Ñahendu Jesús Ñe’ẽ. Viernes Epifanía rire

Escucha el evangelio y la reflexión en: https://youtu.be/h6fdEmg4gPw

Viernes Epifanía rire San Lucas 5, 12-16

Upe jave Jesús oguãhẽ peteĩ puéblope oikohápe peteĩ iléprava. Ohechávo Jesúspe, ojeity henondépe ha omboja isyva yvýre. Ha ojerure asy chupe: — Ñandejára, che aikuaa nde ikatuha che monguera reipotárõ.

Jesús opoko hese ha he’i: — Aipota. Ekuera. Ha okuera.

Jesús katu he’i chupe: — Aníke emombe’u avavépe. Terehónte pa’i rendápe, ha eraha pe ofrénda Tupãme guarã Moisés he’i haguéicha. Péicha, opavave oikuaáta rekueramaha.

Jesús katu herakuã guasuve ára ko’ẽre. Heta oĩ oñembyatýva ojapysaka haguã hese.

Upéicha ave, heta oĩ oúva Jesús omonguera haguã chupe kuéra imba’asýgui. Jesús katu ohekámiva ha’eño oĩ haguãme, upépe oñembo’e haguã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Oime niko ñande rapicha noñemoguahẽiva óga hárupi. Ndoikéiva umi hénte ijatyhápe, ojekyhyjéva chugui, mombyrýguinte oñema’ẽva hesekuéra.

Umi mita’i kállere oikóva, présokue, sída orekóva, indígena, noĩmbáiva, itavýva, hasy vaíva. Oĩ avei ojerekóva óga hárupi ha oñeñomíva tapykuépe. Ndohechakaséiva otĩgui chugui ihéntekuéra.

Upéicha avei Israel retãme umi hasýva lépragui, ohecha’ỹva, paralítikokuéra, epiléptico, ndaikatúi oike tupaópe. Ndaijái hénte kuéra apytépe, oñembo’yke ha ojere chuguikuéra hapicha.

Upévare niko ko tapicha hova yvýre ojerure asy Hesúpe omonguera haguã chupe, ojehe’a jey haguã hapichakuérare. Oike jey haguã hógape, oho haguã tupaópe opavavéicha oñembo’e ha opurahéi. Anive haguã oiko kañymby, ha’eño, tyre’ỹ.

Jesús ndojeguarúi, ndojeréi chugui, oipohanose, omopu’ã yvýgui, opoko hese ha omonguera. Jesús oipota ija jey, oipota oiko opavave apytépe. Ha upévare he’i chupe: tereho tupaópe, tojehecha rekueramaha, ikatumaha reiko jey opavave apytépe, ndeha’ehai avei Ñandejára ra’y. Anive retĩ ndejehegui.

Oimépa reikuaa hína nde che reindy ha nde che irũ tapicha oñemohembýva jepi, oĩreimínteva, oñembo’ykéva, ndaijáiva. Mba’épa oñanduka ndéve ko Jesús ojapóva mávaramo umi ndojehayhúivape, oñe’ẽ, opoko ha oiméva umi oñembotapykuéva ykére.

Pa’i Alberto Luna.