LECTURAS JUEVES SEGUNDO DE ADVIENTO

LECTURAS JUEVES SEGUNDO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 41, 13-20

Che, Tupã nde Jára, roguerekógui che po akatúpe ha ha’e ndéve: “Ani rekyhyje, aju roipytyvõvo.” Israel, Jacob retã, ne michĩ ha ne kangy ramo jepe, ani rekyhyje, che roipytyvõ.

Che, Tupã Israelgua Imarangatúva, upe roipe’áva ivaívagui. Ajapóta nde hegui mba’e ra’ỹi jykyiha, hãimbe jovái, ipyahu ha oñehãimbe’e porãva.

Rejykýi ha remongu’íta yvyty kuéra ha yvy pu’ã nguéra rehejáta kapi’i piru kuéicha. Repoíta yvytúre ha yvytu oguerovevéta, yvytu ratã omosarambíta.

Upérõ revy’áta ipy’a porãgui Ñandejára, Tupã Israelgua Imarangatúva ha’éta nde jeroviaha. Imboriahu ha mba’eve oguereko’ỹva oiko y rekávo ha ndojuhúi. Ikũ avevopa ijyuhéigui.

Che, opa mba’e Jára katu, hese añangarekóta, Che, Tupã Israel Jára, ndaheja mo’ãi ichupekuéra. Y ambosyrýta umi yvyty perõme ha yvu eta umi ñu rupi amoĩta. Yvy ojeiko’ỹhágui ajapóta y renda ha yvy apekãgui anohẽta ysyry.

Yvy ojeiko’ỹháme amoĩta kuri’y, jukeri ha olivoty, ha yvy perõme amoheñóita kuri’y opaichagua, ikatu haguã opavave ohecha ha oikuaa, hese oñamindu’u ha ipahápe ohecha kuaa, Che, opa mba’e Jára, upe Israelgua Imarangatúva, ajapo hague ko’ã mba’e che pokatúpe.

Tupã Ñandejára Ñe’ẽ.

SALMO ÑEMBOHOVÁI 144, 1. 9-13ab

Opavave: Tupã che Jára, ndéve romomba’e guasúta

Tupã che Jára, ndéve romomba’e guasúta che ruvicha guasu.
Nde réra amomba’éta opa árape.
opavavépe ha’e ohecha kuaa,
ha ohecha ramo opa hembiapokue. O.

Opa ne rembiapokue ta ne momba’e guasu, Ñandejára,
opa nde rehe ojeroviáva ta ne momba’e guasu.
Ha’ekuéra to moerakuã tuichaha upe ne retã,
ha’ekuéra toikuaauka nde ne mbareteha. O.

Upéicha ramo maymáva oikuaáne ne mbareteha,
ha upe ne sambyhy tuichaha.
Ne retã niko mba’e opa’ỹva,
ha nde reporosãmbyhýta opa árape. O.

ALELUIA

Aleluia.
¡Pembojuruvy yvága, yvate guive,
umi arai oñohë haguã Marangatúpe!
Ta ijuruguy yvy ha taheñói pysyrõhára.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 11, 11-15

Upe ramo péicha he’i Ñandejára upe atyhápe: Añetehápe ha’e peẽme, ndaipóri yvypóra kuéra apytépe mba’e guasuvéva Juan Bautístagui. Opáichavo, pe michĩvéva Tupã Ñandejára oisãmbyhyhápe, upéva mba’e guasuve ichugui.

Juan Bautista ouha ára guive ko’ágã peve, heta ivaíva ojejapo ñesãmbyhy Tupã Ñandejáragui oúvare, ha heta oĩ mbaretépe upéva omoingoséva. Juan ou mboyve niko maranduhára kuéra ha Moisés rembiapoukapy imandu’a ñesãmbyhy Tupã Ñandejáragui oúvare, ha peẽ peroviase ramo umíva ñe’ẽ, Juan hína maranduhára Elías, pe oje’e va’ekue outaha. Ohendúvake tojapysaka porã.

Ñandejára Jesucristo Ñe’ẽ.