Ñahendu Jesús. Lunes 2º Pascua

Escucha el evangelio y la reflexión en: https://youtu.be/78AZNVYEupQ

25 abril: San Marcos evangelísta ára Marcos 16, 15-20

Upérõ Jesús ojechauka umi 11 apóstolkuérape, ha he’i chupekuéra: – Tapeho opa rupi ko yvy apére ha pehenduka opavavépe ko marandu porã. Umi ogueroviáva ha oñemongaraíva ojesalváta.

Umi oguerovia’ỹva katu oñehundíta. Umi che rehe ojeroviáva heta milágro ojapóne. Che rérape omosẽne hikuái demóño ha oñe’ẽne ñe’ẽ oñeñe’ẽ’ỹvape ha ipyahúva chupekuéra. Ipópe ojagarráne mbói térã ho’u ramo venéno ndojehúi chéne chupekuéra mba’eve. Omoĩne ipo hasývare ha umíva okueráne.

Jesús oñe’ẽmba rire idisípulokuéra ndive, Tupã ohupi chupe yvágape. Upépe oguapy ha’e Tupã ykére. Idisípulokuéra katu osẽ omombe’u pe ohasa va’ekue oparupiete. Ha Ñandejára oipytyvõ mante chupe kuéra. Umi milágro ojapóva rupi ojehecha añeteha
umi mba’e ha’ekuéra he’íva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta ñane hénte kuéra yma guare ha umi ñande ypykue ningo ñande ndajaikuaa jepéi. Oñemombe’únte ñandéve oiko hague ha la ikáso kuéra, iñe’ẽngue hamba’e. Ha ñande jaroviapa umía. Jaikuaa ningo nañanembotavy mo’ãi ñande ru ha ñande sy, nde’i rei mo’ãi ñandéve. Ha ñandéma ave upéi ñamombe’u jaikuaa ha jahecháramo guáicha.

Péicha oiméne raka’e oiko San Marcos ndive. Ha’e niko oscrivi omombe’u haguã raka’e ymaite Jesús rekove, iñe’ẽngue, hembiapo ha ikáso kue. Ha la Márko ningo ndoikuaa jepéi Jesús pe. Ha’e ohendúnte upe San Pedro omombe’u vaekue Jesús rekovére. Omoirũ raka’e Márko la San Pédrope opárupi oikóramo guare opredika ha omombe’u opavavépe Ñandejára Jesucristo ñe’ẽ, hekove, hemimbo’e ha ikásokuéra.

Ha la Márko upérõ ipyahu raka’e ha ojapysaka umi mba’e Pedro he’íva, oñatende porã voi ha oanota paite oikóvo raka’e San Pedro omombe’úva Jesús rehegua, ha ombyaty paite oikóvo raka’e ikuatia ani haguã hesarái.

Márko oiko raka’e avei San Pablo ndive uperire okorre. Omoirũ ichupe heta henda rupi. Oiko jepe ichugui peteĩ misionero vale. Heta mba’e Márko oikuaa tenonderã San Pedro rupi ha upéi katu San Pablo rupi. Ha’e kuéra omombe’úvo oikóvo upérupi umi mba’e Jesús ohasa vaekue ha ombo’e va’ekue oikove aja. Ha péicha Márko ombyaty tapére heta arandu. Ha péicha ou oheja ñandéve ipógui pe Evangelio marangatu San Márko ohai vaekue, ñande jaikuaa porãve haguã Jesús rekove. Ipahápe Márko ojejuka avei Ñandejára rayhupápe.Ou oñemopeteĩ avei upéicha Jesús ndive imanóme.

Oimépa che reindy ha nde che irũ reikuaa nde ave umi cristiano nde válle ha nde róga gua, Ñandejára rayhupápe nembo’e vaekue Kirito rembiasa ha iñe’ẽ, ohechauka va’ekue ndéve Ñandejára rape. Mba’épa la nemandu’avéva ichugui kuéra, iñe’ẽnguégui. Mba’épa upe eguerohoryvéva ichuguikuéra.

Pa’i Alberto Luna.