Ñahendu Jesús Ñe’ẽ. San Bernabé, apóstol ára

Escucha el evangelio y la reflexión en: https://youtu.be/o3AUkZQDFMs

11 junio: San Bernabé, apóstol ára Mateo 10, 7-13

Upérõ Jesús omondo mboyve umi 12 pe, oñe’ẽ chupekuéra kóicha: Tapeho pemombe’u oguãhẽtamaha hína Ñandejára Rréino. Pemonguera umi hasýva. Pemoingove jey umi omanóva. Peipohano lepróso kuéra, ha pemosẽ umi demóño opavavégui. Peẽme niko oñeme’ẽ reínte péicha pejapo haguã. Ani pejerure oñemyengovia peẽme mba’eve umi mba’e pejapóvare.

Ani peraha pláta, térã pene matularã tapére guarã. Ani ave peraha pembojopyru haguã ao térã pende py rehe guarã, térã yvyra pende popegua. Opa omba’apóva niko oñemongaru va’erã voínte.

Upévare, peguahẽvo peteĩ hendápe tapeho peteĩ pejeroviaha rógape ha upépe pepyta pesẽha ára peve. Ha peguahẽvo, pemomaitei ha pehovasa py’aguapýpe umi upépe oikóvape. Pene moguahẽ porã ramo hikuái, oguapýta hese kuéra pe py’aguapy . Nahánirirõ katu, opytáta pe py’aguapy pende pype.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñane mitã ramo guare ñama’ẽ ñande ryke’y, ñande ru, ñande sy, ñande kakuaarã, tuichavéva ñande hegui rehe. Umi opunteáva tape ha oguatáva ñane renonderã niko ohechauka ñandéve mba’épa jajapo va’erã ha mba’épa naiporãi. Oje’éva voi ñandéve aníke vyresa ha makanáda ere ha ejapo, cháke nde recha hína michĩvéva ha upe nde ere ha rejapo háicha he’i ha ojapóta hína hikuái.

Ko árape ñanemandu’a hína Bernabé apóstol rehe. Peteĩ kuimba’e oikuaa ha ohayhu vaekue Ñandejára Jesucristope, ha oiko vaekue umi Jesús disípulokuéra apytépe. Ndaha’éi ramo jepe umi 12 apóstol reheguáva, ha’e opa ára omoirũ ichupekuéra.

Ñandejára Jesús omano rire Bernabé oikoségui umi apostolkuéra oiko háicha, oheja opa orekóva, ovende ijyvy ha ome’ẽ hepykue oipytyvõ haguã mboriahúpe. Ha upéguive oiko ichugui misionero vale. Omoirũ vaekue San Pablo pe heta henda rupi okorre oñondive omombe’u Ñandejára ñe’ẽ. Ha San Pablo ndive heta tapichápe ohekombo’e Ñandejára rapére ha avei ohasa asy ojoykére hikuái. Tuicha háicha ojevale hesekuéra Ñandejára. Upéva rehe ningo oñehenói avei ichupe apóstol.

Upéi katu Bernabé oraha hendive isobríno San Marco, imitãvéva ichugui. Marco niko upe mboyve ha’e vaekue San Pedro irũ. Heta mba’e oikuaa kuri ichugui Ñandejára Jesucristogui, ha uperire oho oiko misionero itio Bernabé ndive, opunteáva tembiapo ombokatupyryve haguã Marco pe Ñandejára rapére. Jaikuaa niko Marco uperire omboguapy hague kuatiáre Ñandejára Hesukrísto rekove ha iñe’ẽngue, upe evangelio San Marco omombe’úvape. Umiva ha’e ohendu ha oikuaa vaekue San Pedro ha itio Bernabe rupi.

Ehechápa hína che irũ ha che reindy mba’éichapa Ñandejára ñanerenói ha ojevale ñande rehe avei ohechauka haguã tape umi ipyahuvévape. Upéi ágã ha’ekuérama ombo’e haguãicha umi hapykuéri oúvape. Mávapa umi nembo’e va’ekue Ñandejára rape. Ha mávape nde avei embo’e ha emombe’u umi mba’e Ñandejára ohechaukava’ekue ndéve.

Pa’i Alberto Luna.