Ñahendu Jesús Ñe’ẽ. Viernes 20º Durante el Año

Escucha el evangelio y la reflexión en: https://youtu.be/8LfUbU5DjBI

Viernes 20º Durante el Año Mateo 22, 34 – 40

Upérõ umi fariséo ohecha kuaávo Jesús ojuru mboty hague saduséokuérape, oñembyaty hikuái ha oho Jesús rendápe. Peteĩva, Moisés léi oikuaa porãva, ombopakova pireséva Jesúspe oporandu chupe: — Mbo’ehára, Ñandejára mandamiéntokuéra apytégui piko máva hína pe tuichavéva.

Jesús he’i chupe: — Tenondegua he’i, “Ehayhu Ñandejárape nde py’aite guive, ne ánga ha ne apytu’ũ ruguaite guive”. Kóva hína pe tenondetegua ha pe tuichavéva.

Upéva rire oúva ojoguánte avei chupe, ha he’i kóicha: “Ehayhu nde rapichápe nde rejehayhuháicha”. Ko’ã mokõi mandamiénto ári oguapy hína opaite mba’e Ñandejára Ñe’ẽme oĩva.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Ikatúko ñande sapy’ánte ñañemboja Ñandejára, Tupãsy ha umi ñane sántokuérare, ndaha’éi katuete ñamoĩségui ñande rekove hapépe. Jahánte jajevale. Ha’ekuéra ojapo haguã ñandéve upe jaipota háicha, ha ñaikotevẽ háme hesekuérante toĩ ñandéve hikuái. Upévarãnte ñahenói ha jajepokã hese kuéra ha upéi katuamóntema.

Ko’ápe niko San Mateo omombe’u ñandéve ouha umi fariseo, Ñandejára léire oñemoarandúva, oúva ombopakova pirese Jesús pe. Ndaha’éi py’a porãme oñembojáva ohendúvo ichupe, ndaha’éi iñe’ẽrendútava. Ipy’a mokõi katu ha iñensuguy oúvo.

Ou oporandu gua’u Jesús pe mavaitévapa umi léi eta apytépe upe tekotevẽva oñemomba’e ha ojejapo. Ha Jesús ojagarra porãnte ichupe kuéra. Ha upe jave ñanembo’e pe tekotevẽvéva jareko ñande resa renondépe ha’e jahayhu Ñandejárape ñande py’aite guive ha upéi katu jahayhu ñande rapichápe ñande jajehayhu háicha.

Péva ha’éta hina pe imáta, ha upégui katu osẽta hína umi hakã ha hogue ijeheguíntema. Umíva ha’éta hina umi léi sa’i, ani ñamonda, ani ñande japu ani ñanetie’ỹ, jahayhu ñande ru ha ñande sy, ani jajapo avavére ndajaipotáiva ojejapo ñande rehe, ha mba’e.

Ñandejára ha ñande rapicha rayhu noiméiramo añete ñande pype katu ñande rekove naisimiéntoi ha ndaideprovéchoi avavépe. He’íva ku San Pablo umi Corinto guápe, ndajarekói ramo mborayhu ñande pype mba’evete asy hína ñande. Tajajapo la jajapóva, tañande py’aguasu ha tañandekatupyry, tojepopetepa ñandéve opavave, tañame’ẽ jepe ra’e ñande rete oje hapy haguã tatápe, tañañe’ẽ kuaa campana púicha ha tañane arandu rasa, ndajaporohayhúiramo, mba’evete ndajavaléi.

Mba’étepa che reindy ha nde che irũ ndéve guarã hína pe mba’e guasuvéva Ñandejára renondépe, upe ndokañýi vaerãva nde hegui. Mba’épa reñandu.

Pa’i Jasy.