Ñahendu Hesu. San Pablo ára
24 enero, 2022Ñahendu Hesu. Viernes 3º Tiempo Durante el Año
27 enero, 2022
Escucha el evangelio y la reflexión en: https://youtu.be/aeauXn6zA0c
26 de enero: Tito ha Timoteo ára. Lucas 10, 1-9
Upérõ Jesús oiporavove 72 idisipulorã ha umívape omondo henonderã, mokõi-mokõi, puebloha rupi hamba’e, umi ha’e ohasataha rupi. He’i chupekuéra: Ajépa tuicha pe Ñandejára kokue ha heta hi’a, omono’õ vaerãnte mbovy.
Upévare, pejerure Ñandejárape tombohetave umi ou va’erãva omyerakuã pe marandu porã opavavépe. Tapeho peẽ. Peikuaáke pomondoha hína ku ovecháicha jaguaretekuápe. Ani peraha pláta térã pende avíorã térã pende py rehegua ave. Ani avavépe pemomaitei tapére.
Oimérõ pene mog̃uahẽva hógape, pya’ete pemomaitei pejévo “Ñandejára rérape ta peime porãmba, ha py’a guapy toĩ pene ndive.” Ha oiko ramo hikuái py’a guapýpe, pene ñembo’e ohovasáne chupekuéra. Nahánirirõ katu, peẽme jeýnte opytáne. Ani peiko peva-peva rei óga-ógagui. Pepyta upe peg̃uahẽháme ha pe’u upe oñeme’ẽva peẽme. Omba’apóvape niko ija ohupyty hembiapo repykue.
Peike ramo peteĩ puéblope ha pene mog̃uahẽ porã ramo hikuái, pe’u umi mba’e oñeme’ẽva peẽme. Pemonguera opa hasýva ha peje chupekuéra Ñandejára Rréino hi’aguĩmaha.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Ñane ño ramo ndaigústoi ha ndajavy’apái, opa mba’e ijetu’uve. Ñañomoirũ ramo katu opa mba’e ñambohasa porãve. Ou vaíramo ñambovevúi ojupe ha ñañopytyvõ. Ha ou porã ramo katu tuichave javy’a oñondive.
Upévare Jesús ohenói iñirũrã, ha ojokuáivo umi disípulope, he’i chupe kuéra oñomoirũ haguã. Mokõi mokõi ojogueraha va’erã ojejokuáiva omboguata haguã tembiapo Ñandejára kokuépe.
Péva oiméne oreko iñakãme raka’e San Pablo apóstol, kuehe ñanemandu’a hague. Ha’e ndoikói ha’eño. Opa oho hárupi oraha hendive kuimba’e ipyahuvéva oipytyvõva ichupe opa mba’épe. Ha upe jave avei oikuaa ohóvo heta mba’e ichugui.
Umíva hína Tito ha Timoteo, ñane mandu’áva hese kuéra ko árape. Tito ha Timoteo ndohejái rupi San Pablo pe, ikatu hetave mba’e ojapo oñondive, ombo’e hetavépe ha okorre opárupi. Ekípo mbarete ojapo hikuái Ñandejára rérape.
Tuicha háicha ombyaty oñondive heta tapicha Ñandejára peguarã, oñopytyvõ rupi. Péicha ñande avei, che reindy ha nde che irũ, ñamba’apokuaa va’erã oñondive ñande Iglésiape.
Ani jaiko peteĩ teĩ ñane akãre. Ñañomoirũkuaa va’erã. Ñañeha’ã jaguata ñande rapicha kuéra ndive, ñamosã tembiapo, ñañeorganisa. Péicha tuichaiteve Ñandejára ojevaléta ñande rehe. San Pablo, Tito ha Timoteo rehe ojevale haguéicha.
Pa’i Alberto Luna.