Ñahendu Jesús Ñe’ẽ. Epifanía: Jesús ojechauka opavavépe

Escucha el evangelio y la reflexión en: https://youtu.be/FgQ-NMnhNA8

Epifanía: Jesús ojechauka opavavépe

Mateo 2, 1 – 12

Jesús niko onase va’ekue Belénpe, Judéape. Herodes va’ekue rréi upérõ. Oguãhẽ katu Jerusalénpe, kuarahy resẽ guio oúvo, mbohapy karai arandu. Oguãhẽmba riremínte oporandu hikuái upépe:

—Moõiko oime pe mitã onase va’ekue hudíokuéra rréirã. Rohecha niko kuarahy resẽme mbyja chupe omohenondéva. Ha roju hína romomba’e guasu haguã chupe.

Herodes oikuaávo upéva ipy’a tarovaite. Ha opa Jerusalengua upéichante avei. Upémarõ, Herodes ombyatypa ijerére pa’i ruvichakuéra, ha umi hudíokuéra léi ombo’éva. Ha oporandu chupekuéra moõpa onase vaerã ra’e pe Mesías.

Ha’ekuéra he’i chupe: — Belénpe, Judéape. Proféta niko oheja va’ekue kuatiápe he’i ramo guare kóicha:
“Ha nde Belén reiméva Judápe, nane michĩvéi mba’eveichave ramo puéblokuéra apytépe upe tetãme. Ndehegui osẽta rréi oisãmbyhýtava che retã Israel.”

Upépe, Herodes ohenoika kañyháme umi karai arandúpe. Ha oporandu chupekuéra araka’etépa ohecha ra’e hikuái pe mbyja.

Upéi katu omondo chupekuéra Belénpe, he’ívo: —Tapeho peikuaa porã moõpa oĩ hína pe mitã. Pejuhu rire, peju pemombe’u chéve. Che ave ahase amomba’e guasu chupe.

Herodes oñe’ẽmba riremi, umi karai arandu osẽ oho. Ha pe mbyja ha’e kuéra ohecha va’ekue kuarahy resẽvo, oho henonderã.

Upéi katu opyta pe óga pe mitã oĩha ári. Umi karai arandu ohechávo moõpa opyta pe mbyja tuicha ovy’a. Oike hikuái pe ógape, ha upépe ohecha pe mitãmi, isy María ndive.

Oñesũ ha omomba’e guasu chupe hikuái. Upéi katu oguenohẽ ikarameguãgui óro, insiénso ha mírra ryakuã porã, ha ome’ẽ chupe. Ñandejára he’i rire chupekuéra iképe ani haguã oho Herodes rendápe, osẽ oho hikuái hetãme ambue tape rupi.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Mombyrýgui ningo roju, vy’apópe roguahẽ, ha rojuhu María José ha Hesu.” He’i Lo Rréje. Ha mba’épa hína che reindy ha nde che irũ la nde rehekáva ha remuñáva reikóvo yma guive.

Mba’épa pe rregálo tuichave ikatúva rehupyty nde rekovépe. Ema’ẽmína mba’éichapa umi mbohapy karai arandu oheka Hesúpe ojuhu peve, ndoikuaáiramo jepe ichupe.

Ha mba’evete umi rregálo ha’ekuéra oguerúva. Taha’e jepe óro ojajaipáva ha incienso ryakuã porã. Tupãsy ha karai José hína umi orekóva ijyva ári pe óro ku’i ryakuã asy. Níño Hesu hína la pláta yvyguy orekóva María ha oñangarekóva José.

Péva hína umi karai arandu oúva oheka, ohecha ha oadora ipy’aite guive. Pe rregálo tuichavéva ikatúva jahupyty hína jaikuaa Hesúpe, ñañandu ichupe ñande rekovépe ha jahayhu ichupe ñande py’aite guive. Ha pe rregálo tuichavéva ikatúva ñame’ẽ mitãnguérape ha’e avei toikuaa Hesúpe, tojerovia hese ha toguata ijykére.

ÑAÑEMBO’E OÑONDIVE

Ñandejára Hesukrísto rejechauka va’ekue karai arandu mombyrýgui oúvape. Ejechauka avei ore rekovépe, roñandu haguã nde ore moirũha. Amén.

Pa’i Jasy.