LECTURAS MIÉRCOLES XIX DEL TIEMPO ORDINARIO

LECTURAS MIÉRCOLES XIX DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 34, 1-12

Moisés ojupi Moab pegua yvy ojeiko’ỹhágui yvyty Nebo, Pisgá ru’ã megua, Jericó rovái, ha Tupã Ñandejára ohechauka ichupe opa pe yvy Galaad guive Dan peve, opa Neftalí, Efraín ha Manasés yvy, opa Judá yvy kuarahy reike pegua yguasu peve, Négueb, táva pindoty Jericó ñu, Sóar peve. Ha Tupã Ñandejára he’i ichupe: Kóva hína pe yvy ame’ẽ hague che ñe’ẽ Abraham, Isaac ha Jacóbpe ha’évo: ne ñemoñarépe ame’ẽta. Aheja rehecha nde resa tee rupi, nde reike mo’ãigui upépe.

Upépe omano Moisés, Tupã Ñandejára rembiguái, Moab retãme he’i haguéicha Tupã Ñandejára. Oñotỹ ichupe ñúme, Moab retãme, Bet-Peor rovái. Avave Ko’ágã peve ndoikuaái ityvy renda. Moisés oguereko 120 áño omano ramo. Hesãi gueteri ha hesapyso porã.

Israel ñemoñare ojahe’o hese ha oñemonde ao vosakuépe 30 ára pukukue Moab yvy jeiko’ỹháme. Péicha omboty umi jahe’o ára Moisés rehe.

Josué Nun ra’y henyhẽ arandúgui, Moiséspe omoĩ haguére ipo hese. Israel ñemoñare iñe’ẽ rendu ichupe, Tupä Ñandejára he’i haguéicha Moisés rupi.

Araka’eve nopu’ãi Israélpe maranduhára Moisés joguaha. Tupä Ñandejára ha Moisés oñe’ẽ ramo ojuecha jepi. Ndaipóri va’ekue ha’eichagua Tupä Ñandejára ojapouka ramo guare ichupe opa umi mba’e techapyrã Egipto retãme, Faraón, hembiguái ha hetã guáre, ha pe pyapy mbarete ha poromongyhyje Moisés oiporu va’ekue opa Israel ñemoñare renondépe.

Tupã Ñandejára Ñe’ẽ.

SALMO ÑEMBOHOVÁI 65, 1-3a. 5. 8. 16-17

Opavave: Opavave tetã pemomba’e guasu Tupã Ñandejárape.

Mayma yvy apére peikóva,
vy’a pópe pepurahéi Tupã Ñandejárape.
Héra peropurahéi, ha peje ichupe:
“Tuicha ite mba’e niko ne rembiapokue. O.

Peju pehecha Tupã Ñandejára rembiapokue,
umi mba’e hechapyrãva ñande rehehápe ojapóva.
Opavave tetã pemomba’e guasu Tupã Ñandejárape.
Pehenduka pende purahéi Tupã Ñandejárape. O.

Peẽ Tupã Ñandejára pemomba’éva,
peju ta mombe’u peẽme
mba’épa ha’e ojapo che rehe,
Héra niko ahenói ha ichupe amomorã. O.

ALELUIA Cf. 2Tes 2, 14

Aleluia.
Tupã Ñandejára ñane renói Marandu porã rupi,
jaguereko haguã Ñandejára Jesucristo mimbipa.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 18, 15-20

Upe ramo Jesús he’i hemimbo’ekuérape: Nde rapicha ojapo ramo nde rehe ivaíva, eñe’ẽ hendive pene añoháme ha ehechauka ichupe ojavy hague.

Ne rendu ramo, repyta porã jevýne hendive. Ha na nde renduséi ramo katu, ehenói peteĩ térã mokõime, ikatu haguã opa oje’éva toje’e mokõi térã mbohapy rovake. Ha ichupekuéra nohenduséi ramo katu, emombe’u opavave rovake tupaópe. Ha upépe nohenduséi ramo katu, pereko ichupe pende rehegua’ỹva ramo térã viru ombyatýva Rómape guarãicha.

Añetehápe ha’e peẽme, opa mba’e peẽ pe apytïva ko yvy ári, oñeapytĩta avei yvágape. Ha opa mba’e peẽ pejoráva ko yvy ári, ojejoráta avei yvágape.

Che ha’e avei peẽme: Mokõi pende apytégui peñemoĩ ramo peteĩ ñe’ẽme ha peñembo’e he Túva yvágape oĩvape pejerure haguã ichupe oimeraẽ mba’e, ha’e ome’ẽta peẽme katu ete. Mokõi térã mbohapy oñemboaty ramo che rérape, upépe aiméta che, hendivekuéra.

Ñandejára Jesucristo Ñe’ẽ