LECTURAS LUNES DÉCIMO TERCERO

LECTURAS LUNES DÉCIMO TERCERO

LECTURA PETEÎHA:

Ko’ágã ñahendúta Tupã Ñandejára ñe’ẽ Amós arandukápe oĩ háicha   2, 6-10. 13-16

Tupã Ñandejára  he’i kóicha: “Umi Israel pegua manterei ojapo ivaívante voi, upévare ichupe kuéra ainupãta katuete. Imarangatúvape pláta rehe ome’ẽ, ha imboriahúvape sapatúpe rehe. Mboriahu akã rehe opyrũ hikuái ha pokarẽ oiporu ikangývape ohundi haguã.

Túva ha ita’ýra peteĩ kuña ndive oñeno, ha’e kuéra upéicha omomarã che réra marangatu. Itupã gua’ukuéra altar ypýpe, oñeno ahoja ári ha’ekuéra oipe’áva mboriahúgui, ndaikatúigui omoengovia upe pláta oiporúva. Ha itupã gua’ukuéra tupaópe ho’u vino oipe’áva mboriahúgui ndaikatúigui omoengovia.

Ha Ko’ágã peẽ che retãgua, che pende rehehápe umi Amorréope ahundi, aitypa hi’a ha ahapo’o. Kuri’ýicha umíva ijyvate ha urunde’ýicha ha’ekuéra imbarete. Ha peẽme katu, Egíptogui che poguenohẽ, yvy ojeiko’ỹha rupi 40 áño pukukue pogueraha.

Peẽme Amorréo yvy ame’ẽ haguã. Upévare kárro pohýicha pombo chipapéta. Upe iñakuãva nokañy mo’ãi, ha imbaretéva ipyapy kangýta, ipy’a guasuvéva jepe ojejukáta, upe ihu’ýpe oporoapíva, ojejapi tante avei, upe oñani kuaáva nokañy mo’ãi, ha kavaju arigua ojejuka tante avei. Ipy’a guasuvéva ñorairõme, upe árape opívo okañýta.”

Tupã Ñandejára Ñe’ẽ.

SALMO ÑEMBOHOVÁI     49, 16b- 23

Opavave: Hekojojáva ohecháta Tupã Ñandejárape

“Mba’éicha rupi che rembiapoukapy nde jurúgui ahendu?

Mba’éicha rupi ne mandu’a che Ñe’ẽ me’ẽre?

Roheko mbo’e ramo niko mba’eve ndereikuaaséi,

ha che ñe’ẽre nde rejepy’apýi. O.

Mondaha rejuhu ramo, hendivéma reñemoĩ,

kuña rapykuéri oikóva ndive nde rejehe’a.

Nde japu ha ne ñe’ẽ rei haguã katu reimemba ite

ha reñeha’ä reporombotavy haguã. O.

Reguapy ha nde ryvýre retaky, chupéma remoherakuã vai.

Opa ko’ã mba’e niko rejapo. Ha piko reipota akirirĩ?

Nde piko reimo’ã che ndeichaguaha mba’e?

Nde rovakete anohẽta ndéve ne rembiapo vaikue. O.

Pehendu porãke kóva, peẽ Tupãgui pende resaráiva!

Pe che momba’e guasúva ipy’a ite guive,

ha oikuave’ẽva chéve upéva, ha’e che momba’e.

Ha upe tape porã rehe oikóvape anohẽne jejopy vaígui.” O.

ALELUIA Cf. Sal 94, 8a. 7d

Aleluia.

Ani pemohatã pene korasõ,

pehendu uvei Tupã Ñandejára ñe’ẽ.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 8, 18-22

Upe ramo Jesús ohechávo ojerepaha hese opavave, he’i hemimbo’ekuérape ombohasa haguã ichupe yguasu mboypýri. Ha peteĩ Moisés rembiapoukapy mbo’eha oñemboja Jesús rendápe ha he’i ichupe: Mbo’ehára, che romoirũta mamo rehohápe.

Jesús he’i ichupe: Aguara’i niko oguereko ikeha, ha guyrakuéra hupa. Che, yvypóraicha aju va’ekue katu, ndarekói mamo ambojeko haguã che akã.

Peteĩ hemimbo’e kuérava katu he’i ichupe: Che Jára, che rejána taha raẽ tañotỹmi che ru.

Jesús katu he’i ichupe: Eju katu che moirũ. Eheja umi omanómava toñotỹ umi omanóvape.

Ñandejára Jesucristo Ñe’ẽ