LECTURAS MIÉRCOLES VIGESIMO PRIMERA SEMANA

LECTURAS MIÉRCOLES VIGESIMO PRIMERA SEMANA

PRIMERA LECTURA

Ñahendúta Tupã Ñandejára Ñe’ẽ San Pablo ohai va’ekue Tesalónica guápe 3, 6-10. 16-18

Ore pehẽngue kuéra, rojerure peẽme pejei haguã oimeraẽva ñane pehẽngue omba’apose’ỹvagui, ha ndoikóiva ore pombo’e haguéicha. Peikuaa niko mba’épa pejapo va’erã peiko haguã ore roiko haguéicha: ore niko ndoroikói va’ekue pende apytépe romba’apo’ỹre, ha ndoro’u reíri va’ekue avave rembi’u.

Upéva rangue romba’apo va’ekue ára ha pyhare, ani haguã ore pohýi peẽme. Ikatu ramo jepe rojerure ra’e peẽme ore pytyvõ haguã, romba’apo va’ekue rohechaukávo peẽme mba’éichapa peiko va’erã. Roime ramo guare pene ndive niko ro’e va’ekue peẽme kóva: Omba’apose’ẽva tokaru’ỹ.

Ha Tupã Ñandejára oporombopy’a guapýva, ha’e voi ta pene mbopy’aguapy opa ára ha opa hendápe. Tupä Ñandejára toĩ pene ndive.
Che, Pablo, ahai peẽme ko che maitei che po ite rupi. Péichante voi amoĩva jepi che réra opa kuatiañe’ẽ che ajapóvare. Ñandejára Jesucristo tohekuavo ipytyvõ pende ári.

Tupã Ñandejára Ñe’ẽ.

SALMO ÑEMBOHOVÁI 127, 1-2. 4-5

Opavave: Revy’a va’erã Tupã Ñandejára rehe rejerovia ramo.

Revy’a va’erã Tupã Ñandejára rehe rejerovia ramo,
ha reiko ramo ha’e oipota háicha.
Nde ry’ái repykuégui rekarúne, revy’áne, ha opa mba’épe resẽ porãne. O.

Kóicha ojehovasáta upe Tupã Ñandejára rehe ojeroviáva.
Tupã Ñandejára ta nde rovasa Sión guive reikove aja pukukue.
Reikovéta rehecha haguã mba’éichapa Jerusalén opu’ã. O.

ALELUIA1Jn 2, 5

Aleluia.
Tupã Ñandejára mborayhu oikopaite oiko haguäicha,
umi oiko ha ojapóva Ñandejára Jesucristo ñe’ẽ.
Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Mateo omombe’u háicha 23, 27-32

Upe ramo péicha he’i Ñandejára: Pejererekóke peẽ Moisés rembiapoukapy mbo’eha ha peẽ fariséo rova mokõi! Peẽ ha’ete umi omanóva oñeñotỹha renda, morotĩ porãva okáguio, hyepýguio katu henyhẽ kãnguekuégui ha opaichagua mba’e ky’águi. Péicha avei peẽ. Pende reko porã vaicha pende apéguio, pende ryepýguio katu pene renyhẽ japu ha ñañágui.

Pejererekóke peẽ Moisés rembiapoukapy mbo’eha ha peẽ fariséo rova mokõi! Peẽ pemopu’ã umi maranduhára omano va’ekuépe guarã oñeñotỹ haguã, ha pembojeguapa umi mandu’arã pemopu’ãva imarangatúva rekevekuére.

Upéi katu peje: “Roikove rire ore ypy kuéra oikove ramo guare, ore ndorojukái va’erã mo’ã umi maranduhára kuérape.” Péicha peñe’ẽvo, pehechauka peĩha voi umi maranduhára jukahare ñemoñare. Pemoguahẽ hu’ãme aipo ramo, pende ru ypy kuerakue omoñepyrũ va’ekue.

Tupã Ñandejára Ñe’ẽ.