JUEVES XIX DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Jueces arandukápe oĩ háicha 3, 7-10a. 11. 13-17

Tupã Ñandejára he’i Josuépe: Ko ára guive romoĩta Israel guápe remoakã haguã. Ohecha kuaáta hikuái aimeha ne ndive Moisés ndive aĩ haguéicha. Ere pa’ikuérape oguerahávape Tupã Ñandejára karameguã, ágã oguahẽ vove Jordán ysyrýpe toike ha to pyta upe hembe’ýpe.

Upéi Josué he’i opavavépe: Peju pehendu umi mba’e Tupã Ñandejára he’íva. Kóicha peikuaáta Tupã Ñandejára oikovéva oĩha pende apytépe: Tupã Ñandejára hína opa yvy ári oikovéva ruvicha. Ikarameguã oñembohasáta Jordán mboypýri pene renonderã. Peiporavo 12 kuimba’e peteĩ teĩ umi 12 Israel ñemoñare guágui. Tupã Ñandejára hína ko yvy Jára, ha pa’ikuéra ogueraháva ikarameguã opyrũ vove ýpe, Jordán ysyry osóta. Upe y osyry rangue yvy gotyo ijatýta peteĩ hendápe yvate gotyo.

Tupã Ñandejára Ñe’ẽ.

SALMO ÑEMBOHOVÁI 113A, 1-6

Opavave: Aleluya, aleluya, aleluia

Israel osẽ ramo guare Egíptogui,
tetã ambuégui osẽ ramo

Jacob ñemoñare, Tupä Ñandejára ojapo
Judágui hekoha, Israélgui hetã. O.

Yguasu oguevi ohechávo ichupekuéra,
ha Jordán ndosyryvéi.
Yvyty rusu kavaráicha opopo,
ha umi yvyty katu ovecha ra’ýicha. O.

Mba’éiko ojehu ndéve yguasu ajeve reguevi?
Mba’éiko ojehu ndéve Jordán ajeve nde resyryvéi?
Mba’éreiko kavaráicha pepopo?
Mba’éreiko ovecha ra’ýicha pepopo? O.

ALELUIA Sal 118, 135

Aleluia.
To jajái che ári nde rova mimbikue Tupä Ñandejára, ha che mbo’e ne rembiapoukapy.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 18, 21- 19, 1

Upe ramo Pedro oñemboja Jesús rendápe ha he’i ichupe: Che Jára, mbovy jevyvépa che rapicha rembiapo vaikue aheja rei va’erã ichupe? Iporãma piko 7 jevyve aheja rei ramo?

Jesús he’i ichupe: Nahániri. Iporãta 70 jevy 7 reheja rei ramo.

Upévare, Tupã Ñandejára sãmbyhy yvága pegua niko kóicha hína. Oĩ va’ekue peteĩ mburuvicha guasu oikuaa porãséva mba’éichapa umi ichupe omba’apóva oĩ hendive viru porúpe. Ha oñepyrũvo ohecha peteĩ teĩ, ojegueru ichupe peteĩ heta eterei viru omyengovia’ỹ va’ekue ichupe. Ha upéva ndoguerekóigui mba’eve, pe mburuvicha guasu he’i oñeme’ẽ haguã ichupe hepýre tembiguái ramo ambuépe, ta’ýrakuéra ha opa oguerekóva reheve. Péicha omoengovia haguã pe viru oiporu va’ekuére.

Upépe, pe kuimba’e oñesũ huvicha renondépe ha ojerure asy ichupe he’ívo: “Che ruvicha, che ra’arõna. Ame’ẽmba jevýta niko ndéve.” Pe mburuvicha guasu oiporiahuvereko ichupe. Oheja rei ichupe pe viru oiporu va’ekue ha oheja oho.

Pe kuimba’e osẽvo okápe katu, ojuhu peteĩ hapicha oiporu va’ekue ichugui viru sa’imi. Opo voi ijajúrare ojuvy haguãicha ichupe, he’ívo: “Emoengovia chéve pe aiporuka va’ekue ndéve”. Pe hapicha oñesũ henondépe ha ojerure asy ichupe he’ívo: “Che ra’arõna. Ame’ẽmba jevýta niko ndéve.” Ha’e katu ndoikuaaséi ichugui mba’eve. Omoakãsã ha ombotyka koty ypytũme omoengoviapa peve pe viru oiporu va’ekue. Ohechávo upéva, umi hapichakuéra ombyasy eterei. Oho hikuái mburuvicha guasu rendápe ha omombe’upaite ichupe pe ojehu va’ekue.

Upe marõ pe mburuvicha guasu ohenoiuka pe kuimba’épe ha he’i ichupe: “Nde tembiguái ahẽ! Che aheja rei ndéve pe ikatu’ỹ va’ekue remyengovia, rejerurégui chéve. Ha nde reiporiahuvereko va’erã mo’ã avei nde rapichápe, che roiporiahuvereko haguéicha.” Pe mburuvicha guasu ipochy eterei pe kuimba’e ndive. Omoakãsã ha ombotyka koty ypytũme omoengoviapa peve ichupe pe viru ome’ẽ va’ekue ichupe.

Upéi Jesús he’i: Péicha avei che Túva yvágape oĩva ojapóta pende rehe, pende py’a ite guive napeheja reíri ramo pende rapichápe, pe ojapóva pende rehe.

Jesús he’ipa rire ko’ã mba’e, osẽ oho Galiléagui ha oguahẽ Judéape, opytáva kuarahy resẽ gotyo ysyry Jordángui.

Ñandejára Jesucristo Ñe’ẽ.