LECTURAS DOMINGO 23º DEL TIEMPO ORDINARIO

LECTURAS DOMINGO 23º DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 35,4-7a

Peje ojepy’apývape: “Néike, ani pekyhyje! Ápe oĩ pene Tupã, ou omyengoviávo pende rehe ija’e’ỹvape ou pende pe’ávo jejopy vaígui”.

Upéro umi ohecha’ỹva ohecháta, ha umi ohendu’ỹva ohendúta. Upéro ijapáva, guasúicha oñaníta ha iñe’ẽngúva vy’águi osapukáita, hetátagui pe y yvy ojeiko’ỹháme ha y osyry hatãva yvy perõme. Yvy ndahi’ýivagui ojapóta y
renda ha yvy ijyuhéivape ombohetáta yvu.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 145, 7-10
Opavave: Che ánga, emomba’e guasúke Ñandejárape.

Ñandejára iñe’ẽ rehe nopyrumo’ãi araka’eve
Oñemoĩ uvei ojejopy vaíva yke rehe,
ha omongaru iñembyahýivape.
Ñandejára opoi umi iñapytĩmby ojererekóvagui. O.

Ñandejára oheja umi ohecha’ỹvape ohecha jevy,
Ñandejára omopu’ã umi ikangývape,
Ñandejára ohayhu umi heko jojávape,
Ñandejára oñangareko umi mombyry guáre. O.

Ityre’ỹ ha iména manóvape ha’e oipytyvõ.
Heko vaíva rape katu ha’e ohundi.
Ñandejára niko mburuvicha guasu opa árape guarã.
Táva Sión! Ñandejára ne sãmbyhýta opa árape. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Santiago kuatiañe’ẽpe oĩ háicha 2, 1-7

Che pehẽnguekuéra, peẽ pejeroviáva Ñandejára Jesucrísto heko mimbipávare, naiporãi peporo hesa poravo. Oike ramo pende tupaópe
peteĩ ikuãirũ órova ha oñemonde porãva, ha upe jave oike avei peteĩ mboriahu ijao soropáva, ha perohoryve ramo upe oñemonde porãvape ha peje ichupe: “Eguapy ko iporãvehápe”, imboriahúvape katu peje: “Nde eñembo’y upépe”, térã: “Eguapy upe rupi”. Peñombojerovia joavýma hína peẽ voi, ha pe poro’apo hekope’ỹ.

Che pehẽnguekuéra pohayhúva, pehendu kóva: Ñandejára oiporavo va’ekue yvy arigua mboriahúpe, imba’e reko haguã ijeroviápe, ha
ohupyty haguã yvága ha’e he’i va’ekue ome’ẽtaha umi ichupe ohayhúvape, peẽ katu ndapejapói mba’eve ramo imboriahúvape.

Ndaha’éi nga’u piko mba’e reta rekoha umi pene momba’apo reíva, ha pende rerahava mburuvichakuéra renondépe? Nda ha’ekuérai nga’u piko umi oñe’ẽ vaíva Jesucrísto rehe, peẽ pejeroviaha?

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Mt 4, 23
Aleluia.
Jesús omoherakuã marandu porã oñe’ẽva Ñandejára Rréino rehe. Hetápe avei omonguera opaichagua mba’asy ha mba’e vaígui.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 7, 31-37
Opavave: Romomba’e guasu ndéve, Ñandejára.

Upérõ Jesús osẽ jey oho Tírogui. Ha ohasa Sidón rupi ha oguãhẽ Lágo Galiléape, Decápolis ypy rupi. Upépe, ojereraha hendápe peteĩ ohendu’ỹva ha iseseósova. Ojerure hikuái Jesúspe omoĩ haguã ipo hese okuera haguã. Jesús ogueraha chupe ha’eñoháme, omoinge ikuã ijapysápe ha omona hendy ikũre.

Upéi ohupi hesa yvágare, hi’ãho ha he’i, “Efata” he’iséva, “Ejepe’a.” He’ipamívonte, pe ohendu’ỹva apysa ojepe’a ha ikũ jera, ha oñe’ẽ porã. Jesús he’i opavavépe ani haguã omombe’u. Ha he’i-he’ivérõ jepe chupekuéra, ko’ýte omombe’u hikuái. Oponderapa joa hikuái ha he’i, “Opa mba’e ojapóva niko ojapo porã. Ohendu’ỹvape omohendu ha iñe’ẽngúvape omoñe’ẽ.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.