Ñahendu Jesús Ñe’ẽ. Miércoles 28º Durante el Año

Escucha el evangelio y la reflexión en: https://youtu.be/8gW9AzSm4hs

Miércoles 28ª Durante el Año

Lucas 11, 42 – 46

Upéro Jesús he’i umi fariséope: Pejererekóke peẽ fariséo. Peẽ niko pemboyke Ñandejára peg̃uarã opa pende kokuégui pemono’õva, ménta ha rrúda hamba’e.

Chupe peme’ẽ 10gui peteĩ. Pende rapichakuérare katu napepenái. Ndapehechakuaái. Pehecha kuaa verá niko opavavépe ha pehayhu Ñandejárape. Ha upéva ári peme’ẽ Ñandejárape pe imba’éva.

Pejererekóke peẽ fariséo. Tupaópe peho jave, tenondete voi peguapyse. Poguasugua’úko peẽ. Mamo peikoha rupi, maymávante oñakãity peẽme, ha penembovy’a. Pejererekóke. Cháke pejogua umi yvykua omanóva oñeñotỹ haguépe, ipepáva ojekuaa’ỹva. Oimeraẽvante oguatáva hi’ári oikuaa’ỹre.

Osẽ peteĩ Moisés léi ombo’éva he’i Jesúspe: — Mbo’ehára, ko’ã mba’e eréva fariséokuéra rehe niko, ore rupytypa oréve ave.

Jesús he’i: Pejererekóke peẽ ave, Moisés léi pembo’éva. Pende rapicha ati’y ári pemoĩva mandamiénto pohýi, ikatu’ỹva ogueropu’aka. Peẽ katu pene kuã jepe ndapeipysói peipytyvõ haguã pende rapicha.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

“Che jeýma, he’i iñate’ỹva”. He’i niko ñe’ẽnga ojeitýva umi ojehekyiséva rehe tembiapógui. Ha añete hápe upe ndojaposéiva mba’eve ndive ijetu’u ñamba’apo. Noiméigui tembiapope ipy’aite guive, ijyvytu ha ipiro’ysénte. Ha péicha ningo upe ñane júnta ñanepytyvõ rangue ñande arhela. Ha ipahápe ombopohýive ñane rembiapo.

Jesús he’i umi fariséokuéra iñate’ỹha ojapo haguã upe añetehápe tekotevẽva. Ojapo hikuái umi ivevuivévante Ñandejára léipe oĩva ha hesarái oheka haguã tekojoja hapichakuéra ndive, ndoiporiahuverekói ijehasa asy.

Ñama’ẽ avei noiméipa ñande jaiporavo upe tembiapo sa’ínte Ñandejára ojeruréva ñandéve. Ñamyataindy sánto, jajovasa, ñañembo’e hamba’e. Noiméipa upéi ñañembotavy upe ñande rapicha ojejopýva ha ohasa asývagui, oĩva ñande ykére, ñame’ẽ haguã chupe imba’éva, jahechakuaa haguã chupe hemikotevẽ hamba’e.

Jesús he’i ijapéguio ipotĩ vaicha umi fariséo rekove. Oĩ porãmba. Hyepýpe katu heta mba’e ituju ha inéva ijaty. Ñama’ẽmi ñande ave noiméipa hina ijatýma ñande ryepýpe inéva ha tekotevẽva ñambo yvytu ha ñamopotĩ.

Pa’i Jasy.