DOMINGO QUINTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha           9, 26-31

Oguahẽvo Saulo Jerusalénpe oñembyatyse umi Jesús reroviaha ndive, ha opavave okyhyje ichugui, ndo gueroviaséigui ha’e avei ogueroviaha. Opáichavo Bernabé ogueraha ichupe apóstolkuéra rendápe.

Omombe’u ichupekuéra Saulo ohecha hague Ñandejárape tapépe ha Ñandejára oñe’ẽ hague ichupe, ha Damáscope Saulo omoherakuã hague Jesúspe kyhyje’ỹ rehe. Upéicha Saulo opyta Jerusalénpe ha oiko hendivekuéra.

Oñe’ẽ Ñandejára rehe kyhyje’ỹ rehe, oñemongeta, oñoñe’ẽ api Israel guáva ndive griégo ñe’ẽmegua, ko’ãva katu oñeha’ã ojuka ichupe. Oñopehẽnguéva Jesús reroviaha ohechakuaa vove katu, ogueraha Sáulope Cesaréape ha upégui omondo hikuái ichupe Társope.

Upéma ramo Jesucrísto  reroviaha opa Judea, Galilea ha Samaría rupi, oiko py’a guapýpe ha okakuaa ijespíritupe. Omboaje Ñandejárape ha Espíritu Santo oipytyvõ rupi, oñembohetave ohóvo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI    21, 26b-28. 30-32

Opavave: Ñandejára, romomba’e guasúne aty guasúpe.

O bien: Aleluia.

Ajapóne umi mba’e ndéve ha’e va’ekue ajapotaha

ha opa nde rehe ojeroviáva rovake imboriahúva okarúne hyvatã meve,

Ñandejára rehe ojeroviáva omomba’e guasúne ichupe, ha oikove pukúne. O.

Opa tetãnguéra, ha mayma ko yvy ape rehe oikóva, imandu’áne Ñandejára rehe, oúne henondépe oñesũ. O.

Oha’arõva oikove jevy oñesũne henondépe ha omomba’e guasu ichupe,

umi oguejy va’ekue ko yvýpe to ñesũ henondépe. O.

Che anga oikovéne Ñandejárape guarã

Che ra’ykuérare omomba’e guasúne Ñandejárape,

hese imandu’áne oikove aja pukukue, umi upe rire guápe avei imandu’áne,

Ñandejára reko joja ha hembiapokue ita rehe. O.

LECTURA MOKÔIHA:

Ñahendúta Tupã Ñandejára Ñe’ẽ San Juan aranduka peteĩ hápe oi háicha         3. 18-24

Che ra’ykuéra pohayhuetéva, ani japorohayhu ñande jurúpente, jahechauka avei ñane mborayhu iñañeteha ñane rembiapokue rupi.

Péicha ramo jaikuaáta añete reheguaha ñande ha ikatúta ñande py’a guapy Ñandejára renondépe.

Ñande py’apy ñane moĩ vaírõ Ñandejára renondépe, Ñandejára tuichave ñande py’apýgui, ha oikuaa opa mba’e.

Che pehẽnguekuéra pohayhúva, ñande py’a na ñane moĩ vaíri ramo, jajerovia Ñandejára renondépe. Ha ha’e ome’ẽta ñandéve opa jajeruréva, ñane ñe’ẽ rendúgui hembiapoukapýpe ha jajapógui ha’e oipotáva. Ha hembiapoukapy hína kóva: Jarovia Ita’ýra Jesucrístope ha jajoayhu ha’e he’i haguéicha ñandéve.

Umi ohayhúva hembiapoukapy oiko ipype, ha ha’e oiko ipypekuéra. Ha jaikuaa oĩha ñande pype, Espíritu ha’e ome’ẽ va’ekue rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA     Jn, 4a. 5b

Aleluia.

Pejoajuke che rehe, che ajoaju háicha pende rehe.

Pe ojoajúva che rehe ha che hese, upéva heta hi’a.

Aleluia.

EVANGELIO

Marandu porã Ñandejára Jesucrísto rekove ha hemimbo’e San Juan omombe’u háicha 15, 1-8        

Opavave: Romomba’e guasu ndéve, Ñandejára.

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape:  Che niko ku parral máta ha’etéva, che ru katu iñangarekohára.  Umi che rakã hi’a’ỹva ha’e oikytĩ. Hi’a ramo katu omopotĩ hi’ave haguã.  Peẽ niko pene potĩmbáma umi mba’e ha’e va’ekue peẽme rupi.  

Pejoaju che rehe, che ajoajuháicha pende rehe. Yvyra rakã niko ndahi’ái ha’eño rei, ndojoajúi ramo imátare. Péicha avei peẽ, ndaikatu mo’ãi pejapo mba’eve ndapejoajúi ramo che rehe.

Che niko pe parral máta, peẽ katu umi hakã. Pe ojoajúva che rehe ha che hese, upéva heta hi’áne. Che rehe’ỹ katu, peẽ ndaikatúi mo’ãi pejapo mba’eve.  Pe ndojoajúiva che rehe oñemombóta umi yvyra rakã pirukuéicha oñembyatýva ojehapy haguã.

Peẽ pejoaju ramo che rehe ha napemboykéi ramo che ñe’ẽ, pejerure pejerureséva ha oñeme’ẽne peẽme.  Péicha ojehecháta che Ru tuichaha, peẽ pejapo ramo mba’e iporãva ha peiko ramo che disípulo teéicha.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.