Ñahendu Jesús. Jueves 14º Durante el Año

Escucha el evangelio y la reflexión en:

Jueves 14º Durante el Año Mateo 10, 7 – 15.

Upérõ Jesús he’i idisípulokuérape: Tapeho pemombe’u oguãhẽtamaha hína Ñandejára Rréino. Pemonguera umi hasýva. Pemoingove jey umi omanóva. Peipohano umi lepróso, ha pemosẽ demóño opavavégui. Peẽme niko oñeme’ẽ reínte péicha pejapo haguã. Ani pejerure mba’eve umi mba’e pejapóvare.

Ani peraha pláta, térã pene matularã tapére guarã. Ani ave peraha ao pembojopyru haguã, térã pende py rehe guarã, térã yvyra pende popegua.

Opa omba’apóva niko oñemongaru vaerã voínte. Upévare, peguãhẽvo peteĩ hendápe tapeho peteĩ pejeroviaha rógape ha upépe pepyta pesẽha ára peve. Ha peguãhẽvo, pemomaitei ha pehovasa py’aguapýpe umi upépe oikóvape. Ha pene moguãhẽ porã ramo hikuái, pe py’aguapy toĩ hendive kuéra. Nahánirirõ katu, topyta pende pype.

Oĩ ramo na pene moguãhẽséiva, térã pene renduse’ỹva, pesẽnte upégui ha peityvyro pende pýgui yvytĩmbo. Añete ha’e peẽme, ágã ára pahápe ku Sodoma ha Gomórrape ojehu vaekue vyroitéta hína upe chupekuéra ojehútava rovái.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Avío ha matula ningo ñambosako’íva ñasẽtaramo mombyry jaha. Ñande arétaramo katu plata-mi ñande bolsillo-pe, ha jaraha vaerã avei ñande ao ñambojopyru haguã. Ani jajejopy ha jajecha vai mombyry ñande róga ha ñande rekohágui. Ha ikatúramo katu jahane voi mba’yrúpe, auto, camioneta-pe mba’e.

Jesús niko oikuaa pe ojokuáiva oheka va’erãha mba’éichapa oho ha ou jevýta. Moõpa oguahẽta oke ha okaru haguã hamba’e, ha he’i ani haguã ha’ekuéra ojepy’apy eterei umívare. He’i Jesús omba’apóvape Ñandejára kokuépe oñemyengovia va’erãha voínte, ha ndaha’éi mba’eta rupi Tupã rembiapo osẽ porãvetaha. Ha’e oipota umi ojokuáiva ivevúi ha ani ojerovia pláta, ao porã, mba’yru, tembi’u ha umíva oreko haguére. Tojeroviave Ñandejárare, taipy’a porã ha togueraha ivosápe py’aguapy ome’ẽ haguã hapichápe oguahẽ hárupi.

Jajuhu va’erã niko avei, ha péva ndofaltái, nohenduséiva Ñandejáragui hérante jepe oñemoherakuãvo. Ha oime va’erã ipochýva voi umi hembijokuái ndive. Ani ñande ñandepochy hendive kuéra upévare, he’i Jesús.

Jajetyvyrónte pe pochýgui yvytimbóicha ha ani jaheja oguapy ñande rehe. Ágã Ñandejára oikuaáne mba’épa ojapo ichuguikuéra. Ha ndépa che reindy ha nde che irũ, mba’erã rekarkula Ñandejára ojevaleséne haguã nde rehe. Mba’erãpa oiméne nde jokuaise. Mba’épa
reñandu.

Pa’i Alberto Luna.