Ñahendu Hesu. Tupãsy Santa María ára

Escucha el evangelio y la reflexión en: https://youtu.be/xugIS23uKfg

1 enero: Tupãsy Santa María ára                                                   .

  Upe ramo umi ovecha rerekua pya’ete oho, ha ojuhu María ha Josépe, ha pe mitãme oñenóva hína pe mymba karuhápe.  Ha ojuhúvo hikuái Jesúspe, osẽ omombe’u mba’épa he’i ra’e chupekuéra Ñandejára ángel pe mitãre.  Ha umi ohendúva opondera joaite.

   María katu oñongatúnte ko’ã mba’e ipy’apýpe, ha ojepy’a mongetámiva hese.  Umi ovecha rerekua katu ojevy hymba kuéra oĩháme. Tapére oho kuévo hikuái katu, oguerohory ha omomba’e guasu ohóvo hikuái Ñandejárape. Ojuhu niko ojehu hague Ñandejára ángel he’i hagueichaite chupe kuéra.

   Ha Jesús onase hague 8 árape, oñesirkunsida, ha ombohéra hikuái pe mitã Jesús. Ñandejára ángel péicha voi ojerure vaekue Maríape hye guasu mboyve.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oĩ niko peteĩ purahéi Niño ára rehegua he’íva: “Ojeroky peteĩ estrella ohecha mbohapy pastor, mba’épa oime he’i, jaje’ói jahechami. Oje’ói niko ohechávo Melchor, Gaspar ha Baltasar. Ojuhu ko niñomi, niño de nacimiento, ikupy pytã mimi, iñakã sa’yju mimbi. Lo pastore niko he’i Manuel héra haguã”.

Vy’a pópe jahecha ojotopa umi pastore niño Jesús, Tupãsy ha Señor San José ndive. Torypápe omombe’u hikuái mba’épa he’i chupe kuéra umi ángel Jesús rehe. Ha opavave ijurujái opytávo ohendúvo ichupe kuéra, Tupãsýrema katu oguapy iñe’ẽ. Ha péicha avei Señor San José oiméne hetia’e opytávo ojecharamógui pe mitã. Vy’apópe avei oje’ói pastor kuéra ohecha rire Jesús mitãmíme. Oguerohory Ñandejárape ohóvo.

Ha péicha ningo ou Ñandejára ñande apytépe, Jesucristo rupive ojechauka ñandéve. Péicha avei ko’ãga peve ijaty opárupi, comunidad-pe, grupo-pe, capilla, movimiento kuéra ha tupaópe, heta tapicha ohekáva Ñandejárape ipy’aite guive ha oguatáva Jesús rekávo.

Umíva ojotopa ohendu haguã Ñandejára ñe’ẽ, omombe’u haguã ojupe mba’épa Ñandejára oñanduka ichupekuéra, mba’épa ojapo hekovépe.

Mba’etekópa che irũ ha che reindy la nde espíritu hína ko año oñepyrũvape reñemoĩ kyre’ỹvo tapépe eheka ha ejuhu haguã Jesús pe. Evy’ávo nde avei umi pastorkuéra ovy’a haguéicha, oñuguaitĩvo hendive isy ikére. 

Pa’i Jasy.