LECTURAS DEL MIÉRCOLES 04 DE DICIEMBRE

LECTURAS DEL MIÉRCOLES 04 DE DICIEMBRE

Primera lectura:

Ko’ágä   ñahendúta Tupã Ñandejára ñe’ẽ Isaías arandukápe oĩ háicha                                          

25, 6-10a

Yvyty Siónpe Tupã Ñandejára ipu’akapáva ombosako’i tetã nguérape guarã karu guasu oĩháme tembi’u he ha vino he’ẽ, so’o kyra ha vino poravo pyre.

Ko yvytýpe oipe’áta Tupã Ñandejára ahoja hũ ojaho’íva tetã nguéra.

Tupã Ñandejára oipe’áta ñemano, noñemano mo’ãi araka’eve, opa rupi omokãta tesay ha oipe’áta yvy árigui ñemotĩ onáva hetã guáre.

Tupã Ñandejára he’i péicha. Upe árape oje’éta: “Kóva hína ore Tupã, hese rojerovia ha ivaívagui ore pe’a.

Javy’a, ñande rory, ha’e ñane renohẽ jejopy vaígui.”

Tupä Ñandejára ipópe omo’ãta yvyty Sión.

Tupã Ñandejára Ñe’ẽ.

SALMO ÑEMBOHOVÁI                         22, 1-6

R. Opa ára aikovéta TupãÑandejára rógape.

Tupã Ñandejára che rerekua, mba’eve naikotevẽi.

Ñu rovyũ asýpe che mombytu’u,

y satĩ ypýpe che moguahẽ.

Che mombarete jevy. R

Tape hekópe guáre che reraha, héra rehehápe.

Ahasa ramo jepe ka’aguy ypytũ rupi,

ndakyhyjéi chéne, nde, che Jára, reimégui che ndive:

nde yvyra jekoha, nde rehe che mbojerovia. R.

Karu guasu chéve rejapo,

umi che rayhu’ỹva rovake;

che akãre reñohẽ mba’e ryakuã asy,

ha upe hay’uha remyenyhẽ chovi. R.

Ne mborayhu ha ne remime’ëte che moirü,

rehechauka chéve aikove aja pukukue,

ha nde rógape Tupã Ñandejára, aikóne opa árape. R.

ALELUIA

Aleluia.

Tupã Ñandejára ou oipysyrõ haguã hese ojeroviávape.

Ovy’a ite umi oñembosako’íva osë haguã hendápe.

Aleluia

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha    15, 29-37

Upe ramo Jesús osẽ ha oho yguasu Galilea rembe’ýpe. Ojupi peteĩ yvytýpe ha upépe oguapy. Ha heta umi oguahẽva hendápe, ogueraháva hendive kuéra, umi ikarẽva, ohecha’ỹva, iñe’ẽngúva, ijypíva ha opaichagua hasývape.

Umívape omoĩ joa hikuái Jesús renondépe, ha ha’e omonguera ichupekuéra. Ha opavave ohecha ramoite mba’éichapa umi iñe’ẽngúva oñe’ẽ jevy, ijypíva okuera, ikarẽva oguata porã, ha ohecha’ỹva ohecha jevy. Ha oñepyrũ omomba’e guasu hikuái Tupã Israel Járape.

Jesús ohenói hemimbo’ekuérape, ha he’i ichupe kuéra: Aiporiahuvereko niko ko’ãvape. Ojapóma niko mbohapy ára oĩ ko’ápe che ndive, ha ndoguereko véima mba’eve ho’u haguã. Namondoséi hógape ñembyahýire, ani ágã tapére ipy’a mano mba’e.

Hemimbo’ekuéra katu he’i ichupe: Mba’éicha piko jajuhúta tembi’u ñamongaru haguã opavavépe. Ko’a rupi niko ndaipóri avave oikóva.

Jesús oporandu ichupekuéra: Mbovy mbuja piko pereko?

Ha’ekuéra he’i ichupe: 7, ha pira mbovymi.

Upépe Jesús omboguapy yvýpe opavavépe, ha ojapyhy ipópe umi 7 mbuja ha umi pira, ha oñembo’e Tupã Ñandejárape ohovasa haguã. Upéi oipehe’ã umi pan ha ome’ẽ hemimbo’e kuérape, ha ha’ekuéra ome’ẽ opavavépe. Ha okaru hikuái hyvatã meve. Ha umi hembýva omboaty 7 ajaka renyhẽ.

Ñandejára Jesucristo Ñe’ẽ.