LECTURAS DOMINGO CRISTO REY ÁRA

LECTURAS DOMINGO CRISTO REY ÁRA

LECTURA PETEÎHA:

Ko’ágã ñahendúta Tupã Ñandejára ñe’ẽ Daniel arandukápe oĩ háicha 7, 13-14

Ahecha hína ko’ã mba’e pyhare, peichaháguinte, ahecha vaicha ou arai apytépe peteĩ ojoguáva yvypórape.
Ahecha oho pe karai oĩha gotyo, ha upéi ojereraha hendápe. Ha oñeme’ẽ ichupe pokatu, teko mimbipa ha oporo sãmbyhy haguã. Ha opaichagua tetãgua, opaichagua ñe’ẽme oñe’ẽva ojapo ha’e he’íva.

Ipokatu opa árape guarã, ha ha’e oporosãmbyhyhápe noñehundi mo’ãi araka’eve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 92, 1-2. 5

Opavave: Mburuvicha guasu hína Ñandejára, ojaho’i mimbipápe.

Mburuvicha guasu hína Ñandejára.
Ñandejára ojaho’i mimbipápe
ha ojeku’akua pokatúpe. O.

Hatã yvy omohenda, ndoku’éi chéne araka’eve.
Upe nde guapyha oĩ ymaite guive
ha nde katu opa ára reikove. O.

Ore Jára, umi ne rembiapoukapy niko
mba’e ijeroviapýva hína.
Teko marangatu ombojegua nde tupao opa ára. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Apocalipsis arandukápe oĩ háicha 1, 5-8

Jesucrísto añoite upe mba’e rechahára jeroviaháva, ha’e raẽvete oikove jevy va’ekue, ha oguereko ipoguýpe opa mburuvicha guasu ko yvy arigua. Cristo ñande rayhu ha ñane mopotĩ va’ekue ñane angaipágui, oñohẽvo huguy, ha ojapo ñande hegui peteĩ tetã.

Ñane moingo pa’i ramo ñamba’apo haguã Ñandejára, Jesucrísto Rúpe guarã. Teko mimbipa ha pokatu ta imba’e opa ára. Amén.

Cristo ou arai ári. Opavave ohechata ichupe, umi ichupe oikutu va’ekue jepe, ha opa tetã yvy arigua hasẽ ha oñembyasýta hese. Ta upéicha. Amén.

“Che hína pe alfa ha pe oméga”, he’i Ñandejára, Tupã ipu’akapáva, pe oikovéva, oikove va’ekue ha oikove va’erãva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mc 11, 9. 10
Aleluia.
Ñandejára toñemomba’e guasu! Toñemomba’e guasu Ñandejára rérape oúva!
Ñandejára to hovasa pe oúva ñande ru Davídcha ñane sãmbyhývo! Ñandejára
toñemomba’e guasu!
Aleluia.

EVANGELIO
Marandu porã Ñandejára Hesukrísto rekove ha hemimbo’e San Juan omombe’u háicha 18, 33b-37

Upe árape Pilato oike jey hógape ha ohenói Jesúspe. Oporandu chupe:— Ndéiko hína judíokuéra rréi.

Jesús he’i chupe: — Ndete piko reikuaase, térãiko reporandu chéve oje’e haguérente ndéve.

Pilato he’i chupe: — Chéiko judío mba’e. Ne retãgua ha umi pa’i ruvicha niko umi nde rerúva, ha nde reja che pópe. Mba’e mba’éiko rejapo.

Jesús he’i chupe: — Che ndaha’éi mba’eveichagua rréi yvy arigua. Péicha rire niko, areko va’erã mo’ã oñorãirõva che ykére ani haguã ha’a judíokuéra pópe. Nahániri, che ndaha’éi rréi yvy arigua.

Upépe Pilato oporandu chupe: — Ndéiko rréi hína péicharõ.

Jesús he’i chupe: — Nde niko ere che ha’eha. Che niko aju ko yvy ári ha anase va’ekue ápe añetegua rehénte añe’ẽ haguã. Ha opa umi añetegua oikuaáva, che rendu.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.