Ñahendu Hesu Ñe’ê. Sábado IV de Pascua

Escucha el evangelio y la reflexión en: https://youtu.be/_7MmuCkeRmQ

Sábado IV de Pascua

San Juan 14, 7 – 14

Ohasa mboyvemi Tupã ykére, Jesús he’i idisípulokuérape: Peẽ chekuaa ramo, peikuaa avei che rúpe. Ha ko’agãite guivéma voi peikuaa chupe, pehechágui peikóvo chupe.

Upépe Felipe osë he’i: — Mbo’ehára, ehechaukána oréve nde Ru, upéva iporãtama oréve.
Jesús he’i chupe: — Felipe, aréma niko aiko hague pene ndive, ha piko ne’ĩra chekuaa.

Upe chéve che recháva niko ohecháma che rúpe. Mba’éicha piko péicharõ rejerure chéve
ahechauka haguã peẽme che ru. Nderegueroviái piko che peteĩnteha che ru ndive, ha che ru
peteĩnteha chendive. Umi mba’e ha’éva peẽme niko, nda’éi che jehegui reínte ha’éva.

Che ru oĩva che pype, ha’e hína upe ojapóva opa mba’e. Peguerovia ha’e ramo peẽme che peteĩnteha che ru ndive, ha che ru peteĩnteha chendive. Nda che gueroviái ramo umi mba’e ha’éva rupi, che guerovia umi mba’e ajapóva rupi. Añetéko ha’e hína peẽme.

Upe che rehe ojeroviáva, ojapo vaerã avei umi mba’e che ajapóva. Ha tuichave mba’e katu ojapóne, che ahátagui che ru rendápe. Opa mba’e pejeruréva che rérape, che ame’ẽta peẽme. Ha péicha, umi mba’e che ajapóva rupi pehecháta mba’éichapa tuicha che Ru. Che ajapóta oimeraẽ mba’e peẽ pejeruréva chéve.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñande rapicha hembiapo vaívare ningo ja’e: “Ko aña ra’y oikóva”. Ha oime ramo ipochy vaíva, oinupãva hapichápe ha oñe’ẽ vaíva hese ñande ja’e chupe: “Anive nde aña”.

Osẽ vai ramo ñandéve pe jajaposéva ja’e avei: “Aña raitýpe guare”… Upéicha ñande ja’e
hina añágui osẽha opaichagua mba’e vai ha ñande jaiko vai ramo jajoguaha añáme.
Hesu he’i ha’eha Túva Ñandejára ra’y ojapógui umi mba’e porã Ñandejára ombo’éva ichupe ojapo haguã. He’i avei ohecháva ichupe ohechamaha Túva Ñandejárape, ha’e peteĩnteha Túva Ñandejára ndive ha Túva Ñandejára peteĩnteha hendive.

Ñandejára ñande apohare niko ñande apo ijoguaha, ñande apo raka’e ita’ýra Hesu joguaha ramo. Hesu ningo hína upe ñande ryke’y guasu, oiméva Túva Ñandejára ykére, ha ñande ñasẽ ramo hese ningo ijoguaha mante vaerã. Pe tuichave mba’e Hesu he’íva ningo ñande avei ikatuha jajapo umi mba’e porã ha’e ojapóva ha ikatuneha jajapo tuichavéva ave, ñande ha’égui avei ha’éicha, Túva Ñandejára ra’y ha tajýra.

Ha oime ramo péicha jarovia, jahecháramo ñande rapicha jahecha hina Ñandejára
ra’anga añete, Ñandejára ra’y, Ñandejára rajy, Hesukrísto ra’anga, ndaha’éi aña ra’y térã
aña rajy, ndaha’éi aña ra’anga.

Mba’épa che reindy ha nde che irũ umi mba’e porã ehecha ha eñandúva nde pype
ohechaukáva nde ha’eha Ñandejára ra’y ha tajýra. Ha mba’épa umi mba’e porã ehecháva
nde rapichápe ohechaukáva ha’eha Ñandejára ra’y ha tajýra.

Pa’i Alberto Luna.