Ñahendu Jesús Ñe’ẽ. Cristo Rey ára

Escucha el evangelio y la reflexión en: https://youtu.be/4Q6aFWVAqdM

DOMINGO 34º Durante el Año – Cristo Rey ára

Juan 18, 33 – 37

Upe árape Pilato oike jey hógape ha ohenói Jesúspe. Oporandu chupe: — Ndéiko hína judíokuéra rréi.

Jesús he’i chupe: — Ndete piko reikuaase, térãiko reporandu chéve oje’e haguérente ndéve.

Pilato he’i chupe: — Chéiko judío mba’e. Ne retãgua ha umi pa’i ruvicha niko umi nde rerúva, ha nde reja che pópe. Mba’e mba’éiko rejapo.

Jesús he’i chupe: — Che ndaha’éi mba’eveichagua rréi yvy arigua. Péicha rire niko, areko va’erã mo’ã oñorãirõva che ykére ani haguã ha’a judíokuéra pópe. Nahániri, che ndaha’éi rréi yvy arigua.

Upépe Pilato oporandu chupe: — Ndéiko rréi hína péicharõ.

Jesús he’i chupe: — Nde niko ere che ha’eha. Che niko aju ko yvy ári ha anase va’ekue ápe añetegua rehénte añe’ẽ haguã. Ha opa umi añetegua oikuaáva, che rendu.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

¡Che rréi! ¡Che rréina! Upéicha ningo ja’éva ñamoñe’ẽramo umi jahayhúva ha ñambojeroviáva ñande py’aite guive. Ajépa umi jahayhúva tuicha omanda ñande rehe.

Ko árape ñamohu’ã hína ñande áño litúrgico jaguerohorývo Cristo Rréi ára. Ha jahecha Hesúpe mburuvicha guasu Pilato renondépe. Heta oñemboharái rire hese umi soldádo omoĩ iñakãre koróna ñuatĩgui ha ogueru Hesúpe háimete opívo.

Ha’ete ku Pilato renondépe Jesús ndaha’éiva mba’eve. Ha oñembohory vaicha voi hese Pilato oporandúvo ichupe ha’épa rréi. Ha’e niko mburuvicha guasu Rrómagua py, ojerovia ijehe orekopágui ipoguýpe tetã Israel ha opa tetã ojepysóva yvy ári. Ha upéicha avei niko sapy’ánte oñandu umi poguasu mboriahu renondépe, péicha oma’ẽ jepi mburuvichakuéra umi ikangyvévare, umi itavymíva rehe, umi isoguévare, umi ndovaléiva rehe. Mba’evérõ guáicha oreko ichupekuéra.

Ñama’ẽmína che irũ ha che reindy ko ñande rréi rehe. Mboriahúicha oñemoĩva ñane renondépe. Ha’e naiñarõi, ndosapukái, ndoiporúi mboka térã kyse hapicha kóntrape, noñembohorýi avavére, hese katu oñembohory hikuái. Péva hína la ñande ruvicha guasu, ndaha’éiva hína mburuvichakuéra ko yvy ári guáicha, mbaretépe omandáva. Ñande rréi ñanerenóiva jaguata haguã hendive mborayhu pópe tape añetére.

ÑAÑEMBO’E OÑONDIVE

Ñandejára Jesukrísto, ore ruvicha guasu marangatu. Emyendy nde rata ore korasõme rohayhu haguã ndéve, emanda haguã ore rekovére, ha roiko haguã nendive py’aguapy ha mborayhu rapére. Amén.

Pa’i Jasy.