DOMINGO SEMANA XXIV TO

LECTURA PETEÏHA:

Ko’ágä ñahendúta Tupä Ñandejára Ñe’ẽ Eclesiástico arandukápe oĩ háicha 27, 30 __ 28, 7

Py’aro ha pochy vai, mba’e jahechase’ỹva, hembiapo vaíva rehe oja hína umíva.
Avavépe oheja rei’ỹva mba’eve, upévape Ñandejára mba’eve ndoheja rei mo’ãi, oipapáta opa iñangaipa.

Eheja rei nde rapichápe ijejavykue, reipota ramo Ñandejára oheja rei ndéve.
Mba’éicha piko oha’arõta Ñandejáragui tesãi ipy’aróva hapicha ndive.

Ha’eichaguápe ndoiporiahuverekói, ha piko ojeruréta Ñandejárape poriahuvereko.
Ha’e omano va’erãnte avei ha ipy’aro hapicha ndive, máva piko ojeruréta hese ojeheja rei haguã ichupe iñangaipa.

Ejepy’a mongeta remano rire guarãre ha epoi py’a rógui, ne mandu’a remano ha nde tujutaha,
ha ejapo Ñandejára rembiapoukapy.Ne mandu’a hembiapoukapýre, ha ani nde py’aro.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 102, 1-4. 9-12

R. Ñandejára imba’e porã ha ñande poriahuvereko

Amomba’e guasu Ñandejárape che py’a ite guive,
che py’a ite guive amomba’e guasu héra marangatu.
Amomba’e guasu Ñandejárape che py’a ite guive,
nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapo vaikue
ha che mongueráva opaichagua mba’asýgui.
Ha’e ndo hejái apa yvy kuápe
ha mborayhúpe che añuã ha che mokunu’ũ. O.

Ha’e ndoporomongavajúi mante
ha nda ipochy aréi.
Nomyengoviái ñandéve ñane angaipa,
nomyengoviai ñandéve ñane rembiapo vaikue. O.

Yvága oĩ mombyry háicha yvýgui,
upeichaite tuicha imborayhu umi hese ojeroviáva rehe.
Kuarahy resẽ mombyryháicha kuarahy reikégui,
upéicha omomombyry ñande hegui ñane angaipa. O.

LECTURA MOKÖIHA:

Ñahendúta Tupä Ñandejára Ñe’ẽ San Pablo ohai va’ekue Roma guápe 14, 7-9

Avave nda jaikovéi ñande jupe guarã, ha nañamanói ñande jupe guarã.
Jaikove ramo, jaikove Ñandejárape guarã, ha ñamano ramo, Ñandejárape
guarã ñamano. Ha upéicha, jaikove ramo ha ñamano ramo, Ñandejára mba’e
ñande. Upevarã omano Cristo ha oikove jevy, ha’e haguã, omanóva ha
oikovéva Jára.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 13, 34

Aleluia.
Ko mandamiénto ipyahúva aheja peëme: Pejoayhu kena.
Che pohayhu haguéicha pejoayhu avei peë.
Aleluia.

EVANGELIO
Marandu porã Ñandejára Hesukrísto rehegua San Mateo omombe’u háicha 18, 21-35

Opavave: Romomba’e guasu ndéve, Ñandejára

Upérõ Pedro oñemboja Jesús rendápe ha he’i chupe: — Maestro, oime ramo
hembiapo vaíva che ndive piko mboy vése aheja rei vaerã chupe. 7 piko iporãma.
Jesús katu he’i chupe: — Nahániri. Ndaha’éi 7, 77 jo’a jo’a uvei.

Kóa ko káso ohechaukáta peẽme mba’éichatapa hína Ñandejára Rréino. Oiko vaekue
ndaje raka’e peteĩ mburuvicha oikuaaséva mboy-mboýpa odeve chupe umi omba’apóva
chupe. Iñepyrũme voi, ojegueru hendápe peteĩ hetaiterei rasa odevéva chupe. Ha isoguégui, ndaikatu mo’ãiva omyengovia mba’eve.

Huvicha upémarõ he’i ovendetaha chupe tembiguái ramo ta’ýra kuéra ha hembireko ave, ha upéva ári opa mba’e oguerekóva. Pe hepykue opytáta chupe upe oiporu vaekue rekovia.

Upépe, pe kuimba’e oñesũ huvicha renondépe ha ojerure asy chupe: “Che ruvicha, ndikatúi piko che ra’arõ’imive. Amyengoviáta niko ndéve pe aiporu va’ekue.” Ha huvicha iporiahuvereko
chupe. Oheja rei chupe pe odevéva, ha oheja oho.
Ha ha’e osẽvo okápe katu, ojuhu hapichápe oiporu vaekue chugui pláta michĩ ra’ymi.
Opo voi hese ha oityvyro chupe, he’ívo: “Emyengovia chéve pe redevéva.” Hapicha
oñesũ henondépe ha ojerure asy chupe: “Ndikatúi piko che ra’arõ’imive. Amyengoviáta
niko ndéve pe aiporu vaekue” Ha’e katu ndoikuaaséi chugui mba’eve. Oguerahauka
préso omyengoviapa peve pe oiporu vaekue.
Umi hapicha ohechávo upéva, ipochypa. Oho hikuái mburuvicha rendápe ha
omombe’u chupe mba’épa ojehu. Upémarõ pe mburuvicha ohenoika pe kuimba’épe ha
he’i chupe: “Ne aña ra’y reikóva. Che niko aheja rei ndéve pe ikatu’ỹ vaekue
remyengovia chéve, rejerure haguére. Mba’éicha piko nde, nderehecha kuaái nde
rapichápe, che ajapo haguéicha ne ndive.”
Ha pe mburuvicha ipochy’eterei opytávo. Upémarõ ombyepotiuka omyengoviapa
peve upe chupe odevéva.
Upéi Jesús osẽ he’i: — Péicha avei ojapóta pende rehe che ru yvágape oĩva pende
py’aite guive ndapeheja reíri ramo pende rapichápe pe ivaíva ojapóva pende rehe.
Ñandejára Jesucrísto Ñe’ẽ.
Opavave: Romomba’e guasu ndéve, Ñandejára Hesukrísto.