LECTURAS SÁBADO VIGÉSIMA CUARTA SEMANA

LECTURAS SÁBADO VIGÉSIMA CUARTA SEMANA

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Corintos guápe 15, 35-38. 42-49

Che pehẽnguekuéra: Ikatúne oime oporandúva: “Mba’éicha piko oikove jevýta umi omano va’ekue ? Mba’eichaguápa piko umi hete?” Ha, ivýrova porandu! Oñe ñemitỹ ramo, pe mba’e ra’ỹi omano va’erã heñói haguã mba’e roky pyahu. Pe oñeñotỹva niko ndaha’éi pe yvyrã heñói va’erã, pe ha’ỹi nguénte niko, taha’e ra’e trígo térã oimeraẽva mba’e.

Upéicha avei oiko va’erã umi omano va’ekue oikove jevy ramo. Oñeñotỹva ituju. Pe oikove jevýva katu ndaituju véima. Oñeñotỹva oporo mbojeguaru. Oikove jeýva katu omimbipa. Oñeñotỹva ikangy. Oikove jeýva imbarete. Pe oñeñotỹva niko yvy rehegua. Pe oikove jevýva katu espíritu rehegua. Oĩ ramo tete yvy reheguáva, oĩ va’erã avei tete espíritu reheguáva.

Tupä Ñandejára ñe’ẽ he’i kóicha: “Pe kuimba’e ypykue, Adán, Tupã Ñandejára ojapo va’ekue peteĩ oikovéva ramo. Ha pe Adán ipaha pegua katu, ha’e peteĩ espíritu oporomoingovéva. Opáichavo, espíritu reheguáva ndaha’éi tenondegua. Yvy rehegua pe tenondeguáva, ha upéi pe espíritu reheguáva. Pe kuimba’e ypykue, ojejapo va’ekue yvýgui, yvy arigua va’ekue.

Pe kuimba’e upe rire guáre katu, yvága pegua. Umi yvy ariguáva, ojogua pe kuimba’e yvýgui ojejapo va’ekuépe. Ha umi yvága peguáva katu, ku yvágape ojejapo va’ekuépe. Jajogua háicha pe kuimba’e yvýgui guarépe, péicha avei jajogua pe yvága guápe.

Tupã Ñandejára Ñe’ẽ.

SALMO ÑEMBOHOVÁI 55, 10-14

Opavave: Tupã renondépe aikóta.

Che rayhu’ỹva oguevíne, ajerurévo ndéve che pytyvõ haguã.
Aikuaa porã Tupã Ñandejára oĩha che ndive.
Tupã Ñandejára rehe ajerovia ha iñe’ẽ amomba’e,
Hese ajeroviáta ndakyhyje véima.
Máva piko ojapóta che rehe mba’eve? O.

Tupã Ñandejára, ajapóta niko umi mba’e ndéve
ha’e va’ekue ajapotaha, purahéi ha vy’a pópe.
Nde niko nderehejái amano térã ha’a.
Upéicha rupi aikóta Tupã Ñandejára renondépe
ojeiko háicha ára sakãme. O.

ALELUIA Cf. Lc 8, 15

Aleluia.
Ovy’a va’erã umi omoingéva ipype Tupã Ñandejára ñe’ẽ ikorasõ oĩre hekópe ha heta mba’e porã osẽ ichugui naikangýigui.
Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Lucas omombe’u háicha 8, 4-15

Upe ramo heta oĩ va’ekue osẽva umi távagui ohecha haguã Jesúspe. Upéicha rupi heta ijaty hikuái. Aipórõ omombe’u ichupe kuéra ko ñe’ẽ mbojoja: “Oĩ va’ekue peteĩ osẽva oñotỹ haguã imba’e ra’ỹi. Ha oñemitỹ nguévo, oĩ umi mba’e ra’ỹi ho’áva tapépe.

Oñepyrũmba hese ha guyra kuéra ho’upa. Oĩ avei ho’áva itatýpe, ha umi mba’e ra’ỹi hoky. Ha ndahi’ýigui ipirupa. Oĩ avei ho’áva ñuatĩndýpe, ha hokývo, umi ñuatĩ ojukapa. Oĩ katu avei ho’áva yvy iporãháme, ha okakuaa ha hi’a porã, 100 peve peteĩ ha’ỹi nguégui.”
Péicha he’ívo Jesús, hatã oñe’ẽ: “Ohendúvake to japysaka porã.”

Hemimbo’e kuéra oporandu Jesúspe mba’épa he’ise upe ñe’ẽ mbojoja. Ha’e he’i ichupe kuéra: Tupã Ñandejára niko oikuaauka peẽmente umi mba’e ñemimby isãmbyhy rehegua. Umi ambuépe katu añe’ẽ ñe’ẽ mbojoja rupi, oma’ẽ ma’ẽve ramo jepe ohecha’ỹ haguã ha ohendu henduvérõ jepe oikuaa’ỹ haguã.

Pe ñe’ẽ mbojoja ñemitỹhára rehegua he’ise: “Pe mba’e ra’ỹi niko Ñandejára Ñe’ẽ hína, ha pe ho’a va’ekue tapépe rei, umíva hína umi ohendúva, ha ou Aña ha oipe’a ipy’apýgui kuéra, oguerovia’ỹ haguã ha ani haguã oñepysyrõ.

Umi mba’e ra’ỹi ho’áva itatýpe katu ojogua umi Tupã Ñandejára Ñe’ẽ ohendúva, ha ogueroviáva vy’apópe. Ha ndahapo pypukúigui, oguerovia sapy’ami, ha ojepy’a ra’ã vove, ikangy.

Umi mba’e ra’ỹi ho’a va’ekue ñuatĩndýpe, umíva hína umi ohendúva, ha mbegue mbeguépe ipytupa ojepy’apýgui, mba’e reta potáre ha teko vy’áre, ha upéicha rupi ndahi’ái. Ha umi mba’e ra’ỹi ho’a va’ekue yvy porãme katu, umíva hína umi imarangatúva ha oñemoĩva ohendu ha ojapo pe marandu he’íva, ha oñemohatãgui hese hi’a porãva.”

Ñandejára Jesucristo Ñe’ẽ