LECTURAS DEL DOMINGO PRIMERO DE ADVIENTO

LECTURAS DEL DOMINGO PRIMERO DE ADVIENTO

LECTURA PETEÎHA

Ko’ágã ñahendúta Tupã Ñandejára ñe’ẽ Isaías arandukápe oĩ háicha 2, 1-5

Upérõ Isaías Amós ra’y ohecha va’ekue, Judá ha Jerusalénpe oikótava. Ojehúta ágã ára pahápe: Yvyty oĩháme Ñandejára Róga, yvytykuéra ru’ãme opyta hatãta ha opaite yvytýgui ijyvatevéta.

Opa tetã hese oñembyatýta. Heta tetã ijatýta ha he’íne oúvo: “Jaha jajupi Ñandejára yvytýpe, Israelgua Tupã Rógape, ohechaukáta ñandéve hápe ha upe rupi jaguatáta”.

Sióngui osẽta Ñandejára rembiapoukapy Jerusaléngui katu iñe’ẽ. Tupã ombojovakéta opa tetãnguérape,ha omoĩ porãta ojoavýva ijapytépekuéra, kyse pukúgui ojejapóta arádo, ha kyse yvukúgui machéte.

Ndaipóri mo’ãvéima ñorairõ, avavépe noñembo’evéima mba’éichapa oñorairõ va’erã. Néike, Jacob rogagua! Jaguata katu Ñandejára ohesapeha rupi!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 122, 1-2. 4-6
Opavave: Vy’ápe jaha tupaópe.

Avy’aite chéve oje’e ramo: “Jaha tupaópe”. Jerusalén!
Ne rokẽmema roñembo’y. O.

Upépe ojupi Israel ñemoñareguakuéra,
Ñandejára réra omomba’e guasúvo,
Upépe oguapy mburuvicha guasu David rogagua,
teko jojápe oporombojovake haguã. O.

Hi’ãite pejerure py’aguapy Jerusalenpe guarã
Kyhyje’ỹme toiko umi nde rayhúva
Py’aguapýpe tojeiko nde rekohápe,
ha mburuvicha guasu rógape”. O.

Che ryke’ykuérape ha che irũ rayhupápe
ajeruréta: “Py’a guapy ndéve guarã”.
Tupã Ñandejára róga rehehápe añembo’éta terehupity vy’a”. O.

LECTURA MOKÕIHA

Ñahendúta Tupã Ñandejára Ñe’ẽ San Pablo ohai va’ekue Roma guápe 13, 11-14a

Che pehenguekuéra: Peẽ pehechakuaa, mba’éichapa peiko are guivéma, ha oguahẽma ára pepayhápemaha, ko’ágã niko ñane aguĩve Ñandejára mborayhúgui iñepyrũháme guarégui, jarovia ñepyrũ ramo guare pe marandu pyahu.

Pyhare pytéma, ha hi’aguĩma ko’ẽ. Upéva rehe, jajapove’ỹ umi pytũmby rehegua tembiapo ha pemonde ao ojajaipáva, ku oñorãirõtava omonde ramoguáicha ao omo’ãva hete. Peiko teko potĩme, ára ko’ẽ porãme guáicha. Anive pekaru rasa ha peka’u, anive pende tajasu ha peiko pene akã rehe, anive peñorairõ ha peipotapa pejuhúva.

Upéva rangue, peñemonde Ñandejára Jesucrístogui ha ani pehekátei umi tembipota vai perekóva yvypóra pende rekópe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Sal 85,8
Ore Jára, ore poriahuverekókena ha ore renohẽ jejopy vaígui.

EVANGELIO
Marandu porã Ñandejára Jesucrísto rekove ha hemimbo’e San Mateo omombe’u háicha 24, 37-44
Opavave: Romomba’e guasu ndéve, Ñandejára.

Upérõ Jesús he’i idisípulo kuérape: Ojehu haguéicha umi árape Noé oikove ramo yvy ári, upéicha ojehu vaerã avei che aju jeyha ára.
Umi árape ama guasu mboyve, opavave oiko vaekue okaru, omboy’u ha ñemendápe, Noé oike peve pe kanóa guasúpe. Ha upéi oimo’ã’ỹhágui, ou pe ama guasu ha ohundipa opavavépe. Péichata avei che aju jey vove.

Upéva upe árape, mokõi kuimba’e oĩta hína oñondive ñúme, peteĩ ojereraháta ha pe ambue katu ojehejáta. Mokõi kuña oñembisóta hína, peteĩ ojereraháta ha pe ambue katu ojehejáta.

Pejesarekóke aipo ramo, ndapeikuaái hína araka’etépa oúta pende Jára. Perekóke kóva pene akãme: Peteĩ óga jára oikuaa ramo araka’etépa oikéta hógape mondaha, ha’e ndoke mo’ãi ha ndoheja mo’ãi avavépe oike hógape omonda haguã chupe.
Upévare, peẽ avei pejesareko vaerã. Peimo’ã’ỹve jave niko che aju jeýta.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.