Ñahendu Jesús. Lunes 6º Pascua

Escucha el evangelio y la reflexión en: https://youtu.be/ZFtdYNDmspQ

LUNES 6º PASCUA San Juan 15, 26 – 16, 4

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape: Che amboúta peẽme Ñandejára Espíritu ha ha’e oikuaaukáta peẽme umi mba’e añeteguáva.

Ha’e pene pytyvõta ha oñe’ẽta che rehehápe. Ha peẽ avei peñe’ẽta che rehehápe, peime haguére che ndive iñepyrũmby guive. Ha’e hína peẽme ko’ã mba’e ani haguã ikangy pende jerovia che rehe. Peñemosẽ va’erã ágã tupaógui. Ha oguãhẽne ára oimérõ pende jukáva he’íne ojapoha Ñandejára rérape. Péicha ojapóne hikuái ndoikuaáigui che Rúpe, ha nda che kuaáigui chéve. Amombe’u hína peẽme ko’ã mba’e, ágã ojehu vove peẽme, pene mandu’a haguã che ha’e va’ekuére peẽme.

Nda’éi vaekue niko peẽme ko’ã mba’e iñepyrũmbýpe, aimégui pene ndive upete guive voi.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Sapy’ánteko ñaime porã, ñande yvytu ha osẽmba rei ñandéve opa mba’e. Ñaimo’ã voi jagueropu’akátava opa mba’e ñane renonderã, ñande py’aguasu, háime javeve. Ha oguahẽ avei ára pohýi, ñane kane’õ, ñane ño, ñanderasy katu. Ñaikotevẽ ñepytyvõ ha ñanemoirũva jajekomi haguã, ani ñande pyho, ja’a ha japytaite.

Oñondive jaguatáramo Ñandejára rapére avei upéicha. Oĩ ára ñanekyre’ỹha ha ñañembyaty vy’apópe, ñamba’apo oñondive, jajapo heta mba’e. Hesakã ñande raperã. Upéi katu tíro pukúpe oguahẽ ára iñypytũha ñande guata. Ndaijatyvéi lo mitã, oguapypa, ikaigue
la hénte kuéra. Ha’ete ku ñandénte la jaiko hatã itereíva.

Upéicha jave ñaikotevẽ avei pu’aka ani haguã jaguapy ha japoi ñande avei ha opa rei upe ñañepyrũ va’ekue. Jesús ohasáma heta mba’e iñirũnguéra ndive. Oikuaa ha’e sapy’ánte ikyre’ỹha hikuái ha ohecháma avei ityre’ỹ jave chugui ikangy ha ikane’õha, ndaipu’akái ijehegui. ha upévare he’i ha’e oho rire omboútaha Espíritu Santo, oipytyvõ ha omoirũ va’erãva ichupekuéra Péva ha’e hína Ñandejára Espíritu, ha’éva Jesús Espíritu.

Pe Ñandejára Espíritu Jesús omboúva hekovia opyta ñane ndive, omombarete haguã ñande py’a ijetu’u jave ha oñanduka haguã ñandéve pe tetia’e ha py’aguapy oúva Ñandejáragui. Ñanemomandu’ávo Jesús ñe’ẽnguére ha ojapóvo ñande hegui Jesús disípulo
ha disípula. Araka’eve nañaneño mo’ãi he’i Jesús. Espíritu Santo ome’ẽ ñandéve pe kyre’ỹ jaipykúi haguã Jesús rape ha pe pu’aka ñaikotevẽva jaguata haguã hérape.

Oime hína siete Ñandejára remime’ẽ porã ome’ẽva ñandéve Espíritu Santo, ñanepytyvõ haguã ñande jeroviápe: umíva ha’e hína: arandu, akã porã, ñemoñe’ẽkuaa,mbarete, mba’ekuaa, Tupã rayhu ha rrespéto Ñandejára ndive. Mávapa umíva apytépe eñandu hína che irũ ha nde che reindy upe eikotevẽvéva hína ko’ãgaite emboguata haguã nde rekove jerovia pópe.

Pa’i Alberto Luna.