Ñahendu Jesús Ñe’ẽ. Lunes 21º Durante el Año

Escucha el evangelio y la reflexión en: https://youtu.be/socoADcvCPM

Lunes 21º Durante el Año

Mateo 23, 13 – 22

Upérõ Jesús he’i: Pejererekóke peẽ Moisés léi pembo’éva ha peẽ fariséokuéra rova mokõi. Peẽ niko pemboty pende rapichágui Ñandejára Rréino rokẽ ani haguã avave oike. Peẽ voi ndapeike mo’ãi, ha hi’ári ndapehejái umi oikesévape oike.

Pejererekóke peẽ Moisés léi pembo’éva ha peẽ fariséo rova mokõi. Peẽ pehóva opa rupi rei yvy rupi térã y rupi, peteĩnte jepe pembojerovia haguã Ñandejárare peẽicha.

Upéva pejapo haguére hesekuéra, ha’ekuéra oho jo’a-jo’áne aña retãme. Pejererekóke peẽ myakãhára resatũ. Peẽ peje, “Oime ramo ome’ẽva iñe’ẽ tupao rérape ojapotaha peteĩ mba’e ha upéi ndojapói, upéva ndaha’éi mba’eve. Oimérõ katu ome’ẽva iñe’ẽ pe óro tupaópe oĩvare, peje ojapo mante vaerãha he’i haguéicha.

Peẽ tekove tavy resatũ. Ndapehecha kuaái piko tupao tuichaveha mba’e pe óro pype oĩvagui. Pe óro niko oñemboyke Ñandejárape guarã tupao ryepýpe oĩ haguérente.

Ha pejeve avei, oime ramo ome’ẽva iñe’ẽ altar rérape ojapotaha peteĩ mba’e ha upéi ndojapói, upéva ndaha’éi mba’eve. Oime ramo katu ome’ẽ iñe’ẽ umi ofrénda altar ári oĩvare katu, ojapo mante va’erã he’i haguéicha. Peẽ tekove tavy resatũ. Ndapehecha kuaái piko Ñandejára altar tuichaveha mba’e umi ofrénda hi’ári oĩvagui.

Umi ofrénda niko oñemboyke Ñandejárape guarã pe altar ári oĩ haguérente. Pe ome’ẽva iñe’ẽ altar rérape, nome’ẽi altar rehe año. Ome’ẽ hína iñe’ẽ opa mba’e hi’ári oĩvare. Ha pe ome’ẽva iñe’ẽ tupaóre, nome’ẽi iñe’ẽ tupaóre añónte. Ome’ẽ hína iñe’ẽ Ñandejárare. Tupao niko Ñandejára róga. Upe ome’ẽva iñe’ẽ yvágare, ome’ẽ hína Ñandejára rérare. Yvágape niko Ñandejára oguapy.

Ñandejára Hesukrísto ñe’ẽ.

HA ÑAMBOGUEJYMÍNA ÑANDE REKOVÉPE…

Oime niko he’íva tupaoguailéi etereiha. Mísa, mitã karai, primera comunión, confirmación, menda jehovasa umíva, jajapo haguã, jaju ha jahaiterei vaerãha. Jajapo va’erã cursillo, jagueru ñande kuatia, paíno, testigo, péa ha amóa. Ha hi’arive japaga va’erã. Ha oime voi umíva omboka’apáva ichupe. Ha umícha hárupi lo mitã omombyky ha ojehejaiténtema voi. Ojavy upe jehovasa ha pe Ñandejára grásia.

Ikatu voíko hína Jesús he’i háicha umi fariseokuérape ñande tupaogua ñambopohýi etereíma ñande rapichápe upe Ñandejára rape. Ha jaipe’a rangue chupekuéra pe okẽ, ñamboty uvei ha jahape joko. Ñama’ẽ porãve va’erã hína he’i háicha ñandéve Papa Francisco noiméipa ñakomplika iterei ha ñamoguahẽ rangue pe Ñandejára grásia ñande rapichápe, ñamongañy uvei ichuguikuéra.

Jahecha va’erã mba’éichapa ikatu jaipe’ave umi ñande tupao rokẽ, jafasilita ñande rapichápe oike haguã, ha ohupyty haguã umi Ñandejára grásia Hesu oheja va’ekue ñandéve. Anivéma jajopy eterei hendape’ỹ.

Mba’épa rehecha nde ave che reindy ha nde che irũ, umi ñande léi tupaogua tekotevẽva ñambovevúi. Ani haguã ñambodiparapa tupaógui ñande rapichakuéra.

Pa’i Jasy.