LECTURAS MIÉRCOLES XVII DEL TIEMPO ORDINARIO

LECTURAS MIÉRCOLES XVII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 34, 29-35

Moisés oguejy yvyty Sinaígui, oguerúvo ipópe umi mokõi ita pehẽngue ohechaukáva umi 10 tembiapoukapy. Hova omimbipa oñe’ẽ haguére Tupã Ñandejára ndive. Ha’e katu ndohecha kuaái upéva.

Aarón ha Israelgua ohechávo Moisés rova omimbipáva, okyhyje oñemboja haguã hese. Moisés ohenói ichupekuéra. Aarón ha Israelgua moakãhára kuéra oñemboja ha Moisés oñe’ẽ hendive kuéra.

Upéi oñemboja opa Israelgua ha Moisés omombe’u ichupe kuéra opa mba’e he’ikáva Tupã Ñandejára. Oñe’ẽmba rire hendive kuéra Moisés ojehovaho’i ijahojápe.

Oñe’ẽ aja Tupã Ñandejára ndive Moisés oipe’a hovágui ijahoja oñe’ẽ haguã hendive ha osẽvo, omombe’u Israel guápe upe he’ikáva Tupã Ñandejára. Israelgua ohecha upérõ Moisés rova omimbipáva ha upéi Moisés ojehovaho’i, oñe’ẽ jevy peve Tupã Ñandejára ndive.

Tupã Ñandejára Ñe’ẽ.

SALMOÑEMBOHOVÁI 98, 5-7. 9

Opavave: Tupã Ñandejára imarangatu.

Pemomba’e guasu Tupã Ñandejárape,
peñesũ henondépe,
Ha’e imarangatu hína! O.

Moisés ha Aarón Tupã pa’ikuérava,
Samuel katu peteĩ umi héra ohenóiva,
oñembo’e Ñandejárape, ha ha’e ohendu ichupekuéra. O.

Tupã Ñandejára oñe’ẽ hendivekuéra arai ñembo’y guive,
ha ha’ekuéra ojapo hembiapoukapy,
ha’e ome’ẽ va’ekue ichupekuéra. O.

Peropurahéi Tupã Ñandejárape.
Pemomba’e guasu ichupe ijyvyty marangatúpe,
Tupã Ñandejára imarangatu! O.

ALELUIA Jn 15,15b

Aleluia.
Ñandejára Jesucristo he’i: “Che pohenói che irü, aikuaaukáre peẽme opa mba’e che Rúgui ahendu va’ekue”.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 13, 44-46

Upe ramo Jesús he’i opavavépe: Ñesãmbyhy Tupã Ñandejáragui oúva niko ojogua ku pláta yvyguy kokuépe oñeñotỹvape. Ou peteĩ ojuhúva pe pláta yvyguy ha oñomi jevy upepete. Upéi, vy’apópe oho ome’ẽmba opa oguerekóva ha ou ojogua pe yvy.

Ñesãmbyhy Tupã Ñandejáragui oúva niko ojogua avei peteï ñemuhára oikóva oheka ita jegua iporãvape. Ojuhúvo peteï iporãvéva oho ha ome’ẽmba opa oguerekóva ha ou ojogua pe ita jegua.

Ñandejára Jesucristo Ñe’ẽ.