Ñahendu Jesús Ñe’ẽ. Jueves 24º Durante el Año

Escucha el evangelio y la reflexión en: https://youtu.be/4B1b7c0paa0?feature=shared

Jueves 24º Durante el Año

Lucas 7, 36 – 50

Peteĩ fariséo hérava Simón okonvida Jesúspe oho hag̃ua okaru hendive hógape. Ha og̃uahẽ Jesús, ha oñemohenda okaru hag̃ua. Peteĩ kuña herakuã vaíva, oikóva avei upe rupi, ohendu ra’e Jesús oĩha hína Simón rógape. Og̃uahẽ sapy’a upépe, mba’yru’i ipópe, henyhẽva mba’e ryakuã porãgui.

Oñemboja Jesús rehe hapykuéguio, ha oñesũ. Oñepyrũ ojahe’o ha hesay syrýpe ojohéi Jesús py. Upéi katu omokã iñakã raguépe, ohetũ ha omonamba ipýre pe mba’e ryakuã porã. Simón ohechávo upéva he’i ipy’apýpe, “Kóva profétarõ añete, oikuaa mante va’erã mba’eichagua kuñápa hína pe opokóva hese.”

Upépe Jesús osẽ he’i Simónpe:— Simón, areko peteĩ mba’e ha’eséva ndéve.

Simón he’i chupe: — Ha mba’éiko péva, Mbo’ehára.

Jesús he’i chupe: — Oiko vaekue niko mokõi oiporu va’ekue pláta peteĩ pláta porukahágui. Peteĩ oiporu 500 níkel pláta, ha pe ambue katu 50. Ha ndaikatuvéigui omyengovia hikuái pe oiporu va’ekue, pe pláta porukaha oheja reínte mokõivépe. Ere chéve ko’ág̃a, máva umi mokõiguipa ohayhuvéne pe pláta porukahápe.

Simón he’i Jesúspe: — Chéverõ g̃uarã pe hetave oiporu va’ekue.

Jesús he’i chupe: — Ha péicha añete.

Upévo, Jesús omaña pe kuñáre, ha he’i Simónpe: — Rehecháiko mba’épa ojapo hína ko kuña. Aje’i ag̃uahẽrõ nde rógape, nde neremoĩri chéve y ajepyheimi hag̃ua. Kóva ko kuña katu, ojohéi che py hesaýpe ha omokã iñakã raguépe. Ag̃uahẽvo, nde nacheretũi che momaiteívo. Ha’e katu, aike guive nde rógape ohetũ ha ohetũ che py mokõive.

Neremoĩri che akãre mba’e ryakuã porã, ha’e katu oñohẽ mokõive che pýre. Upévare ha’e ndéve, ha’e che rayhuveha, oikuaágui ipekádo hetaite ojeheja reimaha chupe. Umi ipekádo mbovývako michĩve ñande rayhu.

Upéi ojere he’i pe kuñáme: — Nde pekádo ojeheja reíma ndéve. Ha umi okarúva hína Jesús ndive katu osẽ he’i ojupe: — Mávaiko kóva aipo oheja rei hag̃ua avavépe ipekádo.

Jesús katu ojere he’i pe kuñáme: — Rejeroviágui che rehe, rejesalváma. Tereho porãite.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Upe ñande rayhúva niko ñande reka, ñanemomaitei, oñemboja ñande rehe, nañe retũ, ñane añua, ñande pete pete, oñeñanduka ha notĩri avave renondépe ohechauka haguã imborayhu. Upe mborayhu noñeñandukáiva ha ndojehecháiva tembiapo rupive niko noiméiramo omanóma, ikangy eterei hina.

Ñama’ẽmi aipóramo che reindy ha nde che irũ, mba’éichapa jahechauka Hesúpe upe mborayhu ha jerovia ñañandúva hese. Tuicháramo jepe ñande pekádo, ñañembojáramo jahechauka mborayhu ha jerovia, Jesús oheja reíne ñandéve ñane rembiapo vaikue ha ñande rovasáne py’aguapýpe.

Pa’i Jasy.