LECTURAS MIÉRCOLES SEMANA XVIII TO
5 agosto, 2026LECTURAS VIERNES SEMANA XVIII TO
7 agosto, 202606 DE AGOSTO: LA TRANSFIGURACIÓN DEL SEÑOR
LECTURA PETEÎHA:
Ko’ágã ñahendúta Tupã Ñandejára ñe’ẽ Daniel arandukápe oĩ háicha 7, 9-10. 13-14
Ama’ẽve ha ahecha oñemoĩha upépe guapyha ha peteĩ ikarai tujami ahecha oguapy ipype.
Ijao morotĩ asy, iñakã rague katu ovecha rague potĩcha.
Upe guapyha ha umi irruéda katu tatáicha ojepota.
Ysyrýicha tata osyry henonderã. Hetaiterei umi ojapóva ha’e oipotáva, ha hetaitereive umi henondépe oñembo’ýva.
Umi oporombojovakéva oguapývo umi kuatiañe’ẽ ojepe’a. Ahecha hína ko’ã mba’e pyhare, peichahágui nte,
Ahecha vaicha ou arai apytépe peteï ojoguáva yvypórape.
Ahecha oho pe karai oĩha gotyo, ha upéi ojereraha hendápe. Ha oñeme’ẽ ichupe pokatu, teko mimbipa ha oporosãmbyhy haguã. Ha opaichagua tetãgua, opaichagua ñe’ẽme oñe’ẽva ojapo ha’e he’íva. Ipokatu opa árape guarã, ha ha’e oporosãmbyhyhápe noñehundi mo’ãi araka’eve.
Tupä Ñandejára Ñe’ẽ.
SALMO ÑEMBOHOVÁI 97, 1-2. 5-6. 9
Opavave: Nde ore Jára reisämbyhýva yvágapy guive ko yvy ári.
Ñandejára mburuvicha guasu hína. Ko yvy tuichakue tovy’a,
umi yvy y mbyte rupi oĩva tovy’a.
Arai ypytũ oñuãmba ichupe,
teko hekopegua ha teko joja iguapyha ramo oguereko. O.
Umi yvyty araitýicha hykupa Ñandejára renondépe ha’e opa ko yvy Jára hína,
yvága heko joja omoherakuã ha maymáva ohechaheko mimbipa. O.
Nde ore Jára yvaga apýpe gua, reime opa ko yvy ári,
opa Tupãnguéra ári. O.
LECTURA MOKOÎHA:
Ñahendúta Tupã Ñandejára Ñe’ẽ San Pedro aranduka mokõihápe oĩ háicha 1, 16-19
Che pehenguekuéra:
Umi mba’e romombe’u va’ekue peëme Ñandejára Jesucrísto pokatu rehegua ha mba’éichapa ha’e ou jevýta, nda ha’éi ñe’ẽ rei ore akãgui roguenohẽva.
Ore voi rohecha va’ekue ore resa tee rupi Jesucrísto pokatu. Ore roime va’ekue upépe Tupã, Itúva ohechauka ramo guare Jesucrísto mba’e guasuha. Rohendu va’ekue Tupã oñe’ẽ ramo ichupe ha he’i: “Kóva ha’e che ra’y ahayhuetéva, che aiporavo va’ekue”. Orete voi rohendu va’ekue pe yvágagui oñe’ẽva, roime jave Jesucrísto ndive pe yvyty marangatúpe.
Péicha ore rohecha, hekoitépe ojehuha umi mba’e maranduhára kuéra he’i va’ekue. Ha iporã va’erã perovia. Upéva niko ha’ete ku mba’e rendy pytũmbýpe ohesapéva, iñapysẽ meve ko’ẽtĩ ha opu’ã mbyja ko’ẽ ohesape pende py’apy.
Tupã Ñandejára Ñe’ẽ.
ALELUIA Mt 17 5c
Aleluia.
Kóva hína che Ra’y ahayhuetéva, che aiporavo va’ekue.
Pehendu ichupe.
Aleluia
EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 9, 28b-36
Jesús he’i rire ko’ã mba’e, oho peteï yvyty ru’ãme oñembo’e haguã ha ogueraha hendive Pedro, Santiago ha Juánpe. Oñembo’e aja hína, hova iñambuepa ha umi ijao morotĩ sakã ha ojajaipa. Ha ojekuaa mokõi kuimba’e oñomongetáva hendive.
Umíva Moisés ha Elías, omimbipáva avei hikuái ha oñe’ẽva Jesús ohotahare ko yvy árigui, ojehútava Jerusalénpe. Hopehýi eterei ramo jepe, Pedro ha iñirũnguéra ndokéi, ha ohecha hikuái Jesús mimbipa ha umi mokõi oĩ va’ekue hendive. Umi kuimba’e ohótama jave, Pedro he’i Jesúspe:
Mbo’ehára, iporãite niko ikatu rehe ñaime ko’ápe. Reipota ramo ajapóta peëme pene rendaguã, peteï ne mba’erã, peteï Moiséspe guarã ha Elíaspe guarã avei.
Pedro katu ndoikuaái pe he’íva. Pedro oñe’ẽ aja, ou peteĩ arai omimbipáva ha ojaho’i ichupekuéra. Ha ojechavo pe arai apytépe, okyhyje hikuái. Pe araígui oñehendu peteï ñe’ẽ ha he’íva: “Kóva ha’e che Ra’y, che aiporavo va’ekue. Pehendu ichupe”. Oñehendúvo upe ñe’ẽ, Jesús opyta ha’eño. Ha ha’e kuéra oguerokirirĩ umi mba’e, ha umi árape avavépe nde’íri umi mba’e ohecha va’ekue.
Ñandejára Jesucrísto Ñe’ẽ.