DOMINGO DE PENTECOSTÉS

DOMINGO DE PENTECOSTÉS

LECTURA PETEÏHA:
Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 2, 1,11

Oguahẽvo Pentecostés, opa ogueroviáva ijaty peteï hendápente. Upeichaháguinte oñehendu peteï tyapu guasu yvágagui oúva, yvytu hatã oipejú ramo guáicha. Ha omyenyhẽmba pe óga oĩháme hikuái. Ha ohecha hikuái ku tata rendýicha oguejýva peteï teĩ hi’árikuéra.

Ha opavave henyhẽ Espíritu Sántogui, ha oñepyrũ oñe’ẽ ñe’ẽ ambuépe, Espíritu Santo omoñe’ẽ háicha ichupekuéra.

Oiko upe ramo Jerusalénpe heta Israel guáva ombojeroviáva Tupäme, ou va’ekue opa tetã guio. Opavave oñembyaty ohendúvo upe tyapu ha ndoikuaái mba’épa ojehu, peteï teĩ ohendúgui umi ogueroviávape oñe’ẽ ramo iñe’ẽ teépe.

Ohecha ramo itereígui he’i joa hikuái:
Nda ha’éi piko Galileagua ko’ã oñe’ẽva? Mba’éicha rupi piko ñahendu oñe’ẽ ramo ñane ñe’ẽ teépe? Ko’ápe ñaime Partia, Media, Elam, Mesopotamia, Judea, Capadocia, Ponto, Asia, Frigia ha Panfilia, Egipto ha Libia Cirene ypy pegua.

Oĩ avei Romagua ko’ápe oikóva, oĩ judío ha umi ojeroviáva Tupä Ñandejára rehe ha’e kuéraicha. Oĩ avei Creta ha Arábiagui oúva. Ha ñahendu ñane ñe’ẽ teépe oguerohoryha hikuái Tupä Ñandejárape opa hembiapokue rehe.

Tupä Ñandejára Ñe’ẽ.

Todos: Romomba’e guasu ndéve, Ñandejára.

SALMO ÑEMBOHOVÁI 103, 1ab. 24ac. 29b-31. 34

R. Embou oréve nde espíritu Ñandejára, embopyahu ko yvy ape.

Amomba’e guasu Ñandejárape che py’a ite guive.
Nde tuichaite niko Nde Tupä che Jára
Ore Jára, hetaite mba’e niko rejapo.
Ko yvy henyhẽ ne rembiapokuégui. R.

Reipytu joko ramo ichupekuéra, omano ha yvýpe jeýnte oho opa.
Nde Espíritu umíva ojapopa, ko yvy ha opa mba’e embopyahu. R.

Ñandejára tomimbipa opa ára, Tupä to vy’a hembiapokue rehe.
Iporã nga’u ra’e Ñandejárape che purahéi.
Ha’e añoite ku hína upe che mbovy’áva. R.

LECTURA MOKÖIHA:
Ñahendúta Tupä Ñandejára Ñe’ẽ San Pablo ohai va’ekue ikuatia peteïhápe Corinto guápe

12, 3b-7. 12-13

Che pehenguekuéra:

Avave ndaikatúi he’ívo: “Jesús niko Ñandejára!”, noñe’ẽi ramo hína Espíritu santo rupi.

Tupä Ñandejára reroviaha kuéra apytépe heta oĩ Espíritu Santo ome’ẽ hague opaichagua mba’e kuaa. Ha umi mba’e umíva me’ẽha, peteï Espíritu añónte.

Hetaichagua ijapopyrã oĩ, ha umi tembiapo umíva, peteï Tupä Ñandejára añónte ome’ẽ ojejapo haguã. Pe pokatu niko ojechauka opáicha, ha upéicha ramo jepe, peteï Tupä Ñandejárante pe ipokatu rupi, ojapóva opa mba’e opavavépe guarã. Espíritu Santo ojekuaauka peteï teĩ rupi, opavavépe iporã haguãicha.

Yvypóra rete niko, oiko ramo jepe heta mba’égui, peteïnte. Upéicha avei Cristo. Ha upeicha ite avei opavave ñande, judío térã judio’ỹva, tembiguái térã tembiguai’ỹva, ñañe mongarai va’ekue jaiko haguã peteï tete ramo, peteïEspíritu año rupi. Ha oñeme’ẽ opa ñandéve jay’u haguã upéva upe Espíritugui.

Tupä Ñandejára Ñe’ẽ.

Todos: Romomba’e guasu ndéve, Ñandejára.

SECUENCIA

Eju, Espíritu Santo, embou yvágagui tesakä ore resapéva.
Eju, ore Ru, eju eme’ë oréve ne remikuave’ë, eju ore resape.

Angapyhyhára ne marangatuetéva nde niko eñangareko ánga kuéra rehe
yvypórape remonguera.

Nde niko embopytu’u omba’apóvape, ha emoangapyhy

Nde ore mbovy’áva ore rasëramo.
Eike ne mba’e rendy marangatu rehe nde rehe ojeroviáva py’a mbytetépe.

Ne pytyvõ’ÿ rehe ndoguerekói mba’eve yvypóra,
mba’eve imarangatúva.
Emopotï ore angaipa emyenyhë ore rekove ha emonguera ore mba’asy.

Ore mbopy’a marangatu, nde rupi ta ore py’a porã ha toroguata tape porãre.

Eipytyvõ nde rehe ojereviávape tohupity ne remime’ë marangatu.
Emyengovia hembiapo porãvape, eipohãno ore anga,
ha eme’ë oreve pe vy’a opave’ÿva.

ALELUIA

Aleluia.
Eju Espíritu, emoenyhë nde rehe ojeroviáva rekove
emokyre’ÿ ichupe kuéra ne mborayhúpe.
Aleluia.

EVANGELIO
Marandu porã Ñandejára Hesukrísto rehegua San Juan omombe’u háicha 20, 19 – 23

El pueblo aclama: Romomba’e guasu ndéve, Ñandejára.

Upe árape voi, pe semána ñepyrũha ára pyharépe umi Jesús disípulo okyhyjégui hudío
kuéra ruvichágui oñembyaty peteĩ koty ñembotypýpe. Ha upe Domíngo pyhare voi,
Jesús ou sapy’a oñemoĩ mbytépe kuéra. Omomaitei chupe kuéra he’ívo: — Ta pende
py’aguapy joaitéke.

Upéva he’ipávo, ohechauka chupekuéra umi ipo ha pe ijyke ojekutu hague. Tuicha
ovy’a hikuái ohechávo Ñandejára Jesucrístope. Upéi katu Jesús omomaitei jey voi
chupekuéra: — Py’aguapy toĩ pene ndive. Che Ru che mbou haguéicha, che pomondo
peẽme.

Upévo, oipeju hesekuéra ha he’i: — Ame’ẽ peẽme Espíritu Santo. Oimeraẽvape peẽ
peperdonáva ipekádo, Ñandejára ave operdonáta chupe. Ha napeperdonái ramo katu,
Ñandejára ave noperdona mo’ãi chupe.

Ñandejára Jesucrísto Ñe’ẽ.

Todos responden: Romomba’e guasu ndéve, Ñandejára Hesukrísto.