SÁBADO XIX DEL TIEMPO ORDINARIO

Ko’ágã ñahendúta Tupã Ñandejára ñe’ẽ Jueces arandukápe oĩ háicha 24, 14-29

Josué he’i hetãguápe: Upévare, pemomba’éke Tupã Ñandejárape ha pejapo hembipota pemboyke’ỹ rehe ichupe. Umi tupã pende rukuéra ypykue omomba’e va’ekue oiko ramo Éufrates ysyry ha Egipto rupi, peipe’a pende apytégui ha pemomba’e guasu Tupã Ñandejárape año.

Napemomba’e guasuséi ramo Tupã Ñandejárape katu, ko’ágã peje va’erã mba’éichagua tupãmepa pemomba’e guasúta. Pemomba’e guasútapa umi tupã pende rukuéra ypykue omomba’e guasu va’ekue oiko ramo guare Éufrates ysyry rupi, térãpa ko’ágã peikóguima ko’ã Amorreo yvýpe pemomba’e guasúta itupã nguérape? Che ha maymáva che rogagua romomba’e guasúta Tupã Ñandejárape.

Maymáva Israel ñemoñare he’i: Mba’eveichave ramo noromboyke mo’ãi Tupã Ñandejárape ha noromomba’e guasu mo’ãi ambue tupã. Tembiguái ramo roiko va’ekue Egíptope ha Tupã ore Jára ore guenohẽva’ekue oréve ha ore ru kuéra ypykuépe upégui. Heta mba’e techapyrã ojapo va’ekue ore rehehápe.

Mamo tetã roikoha rupi térã mamo rohoha rupi, ha’e oñangareko va’ekue ore rehe. Hi’ári, Tupã Ñandejára voi omosẽmba va’ekue ore renonderãgui amorreo kuéra ha ambue tetãgua ko yvýgui. Ore avei romomba’e guasúta Tupãme. Ha’e niko ore Jára.

Ha Josué he’i ichupekuéra: Ikatu mba’e va’erã niko pemomba’e guasu Tupã Ñandejárape. Peikuaáke ha’e Tupã Ñandejára marangatuha, ha imba’erãnte pende potaha. Pepu’ã ramo hese térã pene rembiapo vai ramo, ha’e ndahesarái mo’ãi. Pemboyke ramo ichupe ha peho pemomba’e guasu ambue tupã, Ñandejára ojahéita pende rehe ha heta mba’e vai oguerúta pende ári. Pene rundíta, jepe heta mba’e porã ojapo pende rehehápe.

He’i hikuái Josuépe: Ndaupéicha mo’ãi. Ore romomba’e guasúta Tupä Ñandejárape.

Josué he’i ichupekuéra: Pene mandu’áke peẽ voi peme’ẽha pene ñe’ẽ ha pejeha pemomba’e guasutaha Tupä Ñandejárape.

Ha he’i hikuái: Ore voi upéicha ro’e.

He’i ichupekuéra Josué upémarõ: Penohẽ umi tupã gua’u ra’ãnga perekóva pende apytépe ha pehundipa. Ha pende py’aite guive peñeme’ẽ Tupã Israel Járape.

Maymáva Israel ñemoñare he’i: Tupã ore Járape romomba’e guasúta ha he’ívante rojapóta. Ha upéva upe árape voi Siquémpe, Josué omoĩ kuatiáre maymáva Israel guápe umi mba’e ha’e kuéra ojapo va’erã. Ko ñe’ẽ me’ẽ ha’e kuéra ojapóva, Josué omoĩ kuatia Tupã Ñandejára rembiapoukapy ñe’ẽ ryrúpe.

Upéi omopu’ãuka peteĩ ita guasu upe yvyra máta guýpe oĩva Tupã Ñandejára rekohápe. Ha he’i Josué maymáva Israel guápe: Ko ita oĩta ko’ápe ku ñande rechárõ guáicha, ohendupágui opa umi mba’e Tupã Ñandejára he’i va’ekue ñandéve. Ko ita oĩta ko’ápe ani haguã ñande japu Tupã Ñandejára ndive. Upéi Josué omondo Israel guápe hógape ha oje’ói maymáva ijyvy teépe.

Opa ko’ã mba’e ojehu rire, omano Tupã Ñandejára rembiguái Josué, Nun ra’y. Omano orekópe 110 áño.

Tupã Ñandejára Ñe’ẽ.

SALMO ÑEMBOHOVÁI 15, 1-2a. 5. 7-8. 11

Opavave: Nde hína che Jára ndaipóri ne jojáva

Tupã Ñandejára, eñangareko kena che rehe,
ne rendápe niko aguahẽ.
Tupã Ñandejára, nde hína opa mba’e chéve guarã.
Nde pópe oĩ che rekove. O.

Amomba’e guasúta Tupã Ñandejárape che resape’áva,
pyharekue jepe che py’a rugua guive che moarandu.
Opa árape Tupã Ñandejárare che mandu’a,
ha’e oĩ ramo che ypýpe nda’ái chéne. O.

Nde rehechaukáne chéve jeikove rape.
Ne rendápe aime ramo vy’águi che moenyhẽne.
Nde ypýpe vy’a ndopáiva
nde akatúape aime ramo. O.

ALELUIA Cf. 1Tes 2, 13

Aleluia.
Pe japyhy Tupã Ñandejára Ñe’ë, ani yvypóra ñe’ẽicha, pejapyhy uvei pe añete háicha, Tupä Ñandejára ñe’ẽicha.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 19, 13-15

Upe ramo heta mitã mimi ojereraha Jesús rendápe, ha’e omoĩ haguã ipo iñakãre ha oñembo’e haguã hesekuéra. Umi hemimbo’e kuéra katu, ipochy umi mitãme oguerúva ndive.

Jesús he’i ichupekuéra: Peheja umi mitã tou che rendápe, ha ani pejoko. Umi ha’e kuéraicha guápe guarã niko hína ñesãmbyhy yvágagui oúva. Ha omoĩ ipo iñakã ári kuéra. Upéi ha’e osẽ oho upégui.

Ñandejára Jesucristo Ñe’ẽ