DOMINGO 1 DE ADVIENTO

DOMINGO 1 DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 33, 14-16

Tupã Ñandejára he’i: “Oguahẽta ára ajapotahápe che ñe’ẽ ame’ẽ va’ekue ahovasataha Israel ha Judá guápe. Upe ára oguahẽvo, Davídpe ame’ẽta ñemoñare tee omoĩtava teko joja ha teko heko pegua upe tetãme.

Upe ramo Judá oikóta py’a guapýpe ha Jerusalén kyhyje’ỹ rehe. Ha oñembohérata: ‘Tupã Ñandejára, ñande reko joja’.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 24, 4-5a. 8-10. 14

Opavave: Ñandejára che anga ojesaupi nde rehe.

Ñandejára, ehechauka chéve umi nde rape,
ha umíva rupi che sãmbyhy.
Che mbo’e umi mba’e añeteguáva.
Ndéko hína che Jára, ha upe che renohẽva jejopy vaígui. O.

Ñandejára niko imba’e porã ha imarangatu,
upéva rehe oheko mbo’e heko vaívape.
Imboriahúvape oisãmbyhy ani haguãtei ojavy,
ha hápe rehe ichupekuéra omboguata. O.

Ñandejára rapekuéra niko mborayhu ha teko jerovia,
ko’ã mba’e ohupity umi hembiapoukapy ojapóvape.
Ñandejára ojehayhuka umi ichupe omomba’évape,
ha ichupekuéra oikuaauka hembiapoukapy. O.

LECTURA MOKÕIHA:
Ko’ágã ñahendúta kuatia ñe’ẽ peteĩha San Pablo ohai va’ekue Tesalónica guápe 3, 12__ 4,2

Che pehẽnguekuéra: Ñandejára tapene mongakuaa ha tapejoayhuve ha tapehayhuve pende rapichakuérape ára ko’ẽ rehe, ore pende rayhu háicha.

To mombarete pende py’a, ta pene momarangatu ha ta pene mboheko potĩ Ñandejára ñande Ru renondépe, oúvo Ñandejára Jesús, opavave Ñandejára mba’éva ndive. Ha ko’ágã rojerure ha ro’e peẽme Ñandejára Jesús rérape: ta pekakuaave ára ko’ẽ rehe pe teko kuaa peikuaa va’ekue ore heguípe, ovy’a haguã Ñandejára, pejapo háichama hína.

Peẽ niko peikuaáma umi ijapopyrã rome’ẽ va’ekue peëme Ñandejára Jesús pu’aka rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Sal 85, 8
Aleluia.
Ore Jára, ore renohẽva jejopy vaígui, ore mopu’ã jevýna ha anive nde pochy ore
ndive.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 21, 25-28. 34-36

Upe ramo Jesús he’i idisípulo kuérape: Ára paha oguãhẽ vove, heta mba’e ojehu’ỹva jahecháta kuarahy, jasy ha mbyja kuéra rehe. Opa tetã rupi umi héntekuéra ipy’a tarovapáne.

Y katu ipochypáne opa rupi ha hyapu omondyipáne opavavépe. Hénte kuéra ipy’a manombáne kyhyjégui, ohechávo umi mba’e ojehúva. Yvága katu okuchupa ha oguararáne.

Umíva umi mba’e pehecha vove, che recháta chéve ajúva hína arai ári mburuvicha guasúicha. Ko’ã mba’e ojehu vove, pemombarete pende jerovia. Ñandejára ipya’éta pende salva haguã. Peiko kuaáke. Ani pekaru ha peka’úvonte peiko, térã pejepy’apy peikóvo mba’épa
penohẽvéne pende rekovégui. Cháke ára paha ho’áne pende ári ñuhãicha.

Avavete yvy ári oimo’ã’ỹ jave niko oúne ágã. Peñembosako’íke aipórõ. Peñembo’e ára ha pyhare, ikatu hag̃uaicha peropu’aka opa ko’ã mba’e. Péicharõ ikatúta avei peime che ndive.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.