DOMINGO XIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 1, 13-15; 2, 23-24

Ñandejára ndo japói va’ekue mano, ha ndo vy’ái oñehundívo yvypórape. Opa mba’e ha’e ojapo oikove ha hesãi joaite haguã, ha ndaipóri ipypekuéra oporojukáva, ha ñemano ndaipu’akái ko arapýpe. Tekojoja tapiaite guarã rupi.

Tupã ojapo yvypórape omano’ỹ haguã, ha ojapo ichupe ijoguahárô. Ha Aña, ha’éntesegui omoinge mano ko yvy ape ári, ha umi hendive oîva ohasa mante vaerã upe rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 29, 2. 4-6. 11-12a. 13b

Opavave: Che romomba’e guasu Ñandejára, che pe’águi jejopy vaígui.

Ñandejára, che, romomba’e guasu che pe’águi jejopy vaígui,
ha nde rehejáigui umi che rayhu’ỹva oñembohory che rehe.
Ñandejára, amanomahágui che moingove jevy,
che renohẽ omanóva ohohagui. O.

Peẽ, Ñandejára rehe pejeroviáva, pepurahéi ichupe.
Peropurahéi héra marangatu.
Tupã niko ndaipochy aréi, imba’e porã katu opa árape.
Pyharekue ñane rasẽ ramo, vy’a ñaroko’ẽ. O.

Ñandejára, che rendúke ha che poriahuvereko.
Che pytyvõke Ñandejára.
Ñandejára, che rasẽ niko remyengovia vy’ápe,
Tupã che Jára, ndéve apurahéi. O.

LECTURA MOKÕIHA:

Ko’ágã ñahendúta Tupã Ñandejára ñe’ẽ Pablo ohai va’ekue ikuatiamokõiháme Corinto guápe 8, 7. 9. 13-15

Che pehenguekuéra: Peẽ niko pene tenonde opa mba’épe: jeroviápe, ñe’ẽkuaápe, mba’e kuaápe, kyre’ỹme pejejokuaiuka haguã, ha mborayhúpe, pe che ahechauka va’ekue peẽme. Upéicha avei pene tenonde va’erã ko Tupã mba’e me’ẽme.

Peikuaáma niko Ñandejára Jesucrísto, pende rayhupápe, mba’e rerekoha ramo jepe, oñemomboriahu hague, ikatu haguã oiko pende hegui mba’eta rerekoha imboriahukue rupi.

Ndaha’éi peẽ pepyta va’erã peikotevẽ, peipytyvõvo pende rapichápe, peñe mbojojapa va’erã uvei katu.

Ko’ágã peẽ pereko pe ha’ekuéra oguereko’ỹva. Ágãnte ha’ekuéra oguerekóne peẽ pereko’ỹva, ha upéicha peiko jojapáne. He’i háicha Ñandejára ñe’ẽ: “Pe omono’õ heta va’ekuépe nahembýi, ha michĩ omono’õ va’ekue noikotevẽi”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. 2Tim 1, 10b
Aleluia.
Cristo Jesús rupi, pe ñane pysyrõva. Ha’e upe ohundi va’ekue ñemano ha marandu porã rupi ohechauka pe jeikove opa’ỹva.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Marcos omombe’u háicha 5, 21-43

Opavave: Romomba’e guasu ndéve, Ñandejára.

Ohasa rire Lágo Galiléa mboypýri, Jesús opyta pe y rembe’ýpe. Heta jeýma umi ijatýva ijerére. Upévo, oguãhẽ hendápe Jáiro. Ha’e niko pe omyakãva pe tupao upépe. Ha ohechávo Jesúspe oñesũ henondépe, ha ojerure asy chupe: — Che rajy niko oime omano potaite. Ejúna emoĩ nde po hese. Tokuera ha toikove.

Ha Jesús oho hendive. Heta avei umi omoirũva chupe kuéra. Ha ojopypa chupe hikuái opáguio. Umíva apytépe oĩ peteĩ kuña hasýva ojapóma 12 áño.

Huguy py’ỹiva jepi ha ikatu’ỹva okuera. Hetáma ohasa asy… Oñemopa’ũ-pa’ũ umi ohóva apytépe Jesús gotyo. Oñembojase hese hapykue guio opoko haguã ijaóre. He’i niko pe kuña ipy’apýpe “Ijaórente jepe apokórõ, akueráne.” Ha opokóvo Jesús aóre, upepete pe huguyha opyta ha oñandu hetepýpe okueraha imba’asýgui.

Jesús ave oñandu upévo osẽ hague chugui pu’aka omongueráva. Ojere oma’ẽ opavavére ha oporandu: — Mávaiko opoko che aóre…
Pe kuña katu oikuaa porã okueráma hague. Ha kyhyjepópe oñemboja Jesús rendápe, oñesũ
henondépe ha omombe’upa chupe pe ojehu va’ekue.

Jesús he’i chupe: — Che rajy, Ñandejárare rejerovia haguére rekuera.
Tereho py’aguapýpe ha anivéma reiko asy. Jesús oñe’ẽ jave gueteri hína, oguãhẽ peteĩ Jáiro
rogaygua, ha he’i chupe: — Omanóma nde rajy.

Anivéma emyangekói mbo’ehárape. Jesús katu opena’ỹre pe oje’évare, he’i Jáirope: — Anítei rejepy’apy. Ejeroviánte che rehe.

Ha ohótavo Jáiro rógape, Jesús ndohejái avavépe oho hendive. Pedro, Santiágo ha tyvýra Juánpe añónte ogueraha hendive.

Oguãhẽvo Jáiro rógape ojuhu hasẽmba joáva upépe. Oike ha he’i chupekuéra: — Mba’éreiko pene rasẽ ha pejahe’o péicha. Ko mitakuña niko nomanói, okénte hína.

Oĩ katu oñembohorýva hese. Ha’e katu omosẽmba opavavépe. Ha itúva, isy ha idisípulokuéra ndive oike pe mitakuña oĩháme. Ipojái ipóre ha he’i chupe: — Talitá kum (he’iséva: “Mitakuña epu’ã.”).

Upévo pe mitakuña, oguerekóva 12 áño, opu’ã ha oguata. Ha opavave opondera joa. Jesús katu he’i chupekuéra ani haguã omombe’u avavépe.

Upéi he’i túva ha sýpe: — emongaru pe mitã.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.