DOMINGO SEMANA XVII TO

LECTURA PETEÏHA:

Ko’ágã ñahendúta Tupã Ñandejára ñe’ẽ Reyesarandukápe oĩ háicha   3, 5-6a. 7-12

Tupä Ñandejára ojehechauka Salomónpe iképe, ha he’i ichupe: “Ejerure reipotáva ha ame’ẽta ndéve”.

Salomón he’i ichupe: “Nde py’a porã ite va’ekue niko ne rembiguái che ru David ndive, ha’e oguata hague rehe nde rape rupi teko jeroviaha, teko joja ha py’a potĩme. Upéva rehe rehayhu ichupe ha reme’ẽ ichupe peteï ita’ýra oguapy haguã iguapyhápe. Nde, Tupä che Jára, che moĩ aisãmbyhy haguã che ru David rendaguépe, jepe ramo che mitã rusu aikuaa guasu’ỹva gueteri mba’eve. Ha amoakã upe tetã nde reiporavo va’ekue. Umi ne tetãgua niko heta iterei, ykatu’ỹva jaipapa. Eme’ẽna chéve katupyry ha akã porã aisãmbyhy haguã ne retã guápe, aikuaa haguã iporãva ha ivaíva; ỹrõ piko máva oisãmbyhýta hetaite ne retã guápe?”

Tupä Ñandejárape ombovy’a ko ojeruréva Salomón, ha he’i ichupe: rejerure hague rehe chéve kóva, ha nda ha’éi  jeikove puku, térã mba’eta, térã nde rehe ija’e’ỹva omano haguã, rejerure uvei katupyry ha akã porã reporohendu ha reisãmbyhy kuaa haguã, ajapóta rejerure va’ekue: ame’ẽta ndéve arandu ha akã porã, oguereko’ỹ haguéicha avaveichagua mburuvicha guasu ne mboyve guare ha oguerekove’ỹtava avave nde riregua.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 119, 57. 72. 76- 77. 127-130

Opavave: Che ahayhu ne rembiapoukapy

Che Jára, nde niko chéve guarã opa mba’e, ha ha’éma ajapotaha umi ne ñe’ẽ.

Che ahecha ramo ne rembiapoukapy óro ha plátagui ahecha ramove. O.

Ne mborayhu ta che moangapyhy 

ere haguéicha rejapotaha che ndive.

Che poriahuvereko kena taikove,

ne rembiapoukapy upe che mbovy’áva. O.

Che ahayhu ne rembiapoukapy

ha ahecha ramove óro porãgui.

Tova mokõime jeikógui ndaikuaaséi mba’eve,

ha upéva rehe ne rembipotánte voi ajapo. O.

Ne rembiapoukapy niko mba’e neporãmba jepéva,

upéva rehe ajapo ipype he’i háicha.

Umi ne ñe’ẽ jaikuaávo, ñande resape,

ha omoarandu umi mba’eve oikuaa’ỹvape. O.

LECTURA MOKÖIHA:     

Ñahendúta Tupä Ñandejára Ñe’ẽ San Pablo ohai va’ekue Roma guápe 8, 28-30

Che pehenguekuéra:

Jaikuaa niko Tupä Ñandejára omoĩha opa mba’e iporã haguã umi hayhuhárape, ha’e ohenói va’ekue ojapo haguã hembipota. Umi ha’e oikuaáma va’ekue voi, iñepyrũrã guive omoĩ oiko haguãita’ýraicha. Ita’ýra ha’e haguã pe tenondegua ipehẽnguekuéra apytépe. Ha umi Tupã Ñandejára oiporavo va’ekuépe imba’erã, iñepyrũha guive ohenói avei. Ha umi ohenói va’ekuépe omboheko joja, ha umi omboheko joja va’ekuépe, ome’ẽ heko mimbipágui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA     Cf. Mt 11, 25

Aleluia.

Romomba’e guasu che Ru, yvága ha yvy Jára, reñomi hague rehe ko’ã mba’e umi iñarandu ha imba’e kuaávagui, ha reikuaauka

umi iñarandu’ỹvape.

Aleluia

EVANGELIO

Marandu porã Ñandejára Hesukrísto rehegua San Mateo omombe’u háicha    13, 44-52

Opavave: Romomba’e guasu ndéve, Ñandejára

Upérõ Jesús he’i opavavépe: Ñandejára Rréino niko ojogua ku pláta yvyguy kokuépe oñeñotỹvape. Pe ojuhúva, oñotỹ jeýnte hendaguépe. Upéi katu, vy’apópe oho ovendepa opa mba’e oguerekóva ha ojogua pe yvy. Ñandejára Rréino ojogua avei ku ita jeguáre oñemúva oikóvo. Iporãve ha hepyvéva rekávo manté oikóva. Ágã ojuhu vove katu, oho ovendepa opa mba’e oguerekóva ha ou ojogua.

Ñandejára Rréino ojogua avei ku rred ýpe japoívape, ha oitýva opaichagua pira. Henyhẽ vove pirágui, ñambotyryry y rembe’ýpe ha upépe jaiporavo umi pira. Ñamoĩ ajakápe umi iporãva ha umi oje’u’ỹva katu ñamombo.

Péicha avei ojehúta ágã ára pahápe. Ñandejára ángel kuéra osẽta oipe’a umi heko vaíva umi heko potĩva apytégui. Umi hembiapo vaíva ojeitýta Aña retãme, ha upépe ojahe’óta hikuái ha omopururũta hãi.

Jesús oporandu idisípulokuérape: — Peikuaa piko mba’épa he’ise ko’ã mba’e.

Ha’e kuéra he’i chupe: — Roikuaa.

Upéi Jesús he’i chupe kuéra: — Opa oñemo’arandúva Ñandejára Ñe’ẽme ha oikéva Ñandejára Rréinope niko ojogua ku óga járape oguenohẽva ikarameguãgui mba’e ipyahúva ha itujáva.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.