LUNES XXIII DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Colosas guápe 1, 24-2, 3

Che pehẽnguekuéra: Ko’ágã avy’a umi pende rehehápe ahasa asývare, upéicharõ niko amoĩmba ahávo che retépe pe Cristo jehasa asykue ohasa’ỹva gueteri, Tupã Ñandejára iglésiare, ha’éva hete.

Tupã Ñandejára ojapo che hegui iglésia pytyvõhára, ha’e ome’ẽva chéve ajapo haguã pende rehehápe, amoasãi haguã opa rupi imarandu, he’iséva, pe imba’e ñemi heta iterei ára ha ñemoñare pukukue Tupã Ñandejára omokañy va’ekue, ha ko’ágä oikuaaukáva umi imba’évape.

Tupã Ñandajára oikuaaukase va’ekue ichupe kuéra mba’épepa iporãta pe mba’e reta mimbipa oñongatúva upe oñembopy’a peteĩ hague. Ha upe oñembopy’a peteĩ ñemi hague niko Cristo, oĩva pende pype, hese ae oñeha’arõ kuaáva jeiko mimbipa pereko va’erã.
Ñande ñamoherakuã Crístope, ñañemoñe’ẽvo ha ñambo’évo opavavépe arandu, jaraha haguã ichupe kuéra ojavy’ỹre Crístope. Upe va’erã amba’apo ha añorairõ opa mbarete ha pu’aka Cristo ome’ẽva chéve reheve.

Aipota peikuaa añorairõ mbareteha hína pende rehe, umi Laodicea guáre ha opa che recha’ỹ va’ekuére gueteri. Añorairõ ha’e kuéra ikyre’ỹ haguã, oñomoirũ haguã akói mborayhúpe ha mba’e kuaápe ikatu va’erã oikuaauka mba’épepa iporã opa tetãme pe Tupã Ñandejára oñembopy’a peteĩ ñemi hague, ha’éva Cristo ite voi; ipype niko oñeñongatu hína opa arandu ha mba’e kuaa.

Tupã Ñandejára Ñe’ẽ.

SALMO ÑEMBOHOVÁI 61, 6-7. 9

Opavave: Tupã Ñandejára oñangareko che rehe ha che renohẽ jejopy vaígui.

Tupã Ñandejára ndive año ite apytu’u,
ha’e che renohẽ jejopy vaígui.
Ha’e mante oñangareko
che rehe ha che renohẽ jejopy vaígui. O.

Ha’e niko che mo’ãha. Nda che py’a mokõi chéne.
Ñande, Tupã Ñandejára retã guáva, jajerovia hese opa ára.
Ñamombe’u ichupe ñande angata.
Ha’e niko ñane mo’ãhára. O.

ALELUIA Jn 10, 27

Aleluia.
Ñandejára Jesucristo he’i: “Che ovechakuéra ohendu che ñe’ẽ,

Che aikuaa ichupekuéra ha ha’ekuéra oho che rapykuéri”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 6, 6-11

Upe ramo ambue pytu’uha árape, Jesús oike umi judío tupaópe, ha oñepyrũ oporombo’e. Oĩ hína upépe peteĩ kuimba’e ipo akatúa ypíva. Ha umi fariséo ha Moisés rembiapoukapy mbo’eha oma’ẽ ñemi Jesús rehe jahecha omonguerápa ichupe pytu’uha árape, ha upéicha omoĩ vai haguã ichupe. Ha’e katu, oikuaapáva mba’épa umíva oguereko iñakãme, he’i pe kuimba’e ipo ypívape: Epu’ã ha eñemoĩ pe mbytépe.

Upe kuimba’e opu’ã ha oñembo’y, ha Jesús he’i umi ambuépe: Aporandúta peẽme: Mba’e mba’épa ikatu jajapo pytu’uha árape: ivaívapa, térãpa iporãva? Japoromonguera térã ñaporohundi?

Upéi oma’ẽ ijerekuévo oĩvare ha he’i pe ijypívape: Eipyso nde po. Pe kuimba’e oipyso, ha ipo okuera. Umi ambue katu ipochyeterei hikuái ha oñepyrũ ohecha oñondive mba’épa ikatu ojapo Jesús rehe.

Ñandejára Jesucristo Ñe’ẽ