Ñahendu Jesús. 29 de junio San Pedro ha San Pablo ára

Escucha el evangelio y la reflexión en: https://youtu.be/7DeArXfcJDc

29 de junio San Pedro ha San Pablo ára Mateo 16, 13 – 19

Jesús oguãhẽmbotávoma Cesaréa Filípope, oporandu idisípulokuérape:— Mba’éiko oje’e che rehe upe rupi. Mavaha che piko he’i hikuái.
He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

Jesús oporandu chupe kuéra: — Ha peẽ piko mba’e peje. Mávaiko che.

Ha Simón Pedro he’i chupe: — Nde hína pe Mesías, Ñandejára oikovéva Ra’y.

Jesús he’i chupe: — Ñandejára ta nde rovasa ndéve Simón. Ndejeheguínte ndereikuaái vaerã mo’ãi kuri péva, che ru yvagapegua ndoikuaaukái rire ndéve. Ha ha’eve ndéve Pedro, nde réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese. Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko heta olee ha oñemoarandúva Ñandejára ñe’ẽre ha opa ombojeréva ipy gotyo upe Bíbliape oĩva. Upeichagua vaekue San Pablo, iñarandu vaekue Ñandejára léipe. Ifanátiko vaekue ha’e irreligiónpe ha iñarõ umi Jesús irũnguéra ndive. Oiko omuña ha ohundise Jesús re ojeroviáva guive, pe iglesia ñepyrũmbýpe. Tapére oikóvonte ko Jesús ete voi ohenonde’a ichupe. Tuicha ho’a ojapajeréi ñande ra’y. Ha ojetyvyro rire, Jesús oñe’ẽ ichupe, oñeprende ipóre ha ojapo chugui peteĩ apóstol vale.

Oime avei umi Jesús irũ apytépe itavymíva ha nda ilívro guasúiva. Ndaha’éiva umi oiko itereíva tupao rupi ha mba’e. Upeichagua vaekue San Pedro. Ilápi mbykymi ramo jepe, oiko va’ekue oguata Jesús ndive, ha oho hendive oñehenói ramo guare.

Jaikuaa avei San Pedro tuicha tuicha ipyho ha oñepysanga va’ekue imaéstro rapykuéri oikóvo. Ndaha’éi avei ikuatia porãmbáva ñande socio. Ñandejárante ko omopu’ã jevy jevy mitã Perúpe ha omboguata chupe.

Ndaha’éi hina pe mba’e kuaa rupive San Pablo ohupyty vaekue Jesús pe, ha ndaha’éi avei pe estudio’i ojoko va’ekue San Pédrope oiko haguã Jesús irũ ramo.

Mokõivévagui Ñandejára ojapo karai guasu. Ha omoĩ chupe kuéra horkon mbaretéicha omopu’ã haguã iñakã árikuéra ñande iglesia iñepyrũmbýpe. Tuicha háicha ojevale hesekuéra omyasãi haguã iñe’ẽ oparupiete, oñepyrũvo Jerusalén gui. Mokõivéva oho omohu’ã hekove Roma pe. Upépe ojejuka hikuái. San Pedro oñemosaingo kurusúre ha San Pablo katu oñeakãtrosa. Mokõivéva ojejuka ohayhúgui Ñandejára Jesucristo pe. Ha ome’ẽ hekove hikuái imaéstro ojapo haguéicha.

Ajépa ningo tuichaite mba’e jahecha ñande rapicha San Pablo. Irretovado va’ekue Ñandejára Jesucristo gui. Ha San Pedro. Ipy’a mirĩ va’ekue osegui haguã Jesúspe. Mba’éichapa upéi Ñandejára omopu’ã ha omombarete ichupekuéra ome’ẽ meve hekove hese hápe. Mba’épa reñandu che irũ ha nde che reindy ehechávo ko’ã tapicha rekove.

Pa’i Alberto Luna.