LUNES XXIV DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Timotéope              2, 1-8

Che Ra’y: Tenondete ha’e oñeñembo’e va’erã, ojejerure asy va’erã opavavére ha oñeme’ẽ va’erã Tupã Ñandejárape aguyje  opa yvypóra rehehápe. Oñeñembo’e va’erã umi tetã sãmbyhyhárare, mburuvicha kuérare, ikatu haguã jaiko py’a guapýpe ha ñorairõ’ỹre, jeporiahuverekópe ha ñemomba’épe. Upéva iporã ha ombohory Tupã Ñandejára ñande pysyrõvape. Ha’e niko oipota opavave to ñepysyrõ ha toikuaa pe añetegua.

Tupã Ñandejára niko peteĩnte ha peteĩnte avei pe omoĩ porãva yvypóra kuéra Tupã Ñandejára ndive. Upéva hína Cristo Jesús, yvypórava avei. Ha’e niko omano ñande rehehápe opavave ñañe pysyrõ haguã, ha mba’e rechaukaha ramo ome’ẽva va’ekue  hi’árape porã.

Amombe’u haguã ko’ã mba’e ha’e che moĩ mba’e mombe’uha ha apóstol ramo. Ha oheja che pópe ambo’e haguã jerovia ha añetegua umi judio’ỹvape. Ko che ha’éva hína añete. Nda che japúi.

Ha upéicha, aipota kuimba’ekuéra oñembo’e opa rupi ha ohupi ipo Tupã Ñandejárape py’a potĩme ha pochy’ỹre, térã ñe’ẽmbojovai’ỹme.

Tupã Ñandejára Ñe’ẽ.

SALMO ÑEMBOHOVÁI   27, 2. 7-9

Opavave: Tupã Ñandejára, che rendu rohenói ramo

Tupã Ñandejára, che rendu rohenói ramo,

ndéve añembo’e asy ramo

ha che po ahupívo nde

tupao marangatu gotyo. O.

Tupã Ñandejára upe che mombaretéva, upe che mo’ãva

ani haguãtei ojehu chéve mba’eve.

Hese ajerovia. Avy’a che pytyvõ haguére,

ichupe aropurahéita. O.

Tupã Ñandejára, enohẽ ne retã jejopy vaígui,

ha ehovasa umi ne mba’évape.

Herekua ramo eiko, ha opa

árape eisãmbyhy ichupekuéra. O.

ALELUIA Jn 3, 16

Aleluia.

Tupã Ñandejára ohayhu etereígui yvypór kuérape ome’ë hesehápe Ta’ýra peteïmi Jesucristo;

mayma oroviáva ichupe oguereko Tekove ijapyra’ÿva.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha  7, 1-10

Upe ramo Jesús oho Cafarnaúmpe. Upépe oiko peteĩ mburuvicha Romagua oguerekóva peteĩ hembiguái ohayhúva, hasýva ha oĩva omano haguãicha.

Upe mburuvicha, ohendúvo umi oje’e etáva Jesús rehe, omondo judíokuéra moakãhára  kuérape, ojerurévo Jesúspe oho haguã oipohano upe hembiguáipe. Ha’e kuéra oho Jesús rendápe ha he’i ichupe:

Iporã niko reipytyvõ pe mburuvichápe. Ha’e ohayhu ñane retã ha ha’ete voi omopu’ãuka va’ekue  oréve pe tupao. Jesús oho hendive kuéra, ha oĩ marõ hikuái pe hóga ypýpe, upe mburuvicha omondo iñirũ nguérape he’ívo ichupe: “Karai, máva piko che nde reike haguã che rógape?

Upévare, nda che py’ái voi kuri aha haguã rohekávo jepe. Eréntena che rembiguái okuera haguã. Che niko aĩ mburuvicha poguýpe, ha areko avei che po guypegua. Ha peteĩme ha’érõ oho haguã, upéva oho. Ambuépe ha’érõ ou haguã, upéva ou. Ha ha’érõ che rembiguáipe ojapo haguã ha’éva, ojapo.”

Jesús ohendúvo upéva tuicha oguerohory, ha oma’ẽvo umi hapykuéri ohóvare, he’i: Añetehápe ha’e peẽme, Israelgua apytépe jepe ndajuhúiva peteĩ ojeroviáva Tupã Ñandejárare ko kuimba’éicha. Ojevývo hikuái hógape, umi oñemondo va’ekue  ojuhúma pe tembiguái okuera.

Tupã Ñandejára Ñe’ẽ.