Ñahendu Jesús Ñe’ẽ. Domingo 27º Durante el Año

Escucha el evangelio y la reflexión en: https://youtu.be/xULgl3ioXI8

Domingo 27 Durante el Año Ciclo C. Lucas 17, 3b – 10

Upérõ Jesús he’i hemimbo’ekuérape: Nde rapicha ojapo ramo ivaíva, emongavaju. Ombyasy ramo, eheja rei chupe. Ha oimérõ py’ỹi etereíma hembiapo vai oikóvo ne ndive, ou ramo ombyasy nerenondépe, eheja rei chupe.

Umi apóstol he’i Ñandejára Jesúspe: — Emombaretevéna oréve ore jerovia.

Jesús he’i chupekuéra: Oimérõ pende jerovia michĩ kytomi ramo jepe, mostása ra’ỹicha, peje kuaáta ko yvyra mátape: “Ejehapo’o ha tereho eñembo’y amo y mbytépe”, ha oikóta upe pejéva.

Ne rembiguái og̃uahẽvo oúvo ñúgui térã ne rymbakuérare oñangareko hágui, piko eréta chupe, “Eiképy jaguapy ha jakaru”. Nahániri. Eréta chupe, “Ejapóke chéve che karurã. Ha upéi emoĩ chéve mesápe ha’u hag̃ua. Ág̃a upe rire ekaru kuaáne”. Ha upéi ave, ndaipóri
aipo jeguerohory ha mba’e chupekuéra upe hembiapo ojapo haguére. Péicha va’erã avei peẽ. Ág̃a peikopa vove pene rembiapópe Ñandejára peg̃uarã, peje vaerã, “Tembiguái reimínte niko ore, ha rojapo vaerãvante voi rojapo”.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe ojerovia’íva oha’ã’i, ndojepoipái, ipyta ryrýi. Mombyrymi guivénte opyta oma’ẽ, ndoikéi voi kánchape. Pe ojerovia añetéva katu ojepoi paite, ojeity voi tembiapópe oheka ha oha’ãvo upe oipotáva.

Apóstolkuéra, ñandéicha avei, oñandu ijetu’u ichupekuéra pe Ñandejára rapykuéri jeiko, ha upévare ojerure Jesús pe omongakuaa haguã ijerovia. Jesús katu he’i ichupekuéra natekotevẽi tuichaiterei pe jerovia. Jajepoínte va’erã kánchape, ani ñande pyta ryrýi.
Ndaha’e mo’ãi hína ñande jerovia, michĩ térã tuicháva, upe omba’apótava. Nahániri.

Ñandejára hína amo ipahápe upe ohupytykátava ñandéve upe ñaha’ãva hérape. Ñane Patrón hína la ojevaleséva ñande rehe, ñande ha’éramo jepe tembiguái jerovia’i arruinado. Ñande jahánte va’erã hese.

Ha upéi ave ñande vai vaínte jajapóva ñane rembiapo, piko mba’ére gua’u ñande pochyetereíta ñande rapicha ojavýramo. Ñande avei niko che irũ ha che reindy ñande fayuto ha ndaijái ñandéve ñane tĩpu’ã ha ñañemomba’e guasuse Ñandejára ha avave renondépe. Ha upévare Jesús ñanembo’e ñane paciencia va’erãha ojuehe, ñañopytyvõ, jahechakuaa ha jaheja rei ojupe ñande falla.

ÑAÑEMBO’E OÑONDIVE

Ñandejára Ore Ru, nde niko ore Patrón hína ha ore nerembijokuái. Ore pytyvõmíkena ani haguã rojopyeterei ore irũnguéra ndive nde rehenóiva omba’apo haguã ore ykére. Amén.

Pa’i Jasy.