Ñahendu Jesús Ñe’ẽ. Domingo 21º Durante el Año

Escucha el evangelio y la reflexión en: https://youtu.be/fLOdgFXYrUQ

Domingo 21º TDA Ciclo B

Juan 6, 60 – 69

Upérõ heta oĩ Jesús disípulokuéra apytépe ohendúva umi mba’e Jesús ombo’e va’ekue. Osẽ he’i hikuái: — Ko’ã mba’e he’íva niko ijetu’u etereíma. Mávaiko openáta hese.

Jesús ohecha kuaa ndo’aporãiha umi mba’e he’íva idisípulokuéra apytépe. Upévare he’i chupekuéra: — Ko’ã mba’ére piko pembopo’ise. Mba’e pejapóne che rechárõ ajupi jey ramo yvágape aju haguégui. Ñandejára Espíritu niko pe ñane moingovéva, ñande ro’o katu naiporãi mba’everã. Opa umi mba’e che amombe’úva peẽme niko ogueru peẽme Ñandejára Espíritu ñane moingovéva. Oĩ jepe gueteri pende apytépe ndogueroviáiva umi mba’e che ha’éva.

Iñepyrũmby guive voi niko, Jesús oikuaa va’ekue máva-mávapa umi ndojerovia mo’ãiva hese. Oikuaa ave mávatapa hína upe otraisionátava chupe.

Upéi katu he’i chupekuéra: — Upévare niko che ha’e peẽme, avave ndou mo’ãiha che rendápe, ndohejái ramo chupe che Ru.

Upe guive, heta oĩ umi hendive oiko vaekue ombopo’íva, ha ndoikovéi hendive. Jesús oporandu umi 12 idisípulokuérape: — Peẽiko pehopáta avei.

Simón Pedro he’i chupe: — Mbo’ehára, máva rendápe nga’u piko rohóta. Ne ñe’ẽ niko ñane moingove. Ore niko roguerovia umi mba’e eréva, ha roikuaa ndeha hína Ñandejára ra’y marangatu.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Japoína”. He’i lo mitã, ikuerái vove. Oiméne nde avei eñekonvida tembiapópe, aty, proyecto, organización pe. Ne akãraku ha eho rei hese. Upéi katu tapére eju nekane’õ, epilla naiporãmbáiva nde rehechái va’ekue iñepyrũmbýpe, ha epoi, nderehoveiete, egue.

Ikatu avei nde voi emboguejy peteĩ idea porã. Emoakãraku lo mitã ha pejapo jepe heta mba’e. Upéi katu ou okúi lo mitã ha sa’i sa’ípe opa rei pe tetia’e pópe oñepyrũ va’ekue.

Péva ite hína la ojehúva Jesúspe. Heta rasa rire oúva oñepohãno, ohendu ichupe, heta itereípe omongaru rire, ou lo mitã ipilapa. Oñandu ipohyi pe ojeruréva, ha ojeheja ichugui.

Opyta Hesu oma’ẽ ijapóstolkuérare hovasy joáva ijerére. Ha oporandu ichupekuéra, ha ñandéve avei che irũ ha che reindy: Peẽ piko che rejase avei.

Mba’épa nde eréta ichupe. Mba’érepa nde repytase Ñandejára ndive, nde komunidápe, mba’érepa rejerovia gueteri Jesúsre ha eguata gueteri hendive. Eñe’ẽmína hendive ha emombe’umi ichupe mba’érepa nde nderepoiséi ichugui.

ÑAÑEMBO’E OÑONDIVE

Ñandejára Jesukrísto, nde rehecha ha rembyasy asy va’ekue nde reja ha opoívo nde hegui umi oiko va’ekue nde ykére. Chemokyre’ỹ kena romoirũ haguã opa araite ha aníkena eheja añemomombyry nde hegui araka’eve. Amén.

Pa’i Jasy.