Ñahendu Jesús Ñe’ẽ. Lunes 5º Pascua

Escucha el evangelio y la reflexión en: https://youtu.be/U8ssCymDLYM

LUNES 5º PASCUA San Juan 14, 21-26

Ohasa mboyvemi Tupã ykére, Jesús he’i hemimbo’e kuérape: Upe ohendu ha ojapóva che ñe’ẽ, ohechauka che rayhu añeteha. Che ru ohayhúta chéve che rayhúvape, ha che avei ahayhúta chupe, ha ajechaukáta chupe.

Judas, ndaha’éiva ku Judas Iscariote, oporandu chupe:— Maéstro, mba’ére piko orévente rejechaukáta, ha nahániri mo’ãi opavavépe.

Jesús he’i chupe:— Upe che rayhúva ojapo che ha’éva, ha che ru ohayhúta chupe. Ha rojúne che ru ndive ha roiko hendive. Pe che rayhu’ỹva katu niko ndojapói che ha’éva. Ko’ã mba’e ha’éva peẽme, ndaha’éi che jehegui reínte ha’éva peẽme. Che ru, che mbou vaekue ñe’ẽ hína ãva.

Ko’ã mba’e ha’e peẽme aime aja gueteri pene ndive. Espíritu Santo katu, pe che ru omboútava che rérape pene pytyvõ haguã, ha’e pene mbo’éta opa mba’e ha pene momandu’áta opa ko’ã mba’e ha’éva peẽme.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

He’i ningo peteĩ purahéi: “Che kamba resa jajái, mi lucero vespertino, nde pópe péina amoĩ che ánga che rekove, emoĩ tojovere tatápe ndacherayhúirõ, maerã piko en este mundo nde rehe’ỹ aikoveseve”… Jesús he’i: “Pe che rayhúva ojapo che ha’éva, ha che Ru
ohayhúta chupe. Ha che Ru ndive rojúne roiko hendive. Pe che rayhu’ỹva ndojapói che ha’éva”.

Pe mborayhu niko añete upe ñanemomýiva, ha upévare San Ignacio he’i oiko haguã ñande hegui Jesús remimbo’e añete, Jesús irũ, jajerure vaerã Ñandejárape oikuaauka haguã ñandéve ita’ýra Jesús pe, jahayhu haguã chupe ñande py’aite guive ha jaguata kyre’ỹ haguã ñande rapicha kuéra ndive ijykére.

“Upe che rayhuha ára ipotypáne la rrósa, oúne la maripósa oanunsia che alegría”, he’i ñande purahéi. Jesús katu he’i: “Che Ru ohayhúta upe che rayhúvape, ha che avei ahayhúta chupe ha ajechaukáta chupe”.

Mborayhu niko upe omohe’ẽva ñande rekove ha ome’ẽva ñandéve pu’aka ñambohasa haguã jehasa asy. Ha mborayhu añete ojekuaa tembiapo rupive. Jesús ohechauka hembiapo rupi pe mborayhu oñandúva, ha ñanemokyre’ỹ ñande avei jahechauka haguã ñane rembiapo rupive jahayhuha ichupe. Espíritu Santo ha’e omboúva rupive ikatu ñande avei jajapo ha’e ojapo haguéicha.

Mba’épa nde ere che irũ, ha nde che reindy. Mba’éichapa nde rehechakuaa umi nde rayhúva añete hápe nde rayhuha. Mba’éichapa nde reipota ojehechauka ndéve mborayhu. Ha mba’éichapa nde ehechauka eporohayhuha. Ha ipahápe, mba’éicha nde ehechauka Ñandejárape nde ehayhu ha ejeroviaha hese.

Pa’i Alberto Luna