joa y ñarõ ruguápe!
Reipyso nde po akatúa
ha omokõmba ichupe kuéra yvy. O.

Nde remboguata ichupe
ha remohenda yvyty marangatúpe,
reiporavo va’ekue reiko haguã, Nde Rekoha,
Tupã Ñandejára, nde po teépe remopu’ã va’ekue ! O.

ALELUIA Jn 14, 23

Aleluia.
Ñandejára Jesucristo he’i: “Pe che rayhúva nomboyke mo’ãi che ñe’ẽ, che Ru ohayhúta ichupe ha moköive rohóta henda peve”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha.

12, 46-50

Upe ramo Jesús oñe’ẽ jave gueteri hína, oguahẽ ha’e oĩháme isy ha ityvýrakuéra, oñe’ẽséva hendive. Ha opytágui hikuái pe óga rokápe, peteĩ umi upépe oĩva he’i Jesúspe: Nde sy ha nde ha ryvy kuéra oime okápe, ha oñe’ẽse nendive.

Jesús katu he’i: Mávaiko che sy ha máva che ryvy?
Ha omañávo, hemimbo’e kuérare he’i:
Ko’ãva hína che sy. Ko’ãva hína che ryvy. Ha oimeraẽ ojapóva che Ru yvága pegua rembipota, upéva hína che ryvy, che reindy ha che sy.

Ñandejára Jesucristo Ñe’ẽ.