Ñahendu Jesús Ñe’ẽ. Domingo V de Pascua

Escucha el evangelio y la reflexión en: https://youtu.be/39AMPZAix-Y

Domingo V de Pascua Juan 14, 1 – 12

Upe ramo pyhare osena aja, ohasa mboyvemi Tupã ykére, Jesús he’i idisípulokuérape: — Ani pejepy’apy. Pejerovia Ñandejárare ha pejerovia avei che rehe. Heta rendaguã niko oĩ che ru rógape. Ha che aha hína ambosako’i haguã peẽme pene rendaguã.

Nda’upéichai rire, namombe’úi vaerã mo’ã peẽme. Ha ambosako’i rire peẽme pene rendaguã, aju jeýta pogueraha che ndive. Péicharõ, peẽ peiméta pe che ahatahápe. Peẽ niko peikuaa voi pe tape peho haguã che ahatahápe.

Tomás he’i chupe: — Mbo’ehára, ndoroikuaái niko moõpa rehóta. Mba’éicha piko aipo ramo roikuaáta pe tape.

Jesús he’i chupe: — Che niko hína pe tape, upe añete ha upe tekove. Che rupi mante ikatu peguãhẽ che ru rendápe. Peẽ chekuaa ramo, peikuaa avei che rúpe. Ha ko’agãite guivéma voi peikuaa chupe, pehechágui peikóvo chupe.

Upépe Felipe osẽ he’i: — Mbo’ehára, ehechaukána oréve nde Ru, upéva iporãtama oréve.

Jesús he’i chupe: — Felipe, aréma niko aiko hague pene ndive, ha piko ne’ĩra chekuaa.

Upe chéve che recháva niko ohecháma che rúpe. Mba’éicha piko péicharõ rejerure chéve ahechauka haguã peẽme che ru. Nderegueroviái piko che peteĩnteha che ru ndive, ha che ru peteĩnteha chendive.

Umi mba’e ha’éva peẽme niko, nda’éi che jehegui reínte ha’éva. Che ru oĩva che pype, ha’e hína upe ojapóva opa mba’e.

Peguerovia ha’e ramo peẽme che peteĩnteha che ru ndive, ha che ru peteĩnteha chendive. Ndachegueroviái ramo umi mba’e ha’éva rupi, che guerovia umi mba’e ajapóva rupi. Añetéko ha’e hína peẽme.

Upe che rehe ojeroviáva, ojapo vaerã avei umi mba’e che ajapóva. Ha tuichave mba’e katu ojapóne, che ahátagui che ru rendápe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Hetáma ningo jakorre ko yvy apére, jaju ha jaha. Heta henda ha heta tape jaikuaa.

Ndajaikuaáiva ñaporandu, ha ñeporandúpe heta vése ñaguahẽ porãiténte avei. Péina
ñahendu Hesu he’i apóstolkuérape ohotaha Ñandejára rendápe oha’arõvo ichupekuéra. Ha osẽ Toma he’i ndoikuaaiha pe tape oguahẽ haguã hendápe. Ñandéicha avei che reindy ha nde che irũ, okañy Tomágui pe tape oguahẽ haguã Ñandejára rendápe.

Ha Jesús he’i ichupe: Che ningo hína upe tape ha tekove añetete. Hesu he’i hína ñandéve ñama’ẽ haguã hese, jahecha mba’épa ha’e ojapo raka’e, jajapo haguã avei ñande upéicha. Upéva hína la ñande rape. He’i ningo San Alberto Hurtado: Ñama’ẽ ñande jerére, ñane rembiapo, ñane irũnguéra, mba’épa ñaikotevẽ, ha ñapensa:

“Mba’épa ojapóne Hesu ha’ete oiméramo hína ko’ápe che aime hápe. Ha pe ñañandúva Hesu ojapotaha, upevaite jajapo ñande.

ÑAÑEMBO’E OÑONDIVE

Ñandejára Hesukrísto, ehechauka ha eñandukami oréve mba’épa rojapo va’erã, roguata haguã nde rape rupi, rohupyty haguã vy’a ha py’aguapy añete nendive. Amén.

Pa’i Alberto Luna.