DOMINGO SEXTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 10, 25-26. 34-36. 43-48

Oguahẽvo Pedro, Cornelio osẽ huguãitĩvo ha oñesũ henondépe, omomba’e guasu haguã ichupe. Pedro katu omopu’ã ichupe he’ívo: Epu’ã, chéko kuimba’e ndeichaguánte avei.

Upéma ramo Pedro oñepyrũ oñe’ẽ ha he’i: Ko’ãga aikuaáma, añetehápe Ñandejárape guarã peteĩchanteha opavave, ha oimeraẽ tetã megua, ichupe omboajéva ha iporãva ojapóvape, oguerohoryha avei.

Ñandejára oñe’ẽ va’ekue Israel ñemoñarekuérape, omombe’úvo py’a guapy rehegua ñe’ẽ, Jesucrísto, opavave Jára, rupi.

Opa maranduhára oñe’ẽma va’ekue Jesús rehe, ha he’i va’ekue umi hese ojeroviávape ojeheja reipáta iñangaipa.

Oñe’ẽ gueteri hína Pedro ha Espíritu Santo ou opa iñe’ẽ ohendúva ári. Ha umi Jesús reroviaha Israelgua ou va’ekue Pedro ndive, ijurujái opytávo Espíritu Santo oñeme’ẽgui avei Israelgua’ỹvape, ohendu niko ichupekuéra oñe’ẽ ramo ñe’ẽ ambuépe ha omomba’e guasu ramo Ñandejárape.

Upéma ramo Pedro he’i: Mañei piko ikatu jajoko ani haguã oñemongarai ko’ã oñeme’ẽ va’ekuépe Espíritu Santo ñandéveicha avei? Ha he’i oñemongarai haguã hikuái Jesucrísto rérape. Upéi ojerure hikuái Pédrope opyta haguã hendive kuéra ára mbovymi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 97, 1-4

Opavave: Ñandejára ohechauka ipokatu, tetãnguérape.

O bien: Aleluia.

Pepurahéi Ñandejárape purahéi pyahu, mba’e hechapyrãva ojapógui ha’e.
Ipyapy mbarete ha imarangatúgui ipu’aka opa mba’e rehe. O.

Ñandejára ohechauka ipokatu, tetãnguérape ohechauka heko jojaha.
Imandu’a imborayhu ha iñe’ẽ ome’ẽ va’ekue rehe tetã Israel ndive guarã. O.

Yvy jerekuévo ojehecha Ñandejára ipu’akaha opa mba’e rehe.
To jererohory Ñandejára yvy jerekuévo, purahéi rory to soro ha to jevy’a. O.

LECTURA MOKÔIHA:
Ñahendúta Tupã Ñandejára Ñe’ẽ San Juan aranduka peteĩ hápe oi háicha 4, 7-10

Che pehẽnguekuéra pohayhuetéva: Jajoayhu va’erã, pe mborayhu oúre Ñandejáragui. Opa oporo hayhúva, Ñandejára ra’y ha oikuaa Ñandejárape. Pe oporo hayhu’ỹva ndoikuaái Ñandejárape, Ñandejára niko mborayhu.

Ñandejára ohechauka ñandéve imborayhu omboúvo Ita’ýra peteĩ ete yvy ári, jaikove haguã ha’e rupi. Pe mborayhu hína kóva: ndaha’éi ñande jahayhu hague Ñandejárape, ha’e uvei ñande rayhu ha ombou Ita’ýra, ha’e omano rupi ojeheja rei haguã ñandéve ñane angaipa.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 14,23

Aleluia.
Jesús he’i ichupe: Pe che rayhúva ojapo che ha’éva ha che Ru ohayhúta ichupe. Ha che Ru ndive rojúne roiko hendive.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 15, 9-17

Opavave: Romomba’e guasu ndéve, Ñandejára.

Upérõ Jesús he’i idisípulokuérape: Che pohayhu peẽme, che ru che rayhuháicha chéve. Peikokena mborayhúpe, pe mborayhu pende rehe añandúvape.

Pejapo ramo che rembipota, peikóta pe mborayhúpe pende rehe añandúvape. Péicha avei che, ajapóvo che ru rembipota, aiko pe imborayhu ha’e che rehe oñandúvape.

Añe’ẽ niko peẽme kóicha pevy’a haguã che ndive, ha pene renyhẽ haguã vy’águi. Pe tembiaporã ahejáva peẽme hína, pejoayhu che pohayhuháicha. Pe mborayhu tuichave oñandúva niko hekove jepe ome’ẽ iñirũre. Ha peẽ che irũ hína, pejapórõ che ha’éva peẽme.

Che niko nda’éi pende rehe peẽ che rembiguaiha. Tembiguái niko ndoikuaái mba’épa ijára ojapo. Che poguereko che irũ ramo, aikuaaukágui peẽme opa mba’e che ru he’i va’ekue chéve. Peẽ nda che poravói va’ekue chéve.

Che poiporavo va’ekue peẽme. Che pomondóta pejapo haguã heta mba’e iporãva ha hetápe ohupytýva. Péicha, che ru ome’ẽta peẽme opa mba’e pejeruréva chupe che rérape. Upévare, ha’e jey voi peẽme, pejoayhu.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.