Ñahendu Jesús. María Magdalena ára

Escucha el evangelio y la reflexión en: https://youtu.be/jYH0kct1gd4

22 julio: María Magdalena ára Juan 20, 1. 11 – 18

Domigo pyharevete, pytũ ramo hína gueteri, María Magdaléna oho pe itakuápe Jesús oñeñotỹ haguépe. Ojuhu ojepe’a hague pe ita ombotýva pe itakua juru.

María opyta okápe pe itakua juru ypýpe, ojahe’o hína upépe. Upéi katu ojayvy ha omaña pe itakua ryepýpe, ha ohecha mokõi Ñandejára ánhel ijao morotĩmbáva oguapýva hína upe Jesús retekue oĩ haguépe. Peteĩ oguapy pe iñakã rendaguépe ha pe ambue katu ipy gotyo.
Umi Ñandejára ánhel oporandu Maríape: — Mba’éreiko ne rasẽ.

He’i ha’e: — Ogueraha niko hikuái che Járape, ha ndaikuaái moõpa oheja.

Upéva he’ipávo, ojere ha ohecha Jesúspe oĩva hína upépe. María katu ndoikuaái chupe.

Jesús oporandu chupe: — Mba’éreiko ne rasẽ. Mávape piko reheka.

María oimo’ã pe kokuére oñangarekóva pe oñe’ẽva chupe hína. Osẽ he’i chupe:— Nde, che karai, nde eraha rire na ere chéve moõpa reheja ra’e, ha taha ipiári.

Upépe Jesús ohenói chupe héra rupi: — María.

Ojere María he’i chupe: — Mbo’ehára.
Jesús he’i chupe: — Anivéma epoko che rehe. Ne’ĩra gueteri niko ajupi jey che ru rendápe. Tereho emombe’u che ryvy kuérape aha jeytamaha che Ru, ha’éva pende Ru rendápe, che Tupã, ha’eva ave pene Tupã, rendápe.

María Magdaléna oho ha omombe’u Jesús disípulo kuérape ohecha hague Ñandejára Jesucrístope. Omombe’u avei chupe kuéra umi mba’e Jesús he’i vaekue chupe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Kuña nguéra niko umi oimevéva jepi tupao, komunida ha kapíllakuéra rupi. Omomýiva tembiapo, omoñembo’éva mitã, ha omoirũva pa’i ha obispokuérape. Ha jepevéramo hetave kuña ñande tupaokuéra rupi, umi omandáva ha he’íva oje’e va’erã kuimba’e meme.

Sa’i oñehendu kuñanguéra ñe’ẽ ha oñeme’ẽ ichupe omotenonde haguã tupao rembiapo. Oiko háicha avei ñande rógakuéra rupi, ñande táva ha ñane retãme. Kuñanguéra ogapýpente ojeheja, kosináme ha mitã nguéra ndive, upérupinte topyta.

Jesús niko ohenói va’ekue María Magdalénape ha hetave kuñáme, umi apostolkuéra ndive, oiko haguã ijykére iñirũramo. Ha ñahendu mba’éichapa Magdalénape raẽve ojechauka Jesús oikove jevy rire. Ha Jesús ojevale hese oikuaauka haguã upéva ambue apóstolkuérape.

Tekotevẽ hína ñambojeroviave ha ñahenduve kuña nguérape ñande Iglésiape. Omyakã haguã tembiapo, kuimba’ekuéra ykére, peteĩ ñe’ẽme. Ñañombojojave, che irũ ha che reindy. Jesús ojapo haguéicha omoingévo apóstolkuéra ykére kuñanguéra, oguatáva hendivekuéra. Hendivekuéra omombe’úva Ñandejára ñe’ẽ, María Magdalénaicha.

Pa’i Jasy.